1. Tannem Balakak mhollem, 'Mhaka hanga sat vedi bandun di, ani sat boil, ani sat menddre haddun mhaka di.'
2. Sanglolem toxem Balakan kelem, ani tannem ani Balaaman êk-êk boil ani êk-êk menddro eka-eka vedir bhettoilo.
3. Uprant, Balaaman Balakak mhollem, ‘Hi tuji hom’-bhett zata thoinch rav; Sorvespor mhaka mellunk sôdta vô na tem hanv vicharun kaddtam. To mhaka kitem sangta tem tuka kollit korin.’
4. Mhonnttôch, to ekloch voir dongrar gelo, ani Dev taka thoim mell'llo. Ani Balaaman mhollem, 'Hanvem sat vedi bandleat, ani tancher êk-êk boil ani menddro bhettoila.'
5. Sorvesporan Balakak ek bhakit dilem ani taka mhollem, 'Balaka-xim portun voch ani taka tum oxem kollit kôr.'
6. To ailo, ani Balak hom'-bhett zatali thoim ozun-ui ubo aslo, ani tachê borabor Moabache mukheli asle.
7. Balaaman hê porim apli kovita ucharli: Balakan Moabachea patxaian, Siriek thaun, Udentechea dongrancher-thaun mhaka apoila: Ie, ani mhojê pavttin uloi; Israel porjecher xirap ghal', Oxem to mhaka sangta.
8. Devan xirap ghalunk na tacher hanv koso xirap ghalum, Vô Dhonian korunk na tachi nit hanv koxi korum?
9. Unch khoddpancher-thaun te mhaka dixtti poddtat; Dongrancher thaun hanv tankam polleun asam. Eksuri jieta tosli porza ti; Heram poros apnnacher axirvad poddla mhonn te zannot.
10. Jakobachi dhull konnem mezum ieta? Israelachi sonsôt konnem mezum iet? Devachê porjê sarko jieun mhoje dis sarum; Nitt mon'xam porim sovostkaien hanv morum.'
11. Hem aikun, Balakan Balaamak mhollem, 'Mhaka tunvem kitem mhonn keleim? Mhojea dusmanancher xirap ghalunk tuka apoil'lo, punn tachê boldek tankam axirvad dilai.'
12. Tannem zobab dilo, 'Sorvespor mhaka sangta titlench mhojean sangum-iet.'
13. Magir, Balakan Balaamak mhollem, 'Mhojê borabor dusrê suvater ie; thoim thaun tuka thoddech-xe Israelit dixtti poddtole. Thoim thaun tankam, mhojê khatir, xirap ghal.'
14. Taka Zofimachea xetantlean Pisga Dongrachea mathear vhelo. Thoinsor-ui tannem vedi bandleô, ani êk-êk boil ani êk-êk menddro tancher bhettoile.
15. Balaaman Balakak mhollem, 'Tuje hom'-bhettê-xim rav, hanv ho thoim Devacho nirôp ghevunk vetam.'
16. Sorvespor Balaamak bhettlo, ani kitem sangchem aslem tem sangun taka Balaka-xim dhaddlo.
17. Balak hom'-bhett hulpotali thoinch ubo aslo, ani tachea sangatak Moabache mukheli-i asle. Sorvesporan kitem sanglam tem Balakan vicharlem,
18. ani Balaaman hê porim apli kovita kallzant thaun ucharli: 'Zipporachea puta, Balaka, utth ani aik ani hanvem kitem sangchem asa tem aik,
19. Dev mon'xam sarko nhoi, fotti sangunk; Mon'xachem mon bodolta tê porim, Dev aplem bodlina. Bhasaita tem pallta; To uloita, tachea utra pormannem sogllem ghoddta.
20. Axirvad ghal, oxem tannem mhaka sanglam, Ani Dev ghalta to axirvad mhojean kaddum nozo.
21. Israelacho fuddar hanv polletam toso nhoi, Koslench nirbhag vô dukh tankam na-haddcho Sorvespor, tancho Dev, tanchea sangata asa; Aplo patxai mhonn taka te pachartat.
22. Devan tankam Ejiptantle bhair kaddlea; Eka ranboila porim tanchê khatir to zhuzta.
23. Montr nhoi, vô jadu kosloch Israel porjek lagot toslo na khoinch. Lok atam Israela vixim mhonnttolo: 'Devan kitem kelam tem polleiat!'
24. Eka ragixtt xinva porim Israel porza: Pisddun khai porian ogi na ravchi, Marleat tanchem rogot pie pasun.'
25. Tedna, Balakan Balaamak mhollem, 'Israel-porjek xirap ghalunk tum patthim sortai, punn tankam axirvad tori dium naka!'
26. Balaaman zobab dilo, 'Sorvespor sangta titlem-i hanvem korunk zai mhonn tuka sangunk naslem?'
27. Balakan mhollem, 'Mhojê borobor ie, hanv tuka anieka zagear vhortam. Ghoddiê hea zagea thaun Dev, tunvem mhojê khatir tankam xirap ghalunk nirmit'
28. Tor, tannem Balaamak Peor Dongrachea mathear vhelo, hanga thaun oronnem dixtti poddtalem.
29. Balaaman taka mhollem, 'Hanga sat vedi bandun mhaka di, sat boil ani sat menddre hanga hadd.' Sanglolem toxem Balakan kelem, ani êk-êk boil ani menddro hom'-bhett korunk eka-eka vedir bhettoile.
