1. Mahla, Noa, Hogla, Milka, ani Tirza heô soglleô Zelofehadacheô dhuvô. Zelofehad Heferacho put; ho Gileadacho; ho Makiracho; ho Manassecho; ani ho Juzecho.
2. Heô Zomatichea Tombuchea dara-xim geleô, ani Moizes, Eleazar iadnik, porjeche mukheli, ani soglli porza aslim tanchea mukhar ubeô ravun tãnnim mhollem,
3. Amcho bapui, ek put utpon korinastana oronneant melo. To Koracho bhageli, Sorvesporacher add kolpole tantlo êk; ani to aplea patkak lagon melo.
4. Amchea bapaik put naslo dekhun, Israel-porjê modem amchem nanv kiteak puson vechem? Amchea bapaichea soiream modem amkam bhatt-bens diat.'
5. Moizesan tancho prosn Sorvespora mukhar ghalo,
6. ani Sorvesporan taka zobab dilo,
7. Zelofehadacheô dhuvô magtat tem sarkem asa; tanchea bapaichea soiream modem tankam bhatt-bens diun kadd. Mhonnttôch,, tanchea bapaichem daiz tanchench zaun asa.
8. Israel-porjek oxem sang, "ki êk monis put nastana morta tedna, tachê dhuvek tachem daiz vochunk zai.
9. Taka dhuv-ui, na zalear, tachea bhavank tem poddtolem.
10. Taka bhav nant zalear, tachea bapaichea bhavank vetolem.
11. Taka bhav nant, ani tiv-ui nant zalear, tachea dusrea lagxilea soireak tem vetolem ani hem tachem daiz zaun astolem. Israel porjen ho kaido samballunk zai, kiteak Hanvem, Sorvesporan, toxem tuka formailam. " '
12. Sorvesporan Moizesak mhollem, 'Abarim' Dongrar voir vochun, Israel-porjek ditolom tea ganvacher nodor mar.
13. Tuzo bhav Aaron melo, tê porim tunvem ho pollel'lea uprant tum mortoloi,
14. kiteak tumi dog-ui Zinachea oronneant mhojea hukumacher add kolpoleat. Meriba zagear soglli Israel-porza mhojer add gunngunntali tedna, tumi mhojem povitr boll mandun gheunk patthim sorleat.' (Meriba, Kadesh zagear Zinachea oronneant, êk zhôr zaun asa.)
15. Moizesan Sorvesporak prarthlo,
16. Sorvespora, sorv jivitachê zhori, hanv tuka prarthtam, porjek bhasailolea ganvant vhortam, ani zhuza-loddaient hukum' dita toslo êk monis mhojea zagear vinchun kadd,
17. hê porim, tuji porza rakhnnea viret êk hindd zaunchina.'
18. Sorvesporan Moizesak mhollem, 'Joshua, Nunacho put, êk purto monis zaun asa, tachê tokler tuje hat dovor.
19. Eleazar-iadnika ani sogllê porjê mukhar taka ubo kôr.
20. Taka tuji ili podvi di, hê porim soglli porza taka khalti zatoli.
21. To Eleazar-iadnikachi budh ghevun choltolo, ani Eleazar Urim ani Thummim, heô vidhi vaprun mhoji khoxi vollkhun ghetolo. Hê jin'xim Eleazar Joshuak ani porjek sogttant choloun vhortolo.'
22. Sorvesporan formailolem toxem Moizesan kelem. Joshuak Eleazar iadnika ani sogllê porjê mukhar ubo dovorlo.
23. Sorvesporachea hukuma pormannem, Moizesan Joshuachê tokler aple hat dovorle, ani to aplo fuddari zaun astolo mhonn kollit kelem.
