1. Israel-porjek hi xikounn diunk, Sorvesporan Moizesak hukum' dilo. "Konn-ui, dadlo vô ostori Nazarit zaun ekannem Sorvesporak apli bhettoun korunk angoita,
3. tea mon'xan soro ani dakam-rôs pieuncho nhoi. Dakanchem kel'lem kitench pieunchem nhoi, dakô ani pasam khaunchim nhoi.
4. Nazarit koso jieunk sôdta titlo-i kall dakvalichem utpon zata tem kãich chakchem nhoi, dakancheo bieô ani kat legun khaunchim nhoi.
5. Nazaritachê angovnnê khal jieta titlo-i kall, tannem aple kens katorche nhoi. Angovnnecho sogllo kall to Sorvesporak bhettoilolo astolo, ani kens vaddoitolo.
6. Sorvesporak apli bhettounni kelea mhonn tache kens êk khunna; dekhun, moddea-xim vochun- bapaichea, avoichea, vô bhoinnichea legun, tannem apnnakuch boxttauncho nhoi.
8. Nazarit aso-sor to Sorvesporak bhettoilolo astolo.
9. Eka Nazaritache kens boxttovle zalear, kiteak to eka mon'xa-xim aslo ani ho ovchit melo, tannem sat dis ravchem ani magir aple kens tasche, ani to riti pormannem xud'dh zatolo.
10. Atthvea disa to, don kovdde vô parve gheun, iadnika-xim ietolo ani Sorvesporachea Zomatichea Tombuchea darar ubo ravtolo.
11. Iadnik ek tantlem suknnem farikponnak bhettoitolo, ani dusrem hom'-bhettek laitolo, hê porim tachê xudh'dhichi rit palltolo. Teach disa to aple kens Sorvesporak bhettoitolo
12. ani Nazarit koso aplem jivit Sorvesporachê sevek laitolo. Adlo kall atam hixeôbant iena, kiteak tache kens boxtton gele. Ani protidan koxem, to vorsacho ek menddro haddtolo.
13. Nazaritan aplê angovnnek pallo dilea uprant, tannem hi rit samballchi: Zomatichea Tombuchea darar vochun,
14. Sorvesporak to tin zonavoram, koslench khot naslolim, vorsacho (purus) menddro hom'-bhettek, vorsachi êk (stri) mendri farikponnachê bhettek, ani ektarachê bhettek êk menddro.
15. Tea bhair, to fug naslolea unddeanchi ek tokri haddtolo: Motte undde tel misoll korun, ani telacho ilo xinvôr marun patoll biskut-undde; toxench, sodanchi orovachi ani soreachi bhett.
16. Iadnik hem sogllem Sorvesporak bhettoitolo, ani farikponnachi toxich hom'-bhett kortolo.
17. Ektarachê bhettek to menddro martolo, ani unddeanchê tokrê borabor bhettoitolo; têch porim to orovachi ani soreachi bhett kortolo.
18. Zomatichea Tombuchea darar Nazarit apli tokli tastolo ani ektarachi bhett lasta thoim aple kens ujeant uddoitolo.
19. Magir, menddreacho fuddlo paim xiztôch, iadnik to kaddtolo, ani tokrentlo ek motto unddo ani êk patoll unddo kaddun, hem sogllem Nazaritachea hatant ghaltolo.
20. Uprant, iadnik tim Sorvesporak ek kherit dennem koxem bhettoitolo; tim iadnikachea boreponnak ek povitr dennem. Tea bhair, iadnikak, sodanchê porim, menddreachi chhati ani êk paim. Tea uprant, Nazaritachean soro pieunk zata.
21. He mhollear Nazaritanche kaide. Punn konn-eklo kaidea voir bhasaita, tannem bhasailam titlem-i pallunk zai."
22. Sorvesporan Moizesa kodde uloun taka mhollem:
23. Aarona ani tachea putam kodde oxem uloi: "Israelachea putam-dhuvancher axirvad ghalunk zai oso; tumi tankam mhonnttoleat:
24. Sorvespor tujer axirvad ghalum ani tuka samballum.
25. Sorvespor Aplea mukhamollacho porzôll tujer ghalum ani tuka proson zaum.
26. Sorvespor Aplem mukhamoll tuka dakhoum ani tuka xanti dium."
27. Hê porim Israelachea putam-dhuvancher Mhojem Nanv ghetolim ani Hanv tancher axirvad ghaltolom.'
