1. Gileadachea kullantlea kuttumbache vhoddil- Gilead, Makiracho put ani Manassecho natu, ani Manasse Juzecho put- Moizesa ani heram mukheleam-xim gele.
2. Tannim mhollem: 'Israel porjek, sorti ghalun, ganv vanttunk Sorvesporan tumkam hukum' dilo. Têch porim, amchea soirea Zelofehadachem bhatt-bens tachea dhuvank diunchem, oso-i Sorvesporan hukum' dila.
3. Punn, polle, tim dusrea kullantlea dadlea kodde logn zatit zalear, tanchem bhatt-bens tea dadleachea kullant vetolem, ani amchea kullachem bens titlench unnem zatolem.
4. Utsovachea vorsa, viklolem bhatt-bens nizachea dhoniak porot ieta, tea somoiar, Zelofehadachea dhuvanchem daiz tanchea ghovachea kullant vetolem, ani ho vantto amkam porot mellchona.'
5. Mhonnttôch, Moizesan Israel porjek Sorvesporacho hukum kollit kelo. Tannem mhollem: 'Manassechem kull sangta tem khorem,
6. ani tea pasot Sorvespor mhonntta, ki Zelofehadachea dhuvanchean "fokot aplea khas kullantlea khoinchea-i dadlea-kodde logn zaum-iet.
7. Dôr Israelachem bhatt-bens tacheach khas kullant urchem.
8. Ji Israel-ostori aplea kullachem bhatt-bens gheta, tinnem fokot aplea kullachea dadlea kodde logn zaum-iet. Hê porim, dôr Israelit aplea purvozachem daiz bhôgtolo,
9. ani hem eka kullantlem dusrea kullak vechem na. Dôr kullachem bhatt-bens teach kullant urtolem." '
10. Tôr, Mahla, Tirza, Hogla, Milka, ani Noa, Zelofehadacheô dhuvô hannim, Sorvesporan hukum' dil'lo, tê porim kelem,
11. ani aplea chulot-bhavam kodde logn zaleô.
12. Tim Manassechea, Juzechea putachea, kullant logn zalim, ani tanchem bhatt-bens bapaichea kullant urlem.
13. He nem' ani kaide Sorvesporan Moizesa udexim, Moabachea moidanar, Jordan Nodi poltoddi, Jeriko samkar dile.
