1. Israel-porza, ttanch marun, fuddem sorli ani tinnem Moabachea unch zageancher, Jordanachê udentek ani Jeriko mukhar, aple tombu marle.
2. Moabacho patxai, Balak, Zipporacho put, Israel-Porjen Amoritank kitem kelam ani tanchem boll kedem tem borem zanno aslo,
3. dekhun to ani soglli porza bharim kamplim.
4. Moabachê porjen Midianachea mukheleank mhollem, 'Edem vhoddlem loskor amchê bhonvtim soglleacho bhosm korun sôddtolem- chorvachea moidanar êk paddo khata ani maddoita tê porim.'
5. Tor Balak patxaian Balaamak apounk monis dhaddle; ho Beoracho put, ani Pethor ganvant, Amawchea raxttrant Eufrates nodi-xim ravtalo. Tea mon'xam-nim Balaamak Balak patxaiacho ho nirôp haddlo: 'Hanv tuka kollit kortam, ki Ejiptant thaun ek raxttr hanga ailam; ho lôk soglleak ximpoddla ani amcho ganv aplea tabeant korunk dhadd ghalta.
6. Te amchea poros zaite chodd asat;tôr, upkar magtam, hanga ie, mhojê khatir, ani tancher xirap ghal. Tedna amchean tancher zoit vhorun tankam hangache dhanvddaunk zatolem. Tum axirvad ditai tedna lokak axirvad mellta, ani xirap ghaltai tedna xirap lagta.'
7. Tôr, Moabachea ani Midianachea mukheleamnim to xirap ghalun poixe vhele; te Balaama-xim gele ani Balakacho nirôp dilo.
8. Balaaman tankam mhollem, 'Hanga vostek ravat, ani Sorvespor mhaka kitem sangta tem tumkam kollit korin.' Mhonnttôch, te Moabache mukheli Balama-xim ravle.
9. Dev ailo ani Balaamak tannem vicharlem, 'Tujê-xim ravtat te monis konn?'
10. Tannem zobab dilo, 'Moabachea Balak patxaian tankam dhaddleat mhaka sangchê khatir,
11. "ki Ejiptant thaun hanga êk porza ailea ani sogllea ganvak ximpoddlea. Tanchê virudh zhuzun, hangache tankam dhanvddaunk tancher xirap ghal mhonn to mhaka sangta." '
12. Devan Balaamak mhollem, 'Hea mon'xam borabor vochum naka, ani Israel-porjecher xirap ghalum naka, kiteak mhozo axirvad tancher poddla.'
13. Dusrê sokallim, Balaam Balakachea niropiam-xim gelo ani tankam mhollem, 'Tumi ghora vochat; tumchê borabor vochunk Sorvesporan mhaka mona kelam.'
14. Hea pormannem te Balaka-xim portun aile, ani 'Balaam iena mhonn taka sanglem.'
15. Tedna Balakan adlea poros odik ani vorte monis Balaama-xim dhaddle.
16. He gele ani Balaamak ho nirôp dilo, 'Hanga ieunk tumkam konnuch mona korum-noiê, upkar magtam!
17. Tuka bori mozuri ditolom, ani sangtai titlem-i kortolom. Mhojê khatir, matso hanga ie ani hê porjecher xirap ghal.'
18. Punn Balaaman zobab dilo, 'Balakachea rajmahalant asa titlem-i rupem ani bhangar mhaka dilem-i zalear, lhan vostumnim legun mhojea Sorvespora Devacho kaido mhojean kednanch môddum nozo.
19. Punn upkar magtam, her monis hanga vostek ravlole toxe tumi-i ravat; ghoddiê Sorvespor mhaka anink kitem-i sangunk sôdit tem gomtolem.'
20. Tê rati Sorvespor Balaama-xim ailo, ani taka mhollem, 'He monis tuka apounk aileat zalear, toiar za ani tanchea borabor voch, punn hanv tuka sangtam titlench kortoloi.'
21. Tôr, dusrê sokallim Balaaman aplea gaddvak toiar kelem, ani Moabachea mukheleam borabor gelo.
22. Balaam vochunk bhair sorlo mhonn Sorvespor ragar zalo; ani to aplea gaddvar bosun, dogam chakram borabor vetalo tedna, Sorvesporacho dut modench rostear taka addaunk ravlo.
23. Gaddvan tea dutak pollelo, ani ho êk torsad gheun ubo aslo; mhonnttôch tem gaddum apli vatt sôddun xetantlean dhanvlem. Ani Balaaman taka boddoun porot rostear haddlem.
24. Tedna to dut ekê oxir vatter ubo ravlo; donui vattamnim dakam-molle asle, uzvê ani dhavê vatten durig aslem.
25. Dutak polleun, gaddum durgak zorkotton gelem ani Balaamacho paim fatramnim chirddolo. Tor, Balaaman gaddvak porot boddoilem.
26. Aniek pavtt to dut rostear fuddem vochun ravlo, ani zago itlo oxir, ki ekê-i vatten mukhar vochunk sutto naslem.
27. Hê pavtt, dutak polleun, gaddum gottelem. Balaam ekdom' ragar zalo, ani tannem gaddvak boddounk suru kelem.
28. Tedna Sorvesporan gaddvak ulounchem dennem dilem, ani tannem Balaamak mhollem, 'Hanvem tuka kitem kelam? Kiteak mhonn tunvem mhaka tin pavtti marleim?'
29. Balaaman taka zobab dilo, 'Kiteak tunvem mhojeô moskoreô keleoi. Mhojêkodde torsad asli zalear, tuzo jiv kaddtolom aslom.'
30. Gaddvan tori-i mhollem, 'Sogllea tujea jivitant mhojê patthir bosun gelai tench gaddum nhoi hanv? Hea adim kednanch hanvem tuka oxem kelam zait?' 'Na,' tannem zobab dilo.
31. Tedna, Sorvesporan Balaamache dolle ugoddle ani vatter aplea hatan torsad gheun ubo aslolo devdut taka dixtti poddlo; ani Balaam dhornir sorpottlo.
32. Tedna dutan taka vicharlem, 'Tunvem kiteak gaddvak tin pavtti marleim? Hanv tuji vatt addaunk ailam, kiteak tunvem hê vatten ieunchench nhoi aslem.
33. Punn tujea gaddvan mhaka pollelo, ani tin pavtti tem kuxin sorlem. Tannem toxem korunk na zalear, hanv, gaddvak vochunk divun taka martoloch aslom.'
34. Balaaman zobab dilo, 'Hanvem pap adarlem; tum mhaka addaunk rostear ubo zaloi mhonn nokllo zalom; punn hanv kitem kortai tem tuka vankddem distai zalear, hanv porot ghora vetam.'
35. Punn dutan taka mhollem, 'Hea mon'xam borabor voch, punn hanv sangtam titlench kortoloi.' Hea pormannem Balaam, Balakan dhaddlolea odhikariam borabor gelo.
36. Balaam ieta mhonn aikun, Balak taka Ar xarant mellunk gelo; hem xar Arnon Nodichê deger aslem, ani Moabachê ximer.
37. Balakan vicharlem, 'Poilê pavtti tuka hanvem apounk dhaddlolo tedna kiteak ailonaim? Favo ti mozuri tuka diunchona mhonn bi somzoloi?'
38. Balaaman zobab dilo, 'Punn hanv ailanch nhoi? Mhojêch podorchem hanvem kãich mhonnonk zaina mhonn tum tôr zannoi nhoi? Dev mhaka sangta titlench mhojean tuka sangum-iet.'
39. Tôr, Balaam Balaka sangata Huzot xarant gelo,
40. hanga Balakan gorvam ani menddram marlolim, ani Balaamak ani tachê borabor asloleank tantlem thoddem bhou mas dilem.
41. Dusrê sokallim, Balakan Balaamak Bamot Baal mhonnttat thoim vhelo; hanga thaun Balaamak thoddo-so Israel-lôk dixtti poddtalo.
