1. Moabachea moidanar, Jeriko samkar ani Jordana poltoddi, Sorvesporan Moizesak mhollem:
2. ‘Zo Israel-porjek vantto poddta tantlim thoddim xaram Levitank ravunk, ani tanchea hinddank chorvachim moidanam tea xaram bhonvtim diunk zai mhonn Israel-porjek sang.
3. Him xaram Levitanchim zaun astolim, ani te thoim ravtole. Ani bhonvtonn’chem moidan chorva khatir, tanchea gorvank ani heram mon’zatink.
4. Hem chorvachem moidan, char-ui vattamnim, xarachea vonttim bhair hozar hat rund zaunk zai
5. Xara bhair, udentik don hozar hat, dokhinnek don hozar, ostomtek don hozar, ani ut’torek don hozar hat mêzche ani modem xar aschem; hê porim hea xaranchim chorvachim moidanam astolim.
6. Levitank sôv xaram asreak dovrunk zai: konn-ui chukon dusreak marta, to thoim asor ghetolo. Tea bhair, tankam ravpak, be-challis xaram,
7. sorv-bhonvtim moidan, sogllim mhonnon, otth’the challis xaram.
8. Ani dôr kullak kitlim xaram diunchim, tem tea-tea xarachê lambaiê-rundaiê pormannem tharaun gheunchem. Apnnak daizacho vantto favo zala tea pormannem, zonn eklo aplim thoddim xaram Levitank ditolo.’
9. Israel-porjek kollit korunk, Sorvesporan Moizesak sanglem:
10. ‘Tumi Jordan utrun, Kanaan-ganvant bhitor sortôch
11. “asôr-gheunk xaram nemun dôvrat; konn-ui chukon dusreacho jiv kaddta to hea xarant asôr ghetolo.
12. To thoim mel’lea mon’xachea soiream thaun pois astolo, zori-i konn farikponn gheunk sôdit. Hea mon’xachi sobhemazar nit kelea xivai tacher mornnachem formonn marum nozo.
13. Sôv xaram vinchun kaddat,
14. tin Jordanachê udentek, ani tin Kanaanchea ganvant.
15. Him xaram Israel-porjek toxem porkea-lokak asor gheunk upkartolim. Chukon konn-ui dusreacho jiv kaddta, to asôr ghevunk thoim vetolo.
16. Konn-ui ek hatiar ghevun, loknnachem
17. vô fatrachem
18. vô lankddachem tem zanv, dusreacho jiv kaddta to khun adarta, dekhun tacho-i jiv kaddcho.
19. Martoleacho jiv kaddunk mel’-lea mon’xachea lagxilea soireachi ti zobabdari. Hatak mellot tedna tacho jiv kaddcho.
20. Konn-ui eklo dusreak zollta, ani taka lottun bhuim xevttita, vô tacher kitem-i uddoun,
21. vô mutti-maran tacho jiv kaddta, to khun adarta, dekhun tacho jiv kaddcho. Hi zobabdari mel’lea mon’xachea lagxilea soireachi; melltôch, tacho jiv kaddcho.
22. Konn-ui eklo chukon dusreacho jiv kaddta, somoz, tacho rag-dvês naslo punn taka lottlo ani to bhuim xevtton melo, vô kitem-i uddoil’lem tacher poddun to melo,
23. vô dusmankai na, ani marchem mon na, punn pollenastana kitem-i uddoil’lem tacher poddun tacho jiv gelo.
24. Hachi zobabdari porjen gheunchi ani martoleachea vatten tharaunchi; ani mel’lea mon’xachea hatant sôddchi nhoi.
25. Punn porza hea mon’xak tea soireachea hatantli rakhtoli, ani taka asôr gheta tea xarant vhorun pavoitoli. Tannem hea xarant, povitr telan makhlolo Maha-Iadnik jivo aso porian ravchem;
26. thoincho bhair sorun, mel’leacho soiro taka marit zalear,
27. ho khun zaunchona.
28. Kiteak tannem, tea kallachea Maha-Iadnikachem moronn porian tea xarant ravunk zai. Maha-Iadnik mortôch, tachean aplea ghora ieunk zata.
29. He nem’ tumkam ani tumchê sonstik lagtat, khoinsor-ui te asum.
30. Khun adarlea mhonn sarki nit zaunk, dog vô odik govai gorjeche; ekleachi govai, taka guneanvkari korun mornnak ghalunk, puro nhoi. Khun adarta tacho jiv kaddunkuch zai.
31. Duddu farik korun, tachean moronn vattaunk zaina.
32. Têch porim, asor gheupachea xarant rigla tea mon’xak, Maha-Iadnik morchê adim, duddu farik korun taka ghora ieunk diunchem nhoi.
33. Oxem korxat zalear, tumi jietat to ganv boxttaitoleat. Khun ganv boxttaun sôddta, ani zannem khun kela tachea mornna xivai to ganv xud’dh korunk zaina.
34. Tumi jietat to ganv boxttaum nakat, kiteak hanv Sorvespor, ani hanv Israel-porjê modem jietam.”’
