1. Hem aikun sogllê porjen aple talle ubarun vhoddlean bob marli ani ti rat roddon sarli.
2. Tãnnim Moizesacher ani Aaronacher gunn-gunnun, mhollem, 'Ami Ejiptantuch vô hea oronneant legun mel'leanv zalear odik borem aslem!
3. Sorvespor amkam kiteak tea ganvant vhorta? Zhuztana ami loddaient mortoleanv ani amchea bail-burgeank koidi korun vhortole. Ami porot Ejiptant gelear odik borem nhoi?'
4. Tôr, tãnnim eka-mekak mhollem, 'Amkam êk mukheli vinchun kaddum-ia, ani porot Ejiptant vochum-ia!'
5. Tedna, Moizes ani Aaron sogllê porjê mukhar dhornir sorpottle.
6. Ani Joshua, Nunacho put, ani Kaleb, Jefunnecho put, gel'le tantle dog bhedi, hannim dukhi-khontin aplim vostram pinzlim
7. ani porjek mhollem, 'Ami topasla to ganv zoboruch boro.
8. Ami Sorvesporak mandleanv zalear to amkam thoim vhortolo, ani dud ani mhonv vhanvta toslo ganv amkam ditolo.
9. Sorvesporacher kolpum nakat, ani thoinchea lokak bhieum nakat. Ami sompeponnim tancher zoit vhortoleanv. Sorvespor amchea sangatak asa ani je dev tea lokak rakhtale tankam amchea Sorvesporan sokla ghaleat; tôr sabsube bhieum nakat.'
10. Soglli porza tankam fatraunk toiar zal'li, punn ovchit Sorvesporacho porzôll Zomatichea Tombu-voir fanklo.
11. Sorvesporan Moizesak mhollem, 'Kedna pasun hi porza mhaka pois kortoli? Itlim sogott vismitam hanvem tanchê modem keleant astana; kedna pasun ti mhojêr visvas dovorchi na?
12. Tancher pidda-pest dhaddun tanchem nisontton kortolom, punn tuka, te asat tea poros podvedar dês-porjecho bapui kortolom!'
13. Punn Moizesan Sorvesporak mhollem: 'Tujê podvê-bollan hê porjek Ejiptantli bhair kaddun haddleai. Tujê porjek kitem kelaim tem Ejiptantlea lokak gomtôch,
14. tim hea ganvchea lokak sangtolim. Tôr, ho lôk borem zanno, ki tum, Sorvespor amchea sangata astai, tujem kup amchê voir thambta tedna amkam rup-rup dakhol zatai, ani disa-uzvadda eka kupachea khambea vorvim amkam vatt dakhoitai.
15. Tôr, sogllê tujê porjek marun uddoixi zalear, jea loka modem tujem nanv ghazlam to lôk mhonnttolo, ki
16. "tunvem hea lokak oronneant marun sôddlei kiteak tankam bhasailolea desant vhorunk tujê kodde ghoddlem na."
17. Tôr atam, Sorvespora, tuka prathtam, tuji podvi-boll voir kadd ani bhasailãi tem xarti pavoi, zoxem tunvem mholleim,
18. "Hanv Sorvespor, sompeponnim ragan fulona, doiallponnim ani nittaien lektam, ani patok bhogxitam ani uchambollai sonsun vhortam. Toriastana, bapai-xapaichea patkank lagon, tisrê ani chovthê pinnddkek porian tanchea bhurgeank khast launchi soddchona."
19. Ani atam, Sorvespora, tuka prarthtam, tujea thir mogachê kholaiek thaun hê porjek, Ejiptantli bhair kaddloleak tunvem tika bhogxileai tech porim atam-i tika bhogos.'
20. Sorvesporan mhollem, 'Tunvem maglãi toxem, hanv tika bhogxitam.
21. Punn mhojea jivachean ani ji prithumever mhoji khatri zata tantunt hanv bhas ditam,
22. hê porjentlo tea ganvant bhitôr sorunk eklo-i jivo aschona. Mhozo porzôll-dobazo Ejiptant, ani oronneant hanvem keleant tim sogllim vismitam tãnnim dekhleant astana, bogor-bogor tãnnim mhoji sõsnikai huskailea, ani mhaka khaltim zaunchem sôddun dilam.
23. Tanchea purvozank bhasail'lea ganvant tim kednanch bhitôr sorchim nant. Mhojê khoxek pallo diunk beporva kelea tantlo eklo-i thoim panvchona.
24. Punn mhozo sevôk Kaleb, hachem mon vegllem, ani to mhaka visvaxi ravla dekhun, to topasun aila tea ganvant taka pavoitolom, ani tachê sonstichea tabeant to ganv astolo;
25. hachea falkeamnim atam Amalekit ani Kanaanit jietat. Faleam tum patthim sor, ani Aqaba falkea sorxilean oronneant voch.'
26. Sorvesporan Moizesa kodde ani Aarona kodde uloun mhollem:
27. Hi noxtti porza Mhojer kedna porian gunngunntoli? Tankam sang: tim Mhojer gunngunntat tem Hanvem aikolam.
28. "Mhojea jivachean- uloita to Sorvespor!- Hanvem aikolam tea tumchea garannea pormannem Hanv tumkam vagoitolom.
29. Lôkgonnti kelea tedna vis vorsam ani voir aslolim tumi sogllim, Mhojer gunngunnleant tim tumi, tumam-somestanchim moddim heach oronneant poddtolim.
30. Soput diun tumkam sangtam: jea desant tumkam pavoun tthikoitolom mhonn Hanvem soput gheun bhas dil'li, tea desant tumi, Jefunnechea puta Kalebak ani Nunachea puta Joshuak kaddun, bhitôr sorchinch nant!
31. Tumchea bhurgeank koidi kortole oxem tumi mhonnllam, punn hanv tankam, zo ganv tumi nakarla, tea ganvant vhortolom ani thoim tim aplem ghor kortolim.
32. Tumi oronneant mortoleat.
33. Ani tumche put hea oronneant, firtea gonvlleam porim challis vorsam jietole, ani tantlo nimanno monis moro-sor tumchea patkanchem farikponn ditole.
34. Tea desachi khobor kaddunk tumkam challis dis lagle; êk dis ek voros koxem dhôrun, challis vorsam porian hea oronneant tumchea patkancho bhar tumi vhortoleat ani Mhaka patt-korop kitem tem tumkam somzotolem."
35. Hanvem, Sorvesporan, oxem mhollam. Mhojer kolpol'li tê noxttê porjê kodde Hanv hê bhaxen choltolom. Hea oronneant tancho vinas zatolo, hanga tim sogllim mortolim.'
36. Je monis bhedi koxe, Moizesan to ganv topasunk dhaddlole, tãnnim vankddi khobor haddli, hea khatir porza Sorvesporacher gunngunnunk pavli. Ani, tea pasot, Sorvesporantancher pidda dhaddli, ani te mele.
38. Bhedi koxe, bara gel'le tantle doguch, Joshua ani Kaleb vanchle.
39. Sorvesporan kitem mhollem tem Moizesan porjek sangtôch, ti borich khontovli.
40. Dusrea disa, bhov sokallim, porjen dongor-ganv bollan gheunk tozvit keli; tinnem mhollem, 'Devan amkam bhasaila tea ganvant vochunk ami toiar asanv. Amchem patok kobul kortanv.'
41. Punn Moizesan tankam mhollem 'Tôr, atam tumi Sorvesporachii adnia kiteak môddtat? Tantum tumkam ies mellcho na!
42. Vochum nakat. Sorvespor tumchea sangatak na, ani dusman tumcher zoit vhortole.
43. Amalekitank ani Kanaanitank fuddo korun, tumi loddaien mortoleat; Sorvespor tumchea adarak ieunchona, kiteak tacho pattlav korunk tumi beporva kelea.'
44. Toripunn, Korarachi Arkpett ani Moizes moidanaruch astana, dongri-ganvant vochunk tankam kalliz zalem.
45. Amalekit ani Kanaanit thoim asle tãnnim porjechea angar ieun, tankam boroch mar dilo, ani Horma ganvant pavo porian tanchê patthik lagle.
