1. Sinai Dongrar Sorvespor Moizesa kodde uloilo tedna, hem zaun aslem Aaronachem ani Moizesachem kuttumb:
2. Aaronak choug put asle: malgoddo Nadab; Abihu, Eleazar, ani Ithamar.
3. Hankam soglleank iadnik koxe makhlole,
4. punn Nadab ani Abihu, hannim opovitr uzo Sorvesporak bhettoilo dekhun, Sinai Oronneant Sorvesporan tankam marun uddoile. Hankam bhurgim naslim, mhonnttôch, Eleazar ani Ithamar he dog-ui, Aaron jivo aso-sor, iadnikachi zhutti palltale.
5. Moizesa kodde uloun Sorvesporan mhollem:
6. Aaron iadnikachi seva korchê khatir, Levichea kullak ektthaim korun tachê mukhar dovor.
7. Zomatichea Tombu mukhar tacher ani ak'khê sobhecher ghal'li asa ti zobabdari tãnnim Mattvachi seva korun apnnancher gheunk zai.
8. Zomatichea Tombuchem sorv saman tanchea hatant asunk zai; Israelachea putancher ghal'li asa ti zobabdari tãnnim Mattvachi seva korun apnnancher gheunk zai.
9. Tunvem Levitank sarkech Aaronak ani tachea putank bhettounk zai. Israelachea putamnim taka tanchi bhettovnni korchi.'
10. Aaronak ani tachea putank tum iadnikanchê zhuttiek vinchun kaddtoloi, ani dusro konnuch ti pallunk fuddem sorta taka jivexim martole.'
11. Sorvesporan Moizesak mhollem:
12. Levichê kullieche soglle atam mhoje zatole. Ejiptantle soglle malgodde hanvem marun uddoile tedna, dor Israel-kuttumbantlo malgoddo put, toxench zonavorantlem poilem por, mhakach to bhettoun ghetolo. Punn atam, Israel-malgoddeanche boldek Levichea kullache soglle mhoje. Hanv Sorvespor.'
14. Sinai Oronneant, Sorvesporan Levichea sorv kullam ani kuttumbantleam, eka mhoineachea ani voir purus bhurgeak mezun gheunk Moizesak hukum' dilo,
16. ani Moizesan toxem kelem.
17. Levik teg put asle: Gershon, Kohat ani Merari, ani hea kullanche te vhoddil zaun aslet. Gershonak dog put asle: Libni ani Shimei; Kohatak choug put asle: Amram, Izhar, Hebron, ani Uzziel; ani Merarik dog put asle: Mahli ani Mushi. He tea nanvanchea kullanche vhoddil zaun asle.
21. Gershonachem kull Libni ani Shimei hanchim kuttumbam atthaptalem.
22. Eka mhoineache ani hachê voir piraieche, soglle mellun, sadde-sat hozar mezle.
23. Hem kull Zomatichea Tombuchê ostomtek ani tachê patthlean thikann korun aslem,
24. ani tacho mukheli Eliasaf, Laelacho put.
25. Hea Zomatichea tombu vixim tanchi zobabdari: tachem bhitorlem dhampnnem, bhailem dhampnnem, daracho podd'ddo,
26. bhonvtonnichea oddpache podd'dde ani vedi, ani oddpachea daracho podd'ddo- hem sogllem tanchea hatant aslem.
27. Kohatachem kull Amram' , Izhar, Hebron, ani Uzziel hanchim kuttumbam atthaptalem.
28. Eka mhoineache ani odik piraieche, soglle mellun, atth hozar ani soixim zannank mezle.
29. Hem kull Zomatichea Tombuchea dokhinnechê vatten tharoun aslem ani
30. Elizafan, Uzzielacho put, tacho mukheli aslo.
31. Korarachi Arkpett, mez, divea sthan, vedi, Povitr Zagear iadnik vapurtat tim povitr aidonam, ani Bhov Povitr Zageacho podd'ddo. Hem sogllem tanchea hatant aslem, dekhun tachi zobabdari.
32. Eleazar, Aaron-iadnikacho put, Levi kullacho mukheli. Ani Povitr Zagear seva korit title-i tachê khal asle.
33. Merarichem kull Mahli ani Mushi hanchim kuttumbam atthaptalem.
34. Eka mhoineache ani odik piraieche, soglle mellun, sov-hozar-don'xim mezle.
35. Hem kull Zomatichea Tombuchê ut'torek thikann korun aslem, ani Zuriel, Abihailacho put, tacho mukheli zaun aslo.
36. Zomatichea Tombuchê bhonvtim, faskeô, tancheô khambleô, danddiô, khambe ani tanchim peddam, ani urlolem samonn tanchea tabeant aslem dekhun tachi zobabdari.
37. Têch porim, bhailea oddpache khambe, peddam, kochor ani dhoriô tanchea tabeant asleô.
38. Moizes ani Aaron, ani hache put udentek aslolea Zomatichea Tombuchea fuddlean thikann korun asle. Israel-porjen Povitr Zagear man-nomoskara vixim korunk zai aslem, title aichi tankam zobabdari asli. Anink konnachean tem korunk zainaslem, na tôr, tacho jiv vetalo.
39. Eka mhoineachê ani odik piraiechê, ak'khea Levichea kullant, soglle mellun, bavis hozar mezle. Hem sogllem Sorvesporan Moizesak formailolem tê porim kelem.
40. Sorvesporan Moizesak mhollem: 'Israelache soglle malgodde mhoje. Tôr, Israel-porjentle sogllle, eka mhoineache ani odik piraieche malgodde mezun ghe. Punn hanche boldek, hanv sogllea Levitank mhoje mhonn tharaitam! Têch porim, zonavoranchea-i malgoddeam vixim: Levitanchea zonavoranche soglle malgodde mhoje.'
42. Sorvesporan sanglolê tê porim, Moizesan soglle Israel-malgodde,
43. eka mhoineache ani odhik, soglle mhonnon, bavis hozar don'xim teat'tôr (22,273) oxe mezle.
44. Sorvesporan Moizesak mhollem:
45. Atam, Israelachea sogllea malgoddeanchê boldek, sogllea Levitank mhoje koxe bhettoun di; toxench, hanchea zonavoranchim malgoddim poram, Israelachea zonavoranchê boldek.
46. Israelache malgodde Levitanchea poros, don'xim teat'tôr (273) oglle asat mhonnttôch, he tuvem porot vikte gheunche poddlei.
47. Tôr, eka-eka patthlean, panch rupeache duddu farik korche poddtat,
48. ani he duddu Aaronak ani tachea putank di.'
49. Moizesan pallo dilo,
50. ani tannem ek hozar tin'xim pansoth (1,365) rupeache duddu porjê-koddche ghevun,
51. te Aaronak ani tachea putank dile.
