1. Sorvesporan Moizesak mhollem:
2. Aaronak sang, "Tum divea-sthanancher sat divliô dovortana, tancho uzvadd fuddlean poddta toxeô teô dovor. " '
3. Aaronan haka pallo dilo, ani divliô divea-Sthanacher fuddlean dovorleô.
4. Sorvesporan Moizesak dakhoilolê tê porim, voir thaun sokol, diveasthan pêttlolea bhangarachem kel'lem.
5. Sorvesporan Moizesak mhollem,
6. Levitank her Israel-porjê modle kuxin kadd ani xud'dhi kôr,
7. hê porim: tancher xud'dhichea udkacho xinvôr mar, ani soglle mang tasunk lai, ani aplim vostram dhuvum-di. Ani riti pormannem te xud'dh zatole.
8. Magir, te êk paddo gheun ietole, ani tel misôll kel'lem tharailolem pitt, orovachê bhettek; ani farikponnachê bhettek ani ek boil gheunk zai.
9. Uprant, sogllê Israel-porjek ekttai, ani Levitank Sorvesporachea Zomatichea Tombu mukhar ube kôr.
10. Israel-porza Levitanchê tokler aple hat dovortoli,
11. ani Aaron tankam, Israel porjechem ek kherit dennem koxem, mhojê sevek bhettoitolo.
12. Levit tea don boilanchê tokler aple hat dovortole; êk farikponnachê bhettek vetolo, ani dusro hom'-bhettek; hê porim Levitanchi xud'dhichi rit zatoli.
13. Mhaka, ek kherit dennem koxem, tankam bhettoi; ani Aarona ani tachea putam khal te astole.
14. Hê porim Levitank bakiche Israel porjê modle kuxin kadd, ani te mhoje zatole.
15. Ani tanchi xudh'di korun, ani mhaka tanchi bhettounni zatôch, te mhojea Zomatichea Tombuchê sevek purte zatole.
16. Sorv Israel-malgoddeanchê boldek hanvem tankam magun ghetleat, ani te mhoje-ekleachech.
17. Ejiptant hanvem sogllea malgoddeank marle tedna, dor Israel ghorabeantlo malgoddo hanvem mhozoch koso bhettoun ghetlolo; têch porim zonavoram modlo malgoddo.
18. Atam hanv tanchi bodli kortam ani Levitank mhoje korun ghetam,
19. ani Israel-porjechem ek dennem koxem, tankam, Zomatichê Tombuchê sevek Aaron ani tachea putanchea tabeant kortam. Israel porza mhojea Tombu-xim chodd lagim sorlear tankam vaitt zatolem; dekhun, Aaronachea ani tachea putanchea asrea khal, Levit thoim seva kortole.'
20. Sorvesporan Moizesak formailolem tê porim, Moizesan, Aaronan ani sogllê porjen Levitank Sorvesporak bhettoile.
21. Levitamnim apli xudh'di keli ani vostram dhulim, ani Aaronan tankam Sorvesporak, ek kherit dennem koxem, bhettoile. Tannemt anchi xud'dhichi rit pall'li.
22. Sorvesporan Moizesak formailolem titlem-i porjen kelem. Mhonnttôch, Aarona ani tachea putam khal, Levit Zomatichea Tombuchi seva korunk purte zale.
23. Sorvesporan Moizesak mhollem:
24. Ponchivis vorsam bhortôch dôr Levit mhojea Zomatichea Tombunt seva kortolo,
25. ani pon'nas bhortôch to visôv bhôgtolo.
26. Tea uprant, tachean aplea sangati-Levitank mozôt korunk zata, dusreachea zagear koso punn aplêch ostongim koso nhoi. Hê porim Levitanche kaide tum tharaitoloi.'
