1. Kora, Izharacho put, ani Kohatachea Levitantlo, Moizesachea mukhelponna virudh kolpolo. Haka, Reubenachea kullantlea tegamnim: Datan ani Abiram, he dog-ui Eliabache put; ani tisro On, Peletacho put; ani tea bhair, Israel porjentlea oddexim zonnamnim tenko dilo, he soglle porjen vinchun kaddlole nanv-voste mukheli zaun asle.
3. He Moizesa ani Aarona mukhar ektthovle, ani tãnnim mhollem,'Tumkam chodd podvi choddlea! Porjentle soglle Sorvesporache zaun asat, ani Sorvespor amchea sangatak asa Tôr, Moizes, tunch eklo kiteak Sorvesporachê porjê voir sortai?'
4. Hem aikun, Moizes dhornir sorpottlo ani tannem magnnem kelem.
5. Uprant, tannem Korak ani hachea sangateank mhollem, 'Faleam sokallim, konn aplo tem Sorvespor dakhoun ditolo; zo khas tacho, mhonnche, zaka tannem vinchun kaddla, taka vedi-xim lagim sorunk ditolo.
6. Falea sokallim, tumi ani tumchea patthlean asat teô ujeacheô kaili gheun ieat, tantunt inglle ani dhump ghalat, ani vedi-xim ieat. Ani Sorvesporan konnak vinchun kaddla tem gomtolem. Tumkam, Levitamnô, chôdd podvi choddlea!'
8. Moizesan Korachea nanvan mhollem, ' Aikat, Levitamnô!
9. Sorvesporan, Israelachea Devan, tumkam heram modle vinchun kaddun, aplea Tombunt ieun seva korunk dilam, ani aplê porjechi-i seva korunk tumkam apoileat tem dennem tumkam êk kirkoll-lhan vost oxem dista?
10. Tumkam ani heram Levitank ho man favo kela- ani atam, tumi iadnikponnak-ui axetat!
11. Tumi Aaronak xinn kortat to khoreponnim Sorvesporakuch xinn; tum ani tujê sangati soglle Sorvesporacher kolpoleat.'
12. Magir, Moizesan Datan ani Abiram hankam apounk dhaddle, punn tãnnim mhollem, 'Ami ieunche nanv!
13. Amkam hea oronneant marunk, tunvem amkam Ejiptantle bhair kaddleai tem puro nhoi? Tea voilean, amkam tuji sot'tea dakhounk sôdtai?
14. Tunvem amkam sufôll ganvant haddunk naim tem khorem, ani xetam-molle amkam khoinche dileai! ani atam amkam fottounk sôdtai. Na, ami ieunche-nanv!'
15. Moizes tancher ekdom' ragar zalo, ani tannem Sorvesporak mhollem, 'He monis haddtat teô bhettô gheum naka. Tankam hanvem kãich vaitt korunk na; ek legun tanchem gaddum hanvem ghevunk na!'
16. Moizesan Korak mhollem, 'Faleam, tum ani tuje oddexim patthlav-korpi Sorvesporachea Tombunt ieunk zai; Aaron thoim astolo.
17. Tumchê bhitorlo ek-eklo aplem dhumpel ghevun ietolo ani tantunt dhump ghalun vedir bhettoitolo.'
18. Hê porim zonn-eklean aplem dhumpel ghetlem, tantunt inglle ani dhump ghalun, te Moizesa ani Aarona sangata, Zomatichea Tombuchea darar ube ravle.
19. Magir, Koran sogllê porjek ektthaili, ani Moizesak ani Aaronak fuddo korun, Zomatichea Tombuchea darar ravle. Sott korn Sorvesporacho porzôll thoim dakhol zalo sogllê porjê mukhar.
20. Ani Sorvesporan Moizesak ani Aaronak mhollem,
21. Tumi matxe hea mon'xam sorxile pois sorat, ani hanv khinna bhitôr tancho bhosm kortolom.'
22. Punn Moizes ani Aaron dhornir sorpottle, ani tãnnim mhollem, 'Sorvespora, tum sorv jivitachi zhor. Eklean pap adartôch, sogllech porjecher tum ragar zatai?'
23. Tedna Sorvesporan Moizesak mhollem
24. "Kora, Datan ani Abiram hanchea tombu sorxile sogllê porjen pois vechem mhonn tankam sang."
25. Mhonnttôch, Moizes, porjechea mukheleank gheun, Datan ani Abiram hanchê-xim gelo.
26. Ani Moizesan porjek mhollem, 'Hea khottea mon'xanchea tombu sorxile vegim pois sorat, ani koslech vostuk hat lavum nakat, na tôr, tanchea patkam khatir tumi nanch zaun vetoleat.'
27. Tor, Kora, Datan, ani Abiram hancheam tombu sorxili koddsorun, porza pois geli. Datan ani Abiram bhair sorle ani aplea tombunchea darar ube asle, ani tancheô bailô ani bhurgim-i tanchê-xim aslim.
28. Porjêkodde uloun, Moizesan mhollem, 'Hea vorvim tumkam gomtolem, ki Sorvesporan oxem korunk mhaka formailam, ani mhojêch ostongim hanvem tankam kãich korunk na.
29. Devachi khast nhoi astana, soimbachench moronn tancher ailolem zalear, mhojê vixim Sorvesporachi maniotai na oxem dakhol zatolem aslem.
30. Punn kednanch ghoddunk naslem tem Sorvespor korta, ani zomin ukti korun tankam ani tanchea soglleank gillun vhorta, ani te jivech astana mel'leanchea sonvsarant pavtat zalear, hea mon'xamnim Sorvesporak pois kela mhonn tumkam dakhol zatolem.'
31. Oxem uloun sompona fuddem, Datan ani Abiram hanchea pãia khal zomin ukti zali
32. ani tankam ani tanchea kuttumbank, toxench Korak ani hancho patthlav-korpeank, ani sogllem tanchem kitem aslem tanchea sangata, jivech gill'le.
33. Tôr, te, aplem kitem aslem titlem-i gheun, jivech mel'leanchea sonvsarant gele. Ani tanche voir zomnin aplem tondd dhamplem, ani te nattak zale.
34. Sogllê Israel-porjen hem dekhlem, ani bob marun, zollim-mollim dhanvunk lagli, mhonnun, 'Polleiat, zomin ghoddiê amkam-i gillit!'
35. Tea uprant, Sorvesporan uzo dhaddlo, ani dhump bhettoil'lo tea oddexim mon'xank lasun uddoile.
36. Magir, Sorvesporan Moizesak mhollem,
37. Te hulpon meleat tanchê modlim tim pitullchim ujeachim dhumpelam kadd mhonn Aaron-iadnikachea putak, Eleazarak sang, ani tantle kollxe khoinsor-ui ximpddai, kiteak tim dhumpelam povitr aidonam.
38. Tim dhumpelam Sorvesporachê vedir bhettoilim tedna tim povitr zaleant. Tanchea patkank lagon hea mon'xancho jiv kaddla, tanchim dhumpelam kadd ani tim dhaddaun patiô kôr ani vedik ghal. Israel-porjek hi êk xiddkaunni zaun astoli.'
39. Hea pormannem Eleazaran tim ujeachim dhumpelam kaddlim, boddoun tancheô patiô keleô ani vedik ghaleô.
40. Ani Israel porjek hi êk xiddkaunni koxi zali, ki Aaronachê sonstintlea bhair anink konnakuch Sorvesporachê vedir dhump bhettounk puttovna. Na tôr, Kora ani tachea mon'xam porim tacho bhosm zatolo. Ani, Moizesa udexim dil'lea Sorvesporachea hukumak pallo diun, hem sogllem Eleazaran kelem.
41. Dusrea disa, soglli Israel-porza Moizesa ani Aarona virudh gunngunnunk lagli, ani tinnem mhollem, 'Tumi Sorvesporachea lokak jivexim marleat.'
42. Te thoim Moizesacher ani Aaronacher nixed marunk ektthovlea uprant, te Tombu sorxilean voll'le ani ho kupant dhamplo, ani Sorvesporacho porzôll tankam dakhol zalo.
43. Moizes ani Aaron vochun Tombu mukhar ube ravle,
44. ani Sorvesporan Moizesak mhollem,
45. Tumi hea loka sorxile kuxin sorat, ani hanv tancho nas kortam!' Te dog-ui dhornnir sorpottle,
46. ani Moizesan Aaronak mhollem, 'Tujem ujeachem dhumpel gheun, ani tantunt vedivele inglle ani dhump ghalun, vegim porjechi xudh'dhi kôr. Vegim! Sorvesporacho rag boroch pettla, ani pidda-pest suru zali.'
47. Aaronan pallo dilo, ani aplem ujeachem dhumpel ghevun to porjê modem dhanvlo. Ani pidda suru zali tem polleun, ujeant dhump ghalo ani porjechi xudh'dhi keli.
48. Hea vorvim ti pidda bond zali, ani to jiveam ani mel'leam modem ubo aslo.
49. Korachea lofddeank lagon mel'le tanchê bhair, hê piddent chovda hozar-satxim lôk morun gelo.
50. Pidda bond zalea uprant Aaron Zomatichea Tombuchea darar Moizesa sorxim ailo.
