1. Job hê porim uloilo:
2. Khorench, tumi sangtat toxench tem, mhonnun hanv zannom: apunn promannik mhonn konnanchean Deva mukhar nitt ubo ravum iet?
3. Tachê kodde to vivad korunk sôdit zalear, Tachea hozarantlea eklea prosnank porian tachean zobab diunk zaunchem na.
4. Gineanan sorv zannar, podven sorvbollixtt: Tachê add ubo ravunk konnank tori xoklam zait?
5. Xiddkavnnê xivai To dongor haloita, êkê svatêvele dusrê svater vhorta; Ani ragan To tancho bhôsm korta.
6. To prithum' haloita ani tiche soglle khambe thorthoraita,
7. To hukum' ghalit zalear, suria udenastana ravta, ani dhanknnem ghalun nokhetrancho porzôll to lipoita
8. Tannem ekleanuch ontrall-monddôll vistarli, ani Somdirachim unch lharam aplea paiam pondak dovorlim.
9. Sopt-rixi ani Mrig-rixi, Krit'tika ani Dokhinnechim noketram Tannench keleant.
10. Tachim kortutvam xrextt-vortim, somzonnechê tankiê bhailim. Tachim vismitam mapa-mezpa bhailim.
11. To mhojê kuxichean veta, tori mhojean taka polleunk zaina; To fuddem veta, ani mhaka zollkhona.
12. To kitem kaddun vhorot zalear, konnachean taka addavunk zait? Vô "Tum kitem kortai"- oxem konnTaka mhonnott?
13. Devacho rag thambona toslo: Rahab hea somdirantlea rakhosak adar ditolea aplea dusmanacho Tannem bhosm kelo.
14. Oxem tôr favo toslea utramnim taka zobab diunk, koxem mhonn mhojê lagim ghoddot?
15. Hanv niropradhi aslear legit, Taka zobab diun koslo mhonn faido? Mhaka aropi thoroupea lagim, mhojean fokt kaklut vinoum ieta.
16. Hanvem Taka apoilo ani Tannem mhaka zobab dilo-i zalear, To mhojea talleak kan ditolo mhonn mhaka koxi khatri asot?
17. Koslench karonn nastana mhaka chirddunk ani mhoje ghave vaddounk to modd dhaddun dita.
18. To mhaka askar-suskar gheunk dina tannem mhojem jivit koddu kelam.
19. Tacher hanvem boll vapurchem? Polle to kitlo mhonn bollixtt! Hanv nitisobhent vochum? Punn, taka thoim ieunk konn formavnni dhaddtolo?
20. Hanvem mhakach promannik lekhlear, mhojea tonddinch mhaka guneanvkar korit. Hanv niropradhi aslearui Tachean mhaka khotto dhôrum-ieta.
21. Hanv khorench niropradhi? Punn, mhaka mhojench khoreponn na Ani mhaka jievpachi ubgonn ailea.
22. Mhaka jievpachi ubgonn ailea, kosloch faido na. Zaum niropradhi vô opradhi Dev amcho bhosm kortoloch.
23. Jedna êk niropradhi monis okosmat morta, tedna Dev tacheô moskoreô korta.
24. Ho sonvsar Devan noxtteanchea hatan dila sogllea nitidaranchi tannem nodor sompoilea ani zôr tem Devan korunk na tôr konnem kelam?
25. Eka dhanvpea poros odik vegan Mhoje dis dhanvtat Te pollon vetat, tantlo ekui boro na.
26. Eka xikaricher ghonnin zhompoi marlolea bhaxen Eka vegan dhanvpi hoddea bhaxen mhoje dis bolanddtat.
27. Hanvem hanstea mukhamollan mhojeô tokrari visrunk sôddlear, mhoje soglle upodre portun ietat ani mhaka bhenkddaitat.
28. Mhojea dukhim vixim chintun, mhaka bhirant dista; Tum mhaka guneanvkar korchonaim mhonn mhaka khatri asa.
29. Hanv opradhi thorlom mhonnttôch hanvem kiteak porva korpachi?
30. Borfachea udkan nhalear, kharan porian hat dhulear,
31. Dev mhaka xennachê gairint uddoita mhojea kopddeank legit mhoji loz dista.
32. Dev mon'xa sarkho zalolo zalear, mhojean taka zobab dium ietalo. Niti-ghoran vochun amchea vad-vivadancher nirnnoi gheunk zatalo.
33. Amchê modem modesti zaunk Devachi ani mhoji nit korpak konnuch na.
34. Deva, Mhaka khast lavpachi puro korchi Tuje thorthore kuxik kaddche.
35. Hanv bhiena, mhojea svotachea kallzak vollkhotam dekhun hanv uloitam.
