1. Uprant Naamathacho Zofar uloilo. Tannem mhollem:
2. Hea khatir mhojim chint'na, tuka zobab diunk mhaka boll kortat; ani teach pasot mhoji sonsnnikai ibaddlea.
3. Mhojea khastichi xiddkavnni hanvem aikolea ani mhojem ginean tuka portipall korunk mhaka sfurti dita.
4. Kallachea orombhak thaun ani mon'xakull hea sonvsarant ailem tê meren, noxtteanchem zoit fokt thoddeach khinnanchem.
5. Vaittovea mon'xachi khuxalkai chodd kall togona mhunnon tuka khobor na? Ani patkiachi khuxalkai ghoddi bhor togta mhonn tum noklloi?
6. To kedo-i vhoddlo monis zait, ontrolla dixen voir sorot ani tachem mathem mollbak tenkot
7. To xenna porim nanch zatolo ani taka polletale te "to khoim asa?" oxem mhonnttole
8. To eka sopna porim nanch zatolo ani eka ratchea disnnea porim ubun vetolo.
9. Taka sodanch polletole dolle taka kednach pollenvchenant, ani tachem ghor kednach tacher porot nodor ghalunk pavchemna. Tachea putamnim goribank porot dinvchem poddtolem.
10. Ani tache hat tachi osoktai tankam porot ditole.
11. Tachim haddam tornnattponnachê xokten bhôrlolim aslim tim atam tachea vangdda dhullint asant.
12. Noxtt taka itlem borem lagtalem, ki to magir khaunchê khatir thoddem aplê jibe pondak samballun dovortalo.
13. Uprant to tem aplê talliek laun khelloitalo.
14. Oslem jevonn tachea pottant vetalem ani sorpachea vikha porim vaurtalem.
15. Tannem gill'lloli girestkai atam to vonkta. Dev tachea pottantli ti bhair kaddtta.
16. To monis sorpachem vikh chinvtalo ani sorpachea pileachi jib taka jivoch marun uddoita.
17. Zoitunachea telacheô nodi vô dudan ani mhonvan vhanvpi vhall pollovpak to jivo urcho na.
18. Aplea vauracho fôll porot ditolo ani to chakunk pavuncho na, aplea dhondeacho faido bhôrunk to urcho na.
19. Kiteak, tannem goribank pillun sôddlole, ani tannem ghorank pillun soddlolem bandchê suvater tim nadoilolim.
20. Tachi axea kednach puri zai nasli. Dekhun tachi dovlot chodd kall tôgunk na.
21. Tachê axek kitench chukonk naslem ani atam tachi dovlôt urchina.
22. Tachê lagim sogllem astanaim konixttai taka veddho ghaltoli ani nirbhag sogllea bollan tacher denvtolem.
23. Dev tacher aplo zollto xirap ghaltolo ani tachê kuddir bannacho pavs rokhoitolo.
24. Loknnachê torvarichea ghansantlo to vattovlo zalearui kanxeache dhonnuxie taka aspas toptole.
25. Tachê fattintlean bhalo bhair sortolo tachê pintachê potientlean ek chokchokit tolvar bhair ietoli ani tacher kampero ietolo. ani sogllo liplolo kallôkh taka girasunk ravtolo.
26. Mon'xachea hatan pettunk naslolo uzo taka girastolo, ani tachea tombunt urlam titlem-i to lasun uddoitolo
27. Sorg tachim noxtteponnam uktim kortolo ani sonvsar tachê virudh govai ditolo.
28. Devachea ragachea disa, hunvara porim tachea ghorantli aspôt vhanvun vetoli.
29. Ho xevôtt noxttea mon'xacho tachea vantteak Devan taka sthapla to.
