1. Tedna vadollantlean Sorvesporan Jobak zobab dilo:
2. Konn tôr to aplea nennar ani polkea utramnim mhojê zannvaiecher prosn korunk sôdtato?
3. Eka vira porim penkttak band ani ubo rav ani hanv kortolea prosnank zobab di!
4. Sonvsarachi buniad ghaltalom tedna tum khoim asloi? Tum itlem zannaim zalear mhaka tachê vixim sang.
5. To kedo zaunk zai to akar konnem thoraila! Zannaim tum? Tache avoir mezpachi pott'tti konnem patllaili?
6. Sonvsarak samballta tea khambeank mullak kitem samballun dhôrta? Tachea konxeacho fatôr konnem bosoila?
7. Sokallchea fantodd'ddechea noketranchea gaionanchea nadar ani Devachea putanchea khuxalbhorit zoizoikara sangata?
8. Dhortorechea kusveantlean futtun bhair sortolea somdirak, Hanvem kupamnim guttlailo
9. ani kallokhachea falliamnim revddailo tedna, Hanvem taka ximô ghaleô
10. ani darvontte ani addambe ghale tedna, daram bhitôr taka konnem attapun dovorlo?
11. Hanvem mhollem: "Hanga porian ie: hea fuddem xim utrum naka; hangasôr tujim orixtt lharam futtunk zai."
12. "Prithumecheô ximô ghôtt korunk ani khottea mon'xank thoinche dhanvddaunk
13. tujea jivitant kedna tori sokallchea pahrak tunvem hukum' ghalai vô fantea-pahrak tachea zagear dhaddlai?
14. Eka xik'kea khala matiê porim taka bodol'lam ani kopdde rongoitat toxem taka rongoilam,
15. ani khottea mon'xancho uzvadd na kela ani marunk ubarlolo pavllo môddun uddoila.
16. Doriachea zhorea-xim porian tum pavlai? vô Somdirachea tollak tum bhonvlai?
17. Mornnache darvontte tuka ukte zaleat? Mornnachê Savllechim daram tunvem dekhleãi?
18. Prithumechea ximanchi mat tori tuka khobor asa? Hem sogllem tum zannai zalear, Sang mhaka.
19. Uzvaddachea ghorachi vatt khoim asa? ani kallôkh khoim ravta?
20. Tanchea khaxa zagear vochun tujean tankam rosto dakhounk zata? vô tim ravtat tea ghorachê vatter tujean tankam gholum ieta!
21. Tum zannaim karonn tum tedna tanchê borabor zolmak ailoloi, Atam tum bhorpur mhataro zala astoloi!"
22. Him' santtovta tea zagear tum pavlai? Korveanchea pavsacho santto khoim asa ti tuka khobor asa?
23. Tankam hanv akantachea vellar loddai ani zhuz choltana vapurchê khatir rakhun dovortam.
24. Zoglavnnem khoinchê dixen dhanvta, khoim thaun tori udentecho varo funkta?
25. Pavsachea megha khatir konn patt kantoita ani goddgoddak konn vatt nitoll korta?
26. Tea udexim konnuch jiena toslea zagear ami mon'xachem ghor-dar naslolea oronneant pavs poddom-so korta.
27. Konn eksurea ani paddong zageanchem somadhan korta ani tanel'lê zomnintlean tonn kirlaita?
28. Pavsak bapui asa? Vô dovachea thembeank konn zolm dita?
29. Borof khoinchea kusveantlean bhair sorta? Sorgantlea himak konn zolm dita?
30. Jedna udok fatra bhaxen ghott zata ani kholaiecho voilo vantto borfeta?
31. Tujean Plaidisacheô sanklleô bandunk zatat? Vô Orionacheô vadiô tujean sôddunk zatat?
32. Rutu fattlean rutu tujean neamit dhaddum-ietat? Vô vhoddlea Ansvelak ani tachea pilank vatt dakhoum-ieta?
33. Sorginchea kaideanchi tuka khobor asa? Tujean tacho odhikar sonvsarak lagu korunk zata?
34. Tuka pavsachea lottan bhizounchê khatir Tuzo tallo kupam meren tujean ubarum ieta?
35. Tujea hukumak zoglavnnem kan diun "hanv hanga asam!" oxem mhunnot?
36. Suknneak konnem ginean dilam ani kombeak konnem zannvai dilea?
37. Konnachean protek kup barkaien mezunk zata ani sorgantlim udka aidonam votunk zatat?
38. Dhull datt zata pasun ani zomnicheô verô bhorta pasun?
39. Tum xivinnink xikar haddun ditai? Tum xivachea poranchi bhuk martai?
40. Jedna tim aplê dholint okhunddim bostat ani zompamnim pallti korun ravtat?
41. Jedna kanvlleachim poram rôddun Devak ulo kortat ani aplo gomtto voir kaddun jevonn sôdtat tedna kanvlleak konn jevonn santtoita?
