1. Joban Sorvesporak zobab diun mhollem:
2. "Tum Sorvpodvedar mhonn hanv zannom: Tum ievjitai titlem-i tum korunk xoktai.
3. Konn zait to, khorê zannvaiê viret, tujê ievzonneancher kallok ghaltato! Mhojea gineanank atthapunk zaina tosleô vostu hanv uloilom, Ani mhojea somzuta bhair aslolea ojapancho thav gheunk hanv vavurlom.
4. (Upkar korun mhojem aik ani mhaka uloum di. Hanv tuka prosn vichartam ani tum mhaka zobab di.)
5. Adim aikunuch hanv Tuka vollkhotalom; punn atam mhojeach dolleamnim hanvem Tuka pollelo dekhun, hanvem mhonnlolem tem sorv pattim ghetam,
6. ani dhullint ani gobrant, mhaka poschetap zata."
7. Joba lagim uloun somplea uprant, Sorvesporan Temanchea Elifazak mhollem: 'Mhojea chakra Joba bhaxen tumi mhojea vixim sot ulounk nant dekhun mhaka tuzo ani tujea dogui ixttancho ekdomuch rag aila.
8. Atam sat boil ani sat menddre gheiat ani mhojea chakra Joba-xim vhorat ani tumchê khatir ek bolidan bhettoiat. Job mhozo chakôr, tumchea pasot magtolo. Hanv tachea magnneank zap ditolom ani tumchea murkheponna khatir hanv tumka xikxa diunchona. Mhozo chakor Job mhojê vixim sot uloilo toxem tumi ulounk nant.'
9. Temancho Elifaz, Shuacho Bildad ani Naamatcho Zofar gele, Sorvesporan sanglolem toxem tannem kelem ani Sorvesporan Jobachem magnnem svikarlem.
10. Joban aplea teg-ui ixttam khatir magtôch, Sorvesporan Jobachê lagim adim asloli dovlôt taka don pavttinim dili.
11. Tache soglle bhav, bhoinneô, tache adle soglle ixtt taka mellonk aile ani tachea ghorant jevonn jevle. Devan tacher dhaddlolea sogllea odruxtta khatir tãnnim tachea dukhant vantto ghetlo ani taka bhuzvonn dili. Dôr eklean taka rupeacho êk nanno ani bhangarachi êk mudi dili.
12. Ani Sorvesporan Jobachea novea bhesacher adlea poros odik axirvad ghalo. Ani atam chovda hozar xelliô, sôv hozar unttam, ani êk hozar boilanchim zotam ani êk hozar stri-gaddvam tachê lagim aslim.
13. Tea bhair taka zolmole sat put ani tegi dhuvô;
14. poilê dhuvechem nanv Parvinn, dusrêchem Casia, ani tisrêchem Maskara.
15. Ak'khea ganvant Jobachea dhuvam itleô sobit anink bailô nasleô. Ani tanchea bapain putam borabor tankam-i daijiponnant vantto dilo.
16. Ani hachê uprant Job anink ekxem challis vorsam jielo ani tannem chouthê pinddkê porian aplea bhurgeanchim bhurgim pollelim.
17. Uprant lamb auk jieun, mhatarê piraier Job melo.
