1. Dekhun Job, upkar korun chotraien aik, ani hanv sangtam titleacherui lokx dovor.
2. Atam jedna hanv tondd ugoddtam ani mhoji jib mhojea talleak lagun hanv mhojea kallzantlim zannvaiechim utram uloitam.
3. Mhoje ontt sogllea promannikponnan uloitole. Tujean zata zalear mhojem sarkhem na mhonn sangun di.
4. Devachea atmean mhaka rochla ani sorv bollixtachea svasan mhaka jivit dilam.
5. Tujean zata zalear mhaka zobab di tuje mud'de manddun, tum toiar rav!
6. Devachea fuddeant ami dogui eksarkhe Tujê porim mhaka-i matiecho kela
7. Dekhun mhoji bhirant tujer akant haddchina mhozo hat tujer nibran poddchona.
8. Khorench tum uloilam tem chukoinastana hanvem aikolam.
9. Hanv nitôll ani niropradhi, hanv nirmôll chuk naslolo!
10. Punn, mhojer ghuri ghalunk Dev nimitam sôdta ani mhaka eka dusmana porim vagoita.
11. To mhojea paiank sanklli ghalta ani mhojê halchalicher to nodor dovorta!
12. Punn Job, tum chuktai mhunnon hanv tuka sangtam khoincheai mon'xa poros Dev vhoddlo.
13. Tujea protek utrak zobab diunk na mhunnon tum Devak kiteak guneanvkari kortai?
14. Dev êk pautt êk bhaxen, dusrê pavtt dusrê bhaxen uloita torui tachea utrachi somzonni amkam mellona.
15. Aplê khattir khôl jemen Ratcho nhidlolo astana, Dev mon'xachea sopnant ani dixttaveant uloita.
16. Apleachim utram taka aikunk laita ani dorxonamnim mon'xak To bhensddaita.
17. Taka vaittantlo nivarchê khatir ani gorvantlo pois dovorchê khatir
18. Patallantlo tacho atmo rakhunk ani nixttur mornnantlo tacho jiv vattaunk
19. Mon'xacher koxtt pidda dhaddun ani tachim haddam thambonastana dukhin sonnsonnaun, Dev mon'xak xiddkaita
20. Ani kitlem-i suvadik jevonn asum tem taka vitteun portota
21. Tachi kudd nodrê mukar kusun veta ani tachim haddam disunk lagtat.
22. Tacho jiv mornnachê tonnir asa ani tachi kudd meloleanchea desant vochpacho vêll lagim pavta.
23. Mon'xak tachem kortovea dakovpi hozaramnim Devachea dutam modlo eklo ghoddiek tachea adarak pavtolo,
24. Devdut kaklutin sangtolo: Taka sôdd! To meloleanchea desant vochpacho nhoi taka jivo dovorpak mhaka muktidar meula.
25. Tachi kudd eka bhurgeachê kuddi sarkhi tornni-taji zatoli tache tornnattponnache dis novean portotole.
26. Apnnacher upkar kelolea Devak to magnnem kortolo anondan bhoron to argam ditolo. Dev tachem promannikponn novean mon'xak ditolo.
27. Hanvem patok adarlolem, neai-niti add hanv vaglam punn, Devan mhaka favo asli ti khast lavunk na
28. Tannem mhaka mornnantlo vattailo ani mhozo jiv porot uzvadd polletolo. Oxem to sobhemazar aplea sangateank apnnank favo zalolem taronn gavun porgôtt'tolo.
29. Polle, Dev heô soglleô vostu mon'xakullak portun-portun korta
30. Patallantlo tacho jiv nivarunk ani jietoleanchea uzvaddan taka porzollit korunk.
31. Job, atam hanv kitem sangtam tem aik vogi rav, mhaka uloum-di.
32. Punn tujem kitem sangpachem aslear mhaka zobab di, mhaka-i aikum-di. Tujem sarkem aslear aikon, khoxen ani umedim tujem sarkem asam mhunnon mandun ghetolom aslom.
33. Na zalear vogi rav ani mhojem aik hanv tuka khori zannvai xikoitolom.
