1. Temancho Elifaz uprant uloilo.
2. Khoincho xanno monis oslim polkim, vareavelim utram uloun, vad-vivad korit?
3. Kosleach upeogak poddona tea sobdamnim tannem aplo vad-vivad cholounk zait?
4. Punn tum Devachi bhirant nakartai Ani Tachê sorxilo pois sortai?
5. Tujem tondd khotteponn uloita ani tum fosoupachi jib apnnaitai
6. Tujinch utram tujer formonn martat, Hanv nhoi, Onttantlim bhair sorlolim utram tujer add govai ditat.
7. Devan dongor roch'chê adim soglleam poros poilo zolmololo monis to tum kai kitem?
8. Devachê sobhent tharailoleô ievzonneô tunvem aikoleat tôr? Mon'xam modem fokot tuka ekleakuch xanneponn favo zalam?
9. Ani zanna tachê poros tum kitem odik zannaim? Amkam somzonni asa tachê-on tuka kitli-xi asa?
10. Tujea paichea poros odik vorsam jielolo piklolea kensancho monis amchea borabor asa.
11. Hea Dev-bhuzvonnechea utrancher tujean durlokx korum ieta? Amchim xant dulob utram tum kiteak kanar ghenaim?
12. Kitlo mhonn tum ragan uchamboll zalai? Ani kiteak mhonn Tujea dolleantlean uzo bhair sorta?
13. Jedna tum tuzo rag Devacher ot'tai, tedna tujê jibevelean turturit utram bhair sortat.
14. Khoincho monis nirmôll zaum ieta? Ekê ostorek zolmololo konnui promannik asum ieta?
15. Dev aplea bhoktank legit patiena Tachê nodrê mukhar sorg vanxi legun nirmoll vostat.
16. Toxem zalear kitlo mhonn dusvaxi ani broxtt to udka porim noxtteponnam pieta.
17. Mhojem aik mhojê lagim tuka êk xikvonn asa mhozo svotacho onnbhov hanv tujea fuddean dovortam
18. Tech porim zannarancheô sangnneô jeô tanchea purvozamnim tankam lipounk nant.
19. Tankanch to dês dilolo ani porki monis thoim tanchê modem jieunk nant.
20. Sogllea aplea jivitant khotto monis tollmolltolo ani vollvolltolo. Darunn mon'xachim vorsam mezlolim astolim.
21. Tachea kanamnim akantacheô kinvcheô sadtoleô ani tachea dhadosponna vellar bhosm korpi tacher ghuri ghaltolo.
22. Kallokhantlean bhair sorpacho taka visvas na. Karonn khoim tori êk torvar tacho jiv kaddunk ravta mhonn to zanna.
23. Ani gid tachem moddem khavpak ravtat aplem nisontton lagim pavlam mhonn taka khobor asa.
24. Akromonnak toiar aslolea raza porim, kallokhi kall tacher akant haddta Nirbhag ani khônt tacher ghuri ghalta.
25. Karonn to Devacher hat ukolta ani sorvbollixtacho hukum' môddtta.
26. Ragan Apli tokli zokhun ani pengttam sazoun hott'ttan mosteponnan aplem voznadik dhal ubarun to Devachea angar zhuzunk dhanvta.
27. Tachem tondd sogllench fuglam ani tachim pengttam chorben mozbut zaleant.
28. Apnnem padd kelolea xarancho ani dhoni sanddun gelolea ghorancho tannem tabo ghetlo. Punn okherek tim xaram ani ghoram nisonttonak bad zal'lim.
29. To chodd kall girest urchona, tachê lagim aslolem kitench togchem na. Tachi savlli legit nanch zatoli.
30. Ani to kallokhantlo vattovcho na. Ujeacho dôg tacheô komreô korpoitolem Ani fulancho chonvor varean ubun gela Zhadda bhaxen tacho bhês zatolo.
31. Zorui pixeponnan tannem aplea motteponacher visvas dovorlo, tôr tachi bhul zatoli
32. Vêll pavche adinch tache khazur madd bavtole, ani tache khande kednach palevchenant.
33. Aple pikonaslole daku zhoddoitolê dak-veli bhaxen ani aple fulanche chonvor zhoddoitolea zoitunachea zhadda bhaxen to zatolo.
34. Devak mandi naslolea mon'xa sonsôt zavchi na ani lonch gheun bandlolim ghoram uzo lasun uddoitolo.
35. Dusvas ievjitoleank sonkoxtt favo zata to aplea ontoskornnant fosovnni posraita.
