1. Uprant Job uloilo. Tannem sanglem:
2. Oslim zaitim utram hanvem adim aikoleant kosle mhonn dolldire buzvonnddar tumi!
3. Kedna mhonn him vareavelim polkim utram sompot! Kosli mhonn pidda ho vad-vivad cholounk tumkam boll korta?
4. Hôi. Tumi mhojea zagear aslole zalear, mhojean-ui tumkam tumchech bhaxen ulounk zatolem aslem. Mhoji tokli tumchê vhoir ubarun, Mhojean-ui oslea nirfoll polkea bhaxonnancho Hunvar tumcher dhaddum ietalo.
5. Mhojê budhin tumkam mhojean ghottai dium ietali ani buzvonnechea utramnim tumchim dukham lhovu korum ietalim.
6. Hanv uloilear mhojem dukh lhovu zaina ani sonsnnikaien sonslear koslo mhonn faido?
7. Atam Devan mhaka thokoila mhoje sangati astanam-i, tannem mhaka eksurponnan xenddoila.
8. Tunvem mhaka vhorun mhojea tonddar marta thoim dovorlai, mhoji fokot kat ani haddam urleant. Ani ho mhojê chukincho puravo mhunnon lôk mandta.
9. Tacho rag mhaka pinzta ani mhojê add govai zala. To mhaka dant kirlaun mhojê fattik lagta.
10. Lôk mhaka hinnsaitat ani vhoddleô daddvonnam ugôddtat te mhojê bonvtim lutt kortat ani mhaka thapttaitat.
11. Devan mhaka odhormik mon'xanchea hatant ghatla. Ani vaittoveanchea hatant xevttila.
12. Hanv sovostkaien jietalom, punn tannem mhoje vadre kele; Tannem mhaka gomttek dhôrun apttilo ani mhoji pudd keli Aplê mokhi khatir tannem mhaka thevla.
13. Tache bannvale mhaka veddho ghaltat. Doia dhôrinastana To mhojeô antkolleô topun pinzta Ani bhitorle sandhe bhair dhortorer to xinvraita.
14. To porot-porot mhaka ghaiall korta ani eka zhuzarea porim rostin mhojê fattik lagta.
15. Mhojea angar hanvem sakachem anglem xinvlam ani mhojem kopol hanvem dhortorechea dhullint apttilam.
16. Mhojem mukhamoll dukhamnim tambddem zalam ani mornna sarki kalli savlli mhojeô paklleô dhamptat.
17. Torui astana mhoje hat hinvsê meklle asat ani mhojem magnnem nitoll-nirmoll.
18. Prithumê! Mhojea rogtacher dhampnnem ghalum nakai, Nitik ubarlolo mhozo tallo thambonastana sôddum di.
19. Atanch pasun, ho polle mhozo govai sorgar asa. Mhojer govai divpi vhoir asa.
20. Mhoje boraborche mhojeô kenn'nniô kortat ani Deva fuddeant mhojim dukham vhanvtat.
21. Zoso eklo monis aplea peleache mullave hok rakhta tech porim, Deva mukhar aplea hok'kam khatir zhuztoleachea adarak konn tori ascho!
22. Atam mhojea jivitantlim vorsam sompot vetat ani kednach porot iena tea rostean hanv cholun vetolom.
