1. Temancho Elifaz oso uloilo:
2. Êk monis Devak kitlo mhonn adavacho zaum ieta? Khoreponnim ek gineanan bhorlolo monis apnnakuch adavacho zaunk xokta.
3. Tujea promannikponnacho Sorvbollixtak koslo upeôg zata? Vô tujea khot naslolea sobhavacho kosloi tori taka faido zata?
4. Tujê Dev-bhiranti khatir to tuka khast laita ani tuka nitik ubo korta oxem tum somzotai?
5. Na. Chodd korun tujea mottea khotteponna khatir ani tunvem adarlolea hispa-bhailea patkank lagon.
6. Apleak dennem naslolem rinn aplea bhava koddchem kaddun ghetlaim, ani lokachea angavele kopdde kaddun gheun tankam vinglle keleai.
7. Taneloleak pieunk diunk chuklai ani bhukeloleank jevonn diunk nakarlam.
8. Tunvem tujê xokticho ani zageacho faido gheun apleacher upkar keloleank dusreanchea zomnint bhitôr haddleat.
9. Tunvem vidvank ritea hatamnim portileat ani onathanche hat mostileat.
10. Dekhun tujea bhonvtim soglle fas poddlear Tuzo uzvadd kallokhant tuka dixti poddona zalear
11. ani tum udkachea lottan buddtai zalear vhoddlem ojap nhoi.
12. Unch sorgim Dev ravona? Polle, kitlê unchaiek mhonn tim noketram!
13. Devak kosli khobor asa? ani kallea kupam pelean tachean zhoddtti korum iet? oxem tum mhonnttai?
14. Datt kupam taka lipoitat dekhun tachean polleunk zaina.
15. Noxtte monis choltalet te adlea rostean tum cholunk sôdtai?
16. Tancho vêll pavchê adinch tankam Devan bollar ubarle ani tanchi bunead vhanvon geli. Tãnnim Devak mhollem, 'Amchê sorxilo koddsor!'
17. Sorvbollixttan amkam kitem korunk zata?'
18. Zorui noxtteamnim aplea ievzonnentlean taka bhair dovorlo, torui tanchim ghoram tannem borea vostumnim bhôrlim.
19. Oxem ghoddtta tem polletôch nitivont monis khuxi zatat ani niropradhi monis tanchim khebaddam kortat mhonnun.
20. Amchea dusmanachem koxem nisontton zalem ani tanchi girestkai koxi ujean nanch zali tem polle!
21. Borem tôr! Tuji khuxalkai tuka portun mellunk tachê lagim xanti zôdd ani sondhan kôr!
22. Tachea tonddantli bhair sortoli xikovnn mandun ghe ani tachim utram tujea kallzant samballun dovor.
23. Zorui tum lhanvikaien Sorvpodvedara thaim portun ieum-xi ani tujea tombuntlem noxtteponn pois korxi.
24. Tujem bhangar tum dhullint uddovxi tujem ofirachem bhangar tum nodichea sukhlolea vhallant purovxi
25. Sorvpodvedar tujea bhangaracheô kanddiô ani rupeacheô raxi zatoleô.
26. Tedna Sorvbollixtt tujem sogllem dhadosponn zatolo ani tujem mukamoll tum Devak ubartoloi.
27. Tum magtoloi ani tujem magnnem to aikotolo ani tum tujeô soglleô angonvnneô pureô pallunk pavtoloi.
28. Tum kitem korunk fuddem sortai tem borem zatolem ani tujê vatter uzvadd porzolltolo
29. Kiteak To podvedarank sokla denvoita ani lhanvikank sôddoita
30. To sorv niropradhiank nivarta tuje hat nitoll kôr ani tuka taronn melltolem.
