1. Joban aplem ulovop chalu dovorlem.
2. Dev mhozo samball kortalo toslem adlea sarkem jivit mhaka konn portun diit!
3. Jedna tacho divo mhojea mathear pett'talo ani hanv kallokhantlean choltana tacho uzvadd mhaka vatt dakhoitalo?
4. Tedna Mhoji progoti zaloli Devan mhojea tombuchi rakhonn keloli.
5. Jedna Sorvpodvedar Dev ozun mhojea vangdda aslo, ani mhojim bhurgim mhojea sangata jietalim.
6. Jedna mhoje paim dudant nhannoitalet ani khoddpavelean telacheô zhori rokhoitalet.
7. Jedna nograchea provês- dara-xim hanv vetalom, ani thoim chovker mhozo zago ghetalom.
8. Jedna mhaka polletôch tornatte kuxik sortalet ani zanntte ube ravtalet.
9. Vhoddle monis aplem ulovop bond kortale ani aplea tonddar hat dovortale.
10. Raj odhikareancheô zapô bond zataleô ani tancheô jibô talleak panktaleô.
11. Mhojim utram aikon mhaka porbim ditalet mhaka polleun te mhaka govaiki ditalet:
12. Tanchea akantachea vellar hanv goribank pavtalom ani adar naslolea onathank adar ditalom.
13. Mortolea mon'xacho mhojer axirvad poddtalo ani hanv vidvanchim kallzam khuxal kortalom.
14. Hanv promannikponn nhestalom ani khori neai-nit mhozo kôtt ani pogddi.
15. Hanv kudd'ddeank dolle ani panglleank hat zatalom.
16. Goribank hanv bapui aslom ani onvollkheanche firiadinchi chovkoxi kortalom.
17. Hanv noxtteanche dant môddtalom ani tanchea daddintlean xikar kaddun ghetalom.
18. Anink hanv mhonnttalom: "Vellevellê renvê itle dis jielea uprant hanv bhov manan mortolom."
19. Mhojim pallam udka meren pavunk xoktolim ani raticho dov mhojea panancher bostolo.
20. "Mhozo onod sodanch tazo ani mhojea hatantlo dhonux sodankal mozbut astolo."
21. Axeun te mhaka aikunk ravtalet ani mhojim utram ogeponnan aikotalet.
22. Hanv uloun zatôch soglle ogi ravtalet. Ani konnuch mhaka protivad kori naslo. Dovachea thembeam bhaxen mhojem ek-ek utor tanchea monant bostalem.
23. Usram ietolea Pavsak ravtat tê porim mhaka ravtalet Thembe gilltolea porim mhojim utram gilltalet.
24. Mhojem hanxem tanchea kallzak dhadosponn ani mhojem hanstem mukhamoll tankam visvas ditalem.
25. Tancho mukheli koso hanv nirnnoi ghetalom. Êk raza aplea soinikank vhorta toso hanv tankam mhaka zai thoinsor vhortalom.
