1. Anink eka disa Devache put aile ani Sorvespora mukhar hajir zale; tanchê modem Soitan-ui aslo.
2. Khoim asloi tum?' Sorvesporan Soitanak vicharlem.
3. Sonvsarak bhonvadde marit ani hanga-thoim bhonvot aslom.' Soitanan zobab dilo.
4. Tunvem mhojea chakra Jobacher nodor marloli? Tachea sarko monis sonvsarant ekui na. Boro, promannik, ani Devak bhieun patkak ani vaittak fatt korta toslo anink dusro monis na. Tunvem itleim kelam astana, tannem promannikponn sanddlem na. Tachem nisontton korunk laun tuka kosloch faido zaunk na.'
5. Katik kat' Soitanan portipall kelo. 'Aplo jiv vattaupak monis kiteim korta. Punn, hanv tuka khorench sangtam, tuzo hat lambai ani tachea masak ani haddak bott lai. To tujea tonddar tujer xiraptolo.'
6. Borem asa.' Sorvesporan Soitanak mhollem. 'Hanv taka tujea hatan ghaltam. Punn, tacho jiv samball.'
7. Soitan Sorvesporachea dolleam mukhavelo koddsorlo. Ani Jobak paiancho tollo tem toklechê talliê meren noxttea koddan bhorlo.
8. Joban aple ghai pusunk êk koilacho kuddko ghetlo ani gobrachea fuddeant vochon boslo.
9. Tachê bailen taka mhollem: 'Tujem promannikponn ozunui kiteak gheun boslai? Devak xirap ghal ani mor!'
10. Tum ginean naslolê bhaxen uloitai!' Joban zobab dilo. 'Zôr ami borem Devachea hatantlem ghetanv, tôr vaitt-ui ami mandun gheunk naka?' Hea sogllea odruxttan, Job ek legit utor vaitt ulounk na.
11. Jedna Jobachea odruxttachi khobor tachea teg ixttanchea Temancho Elifaz, Suhacho Bidad ani Naamathcho Zofar hanchea kanar poddli, tãnnim tegaimnim ektthaim zaun, vochun taka buzvonn diunk ani moipas dakhounk ievjilem ani ghorantle bhair sorle.
12. Poisuch astana tãnnim taka pollelo. Punn, te taka vollkhunk visorle. Taka polleun, tãnnim aple kopdde pinzle, aplea mathear dhull ghali ani mottean roddunk lagle.
13. Te sat dis ani sat rati tachea kuxik bosle. Te Joba lagim ekui utor ulounk nant karonn, to kitlo koxttovtalo tem tãnnim pollelem.
