1. Khoinchech ankvarik vaitt nodren pollena zaunk hanvem mhojea dolleam kodde koblat keloli.
2. Sorvpodvedara koddlean mhoji mozuri kitem? Sorgantlea sorvbollixtta koddlean mhojem daiz kitem?
3. Noxtteancher ani vaitt kortoleancher favo to bhosm to dhaddina zait?
4. Punn hanv koso choltam tem to khoreponnim polleta. To sogllim mhojim pavlam mejina zait?
5. Hanv fottingponnan jielam vô hanvem mhojim pavlam ghatache vatten marleant?
6. Devan mhaka neai-nitichê tagdder zokhum-di tedna hanv kitlo promannik tem taka kolltolem!
7. Zôr mhojim pavlam sotachea rosteavelim kuxik sorleant, zôr mhojea dolleamnim mhojea kallzak khottê vatten vhelam, zôr mhojea hatank kosleim khot laglam,
8. tôr hanvem roilolem dusro khaum, ani mhoje rompe umttoun uddoum.
9. Zôr ekê ostoren mhojea kallzak bhuloilam vô hanv mhojea xezareachea dara bhair doddon ravlam.
10. Tôr mhojê ghorkarnin dusrea dadleak dhoddun-kanddun dium, vô dusrea dadleamnim tichê lagim kuddicho ekvott korum!
11. Toxem kelolem zalear hanv vansa bhôgpachê axechem patok kortolom aslom ani kaidean tea opradhak xikxea favo zavpachi.
12. Nas korpi ujea bhaxen to mhoji soglli aspôt lhasun uddoitolo aslo.
13. Zôr eka gulam' dadleak vô bailek kaidean favo zaupache hok'k hanvem damun dovorleat,
14. Tôr Dev utt'ta tedna hanv kitem kortolom? Tachê chovkoxê vellar hanv kitem mhonnun zap ditolom?
15. Mhaka rochlolo tosleach kusvean Devan tankaim rochunk nant?
16. Gorib mon'xanchea gorzank hanvem mhojem kalliz kedna mhonn dhamplem zait? vô êkê vidveche dolle hanvem dukhin bavoilea zait?
17. Mhojem jevonn-khann hanv ekloch jevlam kai, ani onath bhurgeak hanvem tem vanttun dilem na?
18. Bhurgeaponnar thaun Devan mhaka eka bapai bhaxen ballgila, ani mhojê avoichea kusveantlo bhair sorlom tethun thaun Tannem mhaka choloun vhelo.
19. Jedna nhesunk- pangrunk naslolea eka dolldireak hanvem dekhla
20. vô eka bhikariak vingllo bhonvta to pollela, ani kallzant thaun mhojer axirvad ghalunk taka tank na tedna mhojea menddreanchê lhonvechi taka ub mell'lli na.
21. Mhaka devo asa mhonn somzun xarachea darvonttear, zôr kednaim zôr eka onathacher hanvem mhozo hat ubarla
22. Toxem zalear mhojem bhuz kankheantlean nikllom ani mhozo bavllo komprantlo bhair sorom!
23. Devacho thorthoro mhojer poddtolo aslo ani Tachea teza fuddeant ubo ravunk mhojean zaunchem naslem.
24. Sogllo mhozo visvas hanvem bhangaracher dovorla kai, ani nirbhel bhangara-koddchem hanvem mhojem surokxonn sôdlam zait?
25. Mhojê lagim khub-khub grestkai asa mhonn hanvem polki boddai dakhoilea? Vô mhojea hatamnim zoddil'lê grestkaien Hanv gorvan ful'lam kai?
26. Mollbantlean choltolea suriachea chokmokar vô chondrimachea uzvaddar mhoji nodor poddlea.
27. Ani mhojem kalliz tanchê vatten voddlam ani hanvem tancho umanv ghetla?
28. Toxem-i kelolem zalear, mhaka khast favo zai sarko mhozo guneanv zatolo aslo, kiteak Sorvpodvedar Devak hanv nakartolom aslom.
29. Mhojea dusmanachea odruxttacher kednam-i mhaka sontos mell'la vô tacher odruxtt ailam tea vellar hanv dhadoxi zalam?
30. Hanvem, tôr kednanch mhojê jibek patok adarunk diunk na vô tachea jivitacher xirap ghalunk na.
31. Jevonn dinastana khoincheach mon'xak tannem portun dhaddlona, oxem mhojea tombunt ravtoleamnim mhonnunk na zait?
32. Khoincheach porkeak kednanch bhair nhidunk poddunk na, vattsureak mhojem dar sodanch uktem aslem.
33. Kedna tori hanvem mhojeô chuki lipoun dovorleat, vô mhojim patkam êk ghutt koso mhojea kallzant samball'la?
34. Lokanchea chaddiank bhieun ani mhojim ghorchim mhaka kenddtolim mhonn bhieun, gharantlo hanv gopchup bhair soronastana ravlam?
35. Mhaka konnuch mhonn kan diuncho na? Hanvem mhojem sogllem sanglam. Atam Sorvpodvedarak aplo nirnnoi dium di. Mhojea dusmanamnim mhojer arop ghaleat te mhaka polleum-di.
36. Hanv te mhojea khandar dovortolom ani razacho mukutt koso mhojea mostokar samballtolom.
37. Mhojea dôr eka pavlacho hanv taka hixeop ditolom, ani êk kunvor koso tachea mukhar mhoji tokli voir ubarun dhortolom aslom.
38. Zôr hanv nangortam ti zomin mhojê add bobô-hueli marta
39. Zôr hanvem farik korinastana thoinchi pikavôll khalea ani tichea dhoniank marun uddoileat,
40. Tôr tea xetan gonvam ani sevadam zagear thoim ner ani kanntteanchim zhompam kirlum. Ani hanga Jobachem ulovop sompta
