1. Jobak apunn niropradhi mhunnon sarkem pottllem dekhun te teg-ui tachea sorxim bhasa-bhas korpache thamble.
2. Punn Ramachea kuttumbantlea Buzitachea Barakelachea putak tacho khub rag ailo.
3. Aplem sarkem asam ani Devachem chuklam mhunnon Job chint'talo dekhun to samko ragan tambddo zalolo.
4. Tech porim Jobak portipall korpak tanchê lagim ekui zobab naslo, ani hea udexim Devachem chuklam oxem distalem. Dekhun to Jobachea tegui ixttancher ragar zalo.
5. Te ani Job uloitat mhunnon to vogi ravlo. Karann, to soglleam poros bhurgo aslo. Punn, tea tegui zanna lagim Jobak diunk zobab na mhunnon kollona fuddem tachean sosunk zaina zatôch
6. Buzitachea Barakelacho put ulounk laglo. Tannem sanglem: Hanv ozunuim bhurgo asam ani tumi mhatare zaleat. Dekhun hanv kitem zannam tem tumkam sangunk hanv loztalom ani fattim-fuddem sortalom.
7. Hanvem atam ulounk zai oxem mhaka dislem. Tumi utar piraiecheamnim uloun, tumchi zannvai amchea meren pavounk zai.
8. Punn Sorvesporacho otmo mon'xant asa ani toch mon'xakullak zannvai dita.
9. Monis zantto zala mhunnon, taka xanneponn mellona vô kitem vaitt vô borem tem taka somzona.
10. Atam tumi mhojem aikololem mhaka zai. Hanv kitem zannam tem tumkam sangtam.
11. Tumi uloitat astana hanvem sonsnnikaien aikolem. Ani tumchea zobabak hanv ravlam.
12. Hanvem khub chotraien niall kela. Tumchê modlo eklo porian Jobak ghuspaunk xoklona Tache mud'de konnech nhoikarle nant.
13. Dekhun amkam zannvai mell'llea mhunnom nakat. Amchi xikovnn mon'xanchi nhoi punn Devachi.
14. Tumi manddleat toxe mud'de hanv manddcho na Jobak hanv vegllech toren zobab ditolom.
15. Job, tankam utram mellonant tuka divunk tanchê lagim zobab na.
16. Te vogi ravleat mhunnon hanvem toxench ravpachem? Te tôr zobab nastana thoinch ube asat.
17. Atam hanv mhozo zobab ditam ani mhaka kitem dista tem sangtam.
18. Mhojean uloilea xivai ravunk zaina atam mhojim utram sanvronant.
19. Mhaka ulounk sondhi mellona zalear eka sorean bhorlolea chamddeachea aidona bhaxen hanv futt'tolom.
20. Ho ghusmott mar mhojean sonsunk zaina; hanvem ulounk zai.
21. Hê bhasabhaxent hanv konnachech vatten ulovcho na. Hanv konnakuch bextto polkea utramnim fuloina.
22. Dusreank bexttech fulounk mhaka somzona toxem kelear mhozo Rochnnar rokddoch mhaka kaddun vhortolo.
