1. Punn atam mhojea poros piraien lhan monis mhojim fokannam kortat. Tanchea bapaiank hanv mhojea xelliank rakhpi suneam poros kikont kortolom aslom.
2. Ani tanchea osokt hatancho atam mhaka koslo upeôg asa?
3. Bhuken ani axen atam itle osokt zaleat ki te oronneantlim ani tanelolea padd eksurea zageavelim mullam chabtale.
4. Te koirantle mitta konniô vinchtale ani moxingachea mullanchem jevonn kortale.
5. Chorank dhanvddaitat toxe tãnnim tankam bobô marun mon'xam môdle dhanvddaile.
6. Don dongram modlea falkeant, dhortorer khoddpachê dholimnim ani khanchimnim tãnnim aplem biradd kelolem.
7. Ranantlean tancheô hueli aikonk ietaleô ani te zhompamnim eka mekak tenkun ravtale.
8. Ok'kol nasloli, nanv hogddailoli sonsôt, aplea ganvantlo bhairailolo to lôk.
9. Ani tech monis ieun atam mhojim fokannam korun gaitat atam hanv tankam ek moskoreancho vixoi zalam.
10. Te mhaka vittetat, mhojê sorxile pois vetat mhaka polleun te thuktat
11. Mhaka Devan osokt ani adar naslolo kela dekhun aplea sogllea bollan te mhojer portotat.
12. Hanv matso visôv ghetam tedna ti urponz mhojea uzvean uprasta. Ani mhozo bhosm korchê khatir, te naka zal'le upai sôdun kaddtat.
13. Mhoje vattoupache roste soglle te bond kortat ani mhojem nisontton korpachi sondhi ghetat tankam addaitolo konnuch na.
14. Mhojê rakhnnek te bonte ghaltat ani mhojer poddtat.
15. Hanv akantan thorthortam, vareachê funki bhaxen mhozo obhiman ubta, ani mhojem dhadosponn ani surokxa eka kupa bhaxen nanch zatat.
16. Atam mhojem jivit virun veta ani upodreanche dis mhaka aplea tabent ghetat.
17. Ratchea vellar mhojim haddam sonnsonntat ani mhaka kednanch pekonaslole mhoje ghai korant'tat.
18. Zobordosten tannem mhojea golak dhorlam ani mhoje kopdde pisuddleat.
19. Tãnnim mhaka matient xevttila hanv dhulli ani gobra poros vhorto nhoi.
20. Hanv Tuka ulo martam ani tum mhaka zap dinaim. Hanv tujea fuddeant ubo ravtam punn, tum matui mhojer lokx ghalinaim.
21. Tum mhoje sovem darunn zalai ani matui kaklut nastana tujea hatachea sogllea bollan mhaka piddapidd ditai.
22. Tum mhaka varear ubonk sôddtai ani uprant pisddun eka moddant xevttitai.
23. Hôi. Tum mhaka mornnachê vatten vhortai mhunnon mhaka khobor asa.
24. Torui astana aplea akantachea vellar nitik roddtat tea goribank hanvem hat diunk na?
25. Trasant poddloleanchea vangdda hanv roddlo na ani gorjevontanchi hanvem kaklut korunk na?
26. Hanv khuxalkaiek ravlom, punn dukh ailem hanvem uzvaddak sôdlo, punn thoinsor kallokh zalo.
27. Thambonastana mhojea pottant kollvolle ietat protek dis mhaka vollvolleancho zata.
28. Koslich bhuzvonn nastana hanv niraxi zaun bhonvtam. Hanv sobhêmazar ubo ravtam tedna roddun adar magtam.
29. Hanv landdgeam borabor bhonvtam ani shohamurgam sangata ravtam.
30. Mhoji kat kalli zalea, mhojim haddam lastat
31. Êk dis hanv khuxalkaiechem songit aikotalom tea zagear aiz mhaka fokt pirngovnneô ani roddnim aikonk ietat.
