1. Naamatacho Zofar tea uprant uloilo. Tannem sanglem;
2. Hea polkea utranchea xinvak konnuch zobab dinvcho na? Itlem sogott uloilam dekhun konnachem-i tem sot mandum-ieta?
3. Amchean tuka zobab diunk zaina oxem tum somzotai? Ani tum khebddaiô korun uloita tedna Konnacheanuch tuka lojek ghalunk zaina, oxem tuka dista?
4. Apunn kitem sangta titleim promannik oxem mhunnon tum sangunk sôdtai? Devachê nodrê mukhar apunn nirmôll asai oso tum davo kortai?
5. Devan tuka aplem tondd ugoddtana favo to zobab diuncho!
6. Zannvaiek zaiteô bazu asta mhunnon to tuka sangtolo aslo. Mon'xachê zannvaiechean thav kaddunk zaina sarkeô zaiteô vostu asat tuka favo asli tachea poros Dev tuka thoddi khast dita.
7. Devachea guttanchi kholai Ani Sorvpodvedarachea kallokhacho thav tujean gheunk zait?
8. Teô ontrolla poros voir asat: thoim tuzo hat pavonk xokona Patalla-von teô khol. Tujean tacho thav korunk zata?
9. Ticho akar sonvsara poros lamb ani somdira poros rund.
10. Tuka tannem sampddaun nitik ubo kelear, taka konn addaitolo asa?
11. Mon'xachem polkeponn to boroch vollkhota tachim vaittovim kortubam to polleta ani tanchi nond korun to dovorcho na.
12. Mhonnttôch polkê fottichea mon'xamnim ok'kol ghetlear bori. Ani ran'votti gaddvam bhaxen vagtat tãnnim mon'xeponnant zolm ghenvcho.
13. Tuzo sobhav bodol ani Deva mukar vistar tuje hat.
14. Tunvem khoreponnim noxtteponna adarleant zalear tanchê koddle tuje hat kuxin dovor ani tujea tombunt khotteponnak zago dina zavxi zalear,
15. Dhiran ani atm-visvasan tujean novean sonvsarak fuddo korunk zatolem.
16. tedna tuje tras sompon gelolea vadolla bhaxen pois zatole tedna sogllea konnixttaiancher tuzo visôr poddtolo.
17. Tujem jivit don'parchea suria poros porzollit zatolem, ani jivitantlim kallokhi voram legit fantea vori porzollit zatolim.
18. Tum huskea-mekllem ani bhorvonxachem jivit jietoloi Dev tuji rakhonn kortolo ani tuka visôv ditolo.
19. Tum add poddttai tedna tuka konnuch tras dinvchona ani zaite zann tujê lagim adar magtole.
20. Punn noxtteanche dolle zodd zatole. Tankam alaxiro mellcho na tancho ekuch bhorvanso mhonngê tanchem moronn.
