1. Mon'xachem jivit hea sonvsarant ek bharadik ojem nhoi? Ani tache dis koxttovtolea vavraddiache koxe nhoi?
2. Gulam' savllek axeta ani vavraddi aplea disvoddeachem chintta,
3. toxench mhaka rikhame mhoine favo zale ani dukhim-khontim bhair mhaka anink kãich na.
4. Anturnnar poddun hanv chinttam: kedna dis udetolo? Punn rat soron sorona; sokall zai-sôr hanv soglloch tollmolltam.
5. Mhoji kudd kiddeamnim bhorlea ti chondamnim kuslea mhojea ghaiantlean matheri vhanvta
6. Vinnpiachê suta-gaddiê poros mhoje dis vegim dhanvle ani bhorvanso dovrinastana te sorle.
7. Mhojem jivit fokot êk svas koxem mhonn ani mhoje dolle kednanch khuxalkai polleunche nant mhonn ugddas dhôr.
8. Mhaka adim dekhla to dollo anink mhojer poddcho na, Tuje dolle mhojê vatten portotole, punn thoim hanv ascho na.
9. Zoxem ek kup ubun veta ani nanch zata, toso zo konn Norkant denvta to anink kednanch porot voir choddona.
10. To anink aplea ghora porot iena, ani tachem ghor porot taka vollkhona.
11. Dekhun mhojean ogi raum nozo mhonn ojapuch na; mhojea monachea tollmolleamnim hanvem ulounkuch zai, mhojea otmeachê khontint hanvem rudon korunkuch zai.
12. Kiteak Tum mhojer dollo dovortai ani mhaka rakhunuch asai? Hanv Doria kitem? vô Doriantlo Rakhôs kai?
13. "Mhoji baz mhaka buzvonn ditoli, mhoji khatt mhoji dukh hollu kortoli, oxem hanv mhunnon zalear
14. Tum mhaka sopnamnim bhenkddaitai ani disnneamnim mhaka koddkoddaitai.
15. Osle koxtt soschê poros konnem-i mhojea golleak fas ghal'lo zalear, vô moronn legun mhaka odik mantem.
16. Hanv khorchon vetam, hanv sodanch jivo ascho na; sôdd tôr mhaka, kiteak mhoje dis fokot êk svas.
17. Monis konn Ga? Kiteak Tum tachi itli porva kortai, ani Tuje dolle tacheruch dovortai?
18. Kiteak Tum dôr sokallim tachi porikxa kortai, ani dôr-êkê ghoddiê taka topasun kaddtai?
19. Kednanch Tum mhojêvele Tuje dolle kaddcho naim? Mhoji thimpi tori gillun gheunk diuncho naim?
20. Mon'xank thambonastana Tujea dolleam mukhar dovortai to Tum: hanvem patok kelam zalear-ui, Tuka kitem vaitt kelam? Mhakach mhonn kiteak môkhtai? Kiteak mhaka Tujer êk bhar mhonn dhôrtai?
21. Mhojem patok sõsunkuch zaina Tujean? Mhojê chukicher dolle dhampunk zaina? Rokddoch hanv zomnint poddun urtolom; tedna Tum mhaka sôdunk ietoloi, punn hanv anink ascho na.
