1. Tujean Mangeak gorantten gorounk zata? Vô tachi jib dorien bandunk zata?
2. Tachea naka puddantlean tujean betkatti ghalum-ieta vô tachem daddvonn tujean gorean topunk zata?
3. Movall utramnim tuka ulo marun, lamb suskareamnim to tujê lagim adar magot?
4. Jivit bhor tuzo gulam' zaunk to tujê lagim koblat korit?
5. Eka opurbaiechea suknnea bhaxen tujean tachi opurbai korun tujea supurlea cheddvank khellounk tachea fuddeant dovorxi?
6. Nusteachea vhoddlea dhondekaramnim vikun, barik veapareamnim tache vantte ghalun vikunk zait?
7. Tachi kat bhaliamnim bhôrunk zait vô tachê toklek bhale marunk zait?
8. Tacher hat mat ghal ani polle kosli loddai ti. Toxem korunk tum anink kednanch fuddem sorcho na.
9. Tuka kosloi bhorvanso aslear to upeôg naslolo zatolo tacher nodoruch poddlear tujer kampero ietolo.
10. Taka hinnsailear to samko nixttur zata tachea fuddeant konn ubo ravunk xokot?
11. Konn-ui tacher ghuri ghalun aplê kuddik ghaiall korun ghenastana urla zait? Sogllea sorga sokla konnuch na!
12. Tea fuddem hanv tachea zangllam vhoir uloitam ani tachea sor naslolea bollachi iskuttavnni kortam.
13. Tachea angachi voili kat konn oddun kaddit? vô tachea hodd'ddeachi loknna folli konn fôddit?
14. Tachea tonddantle darvontte konn ugddit? Tachea dantam bhonvtim thorthoro vosta!
15. Tachi fatt fatrachea xik'kean mhôr marloleô dhalancheô volli koxeo.
16. Tanchea modem sadho svas legit vochunk xekona titleô teô ekamekak tenkun asat.
17. Teô eka mekak pankun tem sogllem ek ak'khench kott'ttem zalem.
18. Tacheo xinkô zoglavnnem fankoitat ani tache dolle fanteacheô paklleô koxeô.
19. Tachea tonddantlean bhirankull ujeachi chuddi bhair sortat tantuntlean ujeacheô kitt'tteô sutt'tat.
20. Chulicher khot'khot'tolê kaili bhaxen tachea naka puddantlean dhunvor bhair sorta.
21. Tacho svas kollxe pettounk xokta tachea tonddantlean ujeachim kirnam bhair sortat
22. Tachem boll tachê gomtten vosti korta. to cholta tachea fuddem kampero nachta.
23. Tachea masacheô vadiô ghôtt ektthaileat ani halona toxeô dovorleat.
24. Tachem kalliz fatra poros nibor Danteachê sokoile palli bhaxen halona toxem mozbut
25. To ubo ravta tedna osaddi bhietat ani doriachim lharam osaddi fattim sortat.
26. Torsad marlear poddot punn ti taka tôpchi na nhoi mhunnon bhale, khellantle bhale vô dhonush taka lagche nant.
27. Taka lokhondd mhonngê tonnachê kaddiê sarkem ani kanxim kosmelolea lakdda bhaxen.
28. Khoincheai bhaleachean taka dhanvddaunk zaina tacher xevttilole gofinniche fator tonnachê kaddiê bhaxen taka afuddtat.
29. Tonnke taka tonnachea kuddkeam sarke ani xevttilolea bhaleank to hansta.
30. Tachea pottachim dharechim fovllam xetkareachea dantea bhaxen zomin pinztat.
31. Ekê moddkent udok khot'khot'ta tê porim to somdirachê kholai ek uchambollaita ani doriak pormôll laspi aidona porim xizoita.
32. Aplea fattlean to ek chokmokit patt sôddtta ani doriacher udkacho ufemso korta.
33. Bhiranti vinnem jietoli tachê sarkhi anink prithumecher dusri rochnna na.
34. To sogllem unch-unch asa tem polleta, to sogllea ran'votti raiall zonavorancho raza.
