1. Khorench rupem kaddpachim minam toxench bhangar koddoupache zage asat
2. Dhortorentlem lokhondd kaddtat ani ujean koddoilolea khoddpantlem tambem toiar zata.
3. Monis kallokhacho xevôtt korta, bhuiment khôl to khonddta ani mornna sarkea datt kallokhant to minache fator sôdta.
4. Konnuch êk monis pavona ani ravona toslea zageamnim dhôli marun, mon'xakulla poros pois jhel martat ani umkholltat.
5. Jevonn pikoitolê dhortorek te bhitorlean pinztat ani ujean fapxitat.
6. Thoim khoddpamnim nillmonniche fator ani dhullint bhangar asta.
7. Khoincheach xikari pranneak tea rosteachi khobor na. Khoincheach gidachi thoim nodor pavona.
8. Tea rostear ran'votti savzam bhonvunk nant nhoi mhonn xinv tê vatten vochunk nant.
9. Monis kupator fôddta ani dongor mulla soit portita.
10. To khoddpantlean khariz ugôddtta ani moladik vostu sôdta.
11. To nodinchea zhoreanim sanspita ani liploleô dovloti uzvaddak haddta.
12. Punn, zannvai khoim mellta zait? Ani gineanacho zago khoim mhonn asot?
13. Mon'xak tachi vatt kollona; ani jivea mon'xanchea desant ti mellona.
14. "Ti mhojeant na!" Patall mhonntta. "ti mhojê bori na!" Somdir mhonntta.
15. Ut'tom Bhangaran ti vikti gheunk zaina nhoi mhunnon kitleim rupeachem vozon diun tichem mol farik korunk zaina.
16. Orfichea bhangarak ani moladik fatrank ani safirank tichea molak sor korunk zaina.
17. Bhangarak ani moladik arxeank ani tika sor korunk zaina. Vô eka nirmoll bhangarachea aidonan tika boldun gheunk zaina.
18. Ponvllim vô kankomanni hanchi gozaluch sôddun di mannkam motiam poros zannvai odik moladik.
19. Kushacho puspraj tichea mukar kãich nhoi ani kitleim nitoll kelolem bhangar mol naslolem.
20. Punn, zannvai khoim mellta zait? Ani gineanancho zago khoim mhonn asot?
21. Ti khoincheach jivea pranneak disona ani mollbantlea suknneankui mellona.
22. Abaddon ani Moronn mhonntta Amchea kanamnim ami fokot tichi khobor aikolea.
23. Tichi vatt Devuch vollkhota ani ti khoim mellta ti Toch zannam.
24. Kiteak, taka sonvsaracheô poixileô ximô distat ani sorga pondak kitem ghoddta tacher to nodor dovorta.
25. Jedna Devan vareak boll dilem ani somdiracho akar sthaplo.
26. Jedna pavs khoim poddpak zai tem Devan tharailem ani goddgoddeachea vizak rosto dakhoilo.
27. Tedna tannem tika polleli ani tichem mol kelem, tika bariksannem topasli ani tichi molavnni keli.
28. Tedna Devan mon'xak mhonllem: polle, Sorvesporachi bhirant hich ti zannvai, vaittantlo kodd sorop hench tem ginean.
