1. Uprant Temancho Elifaz uloilo. Tannem mhollem:
2. Ami tuka kiteim sanglear tum somzun ghenvxi? Punn, titlem-i zalam astana; uloinastana konnachean rabunk zata?
3. Adim tunvem zaitea lokank xikoileo sokt hatank ghottai dili.
4. jedna konnuim adol'lo, osokt zalo ani thoklo taka ubo ravunk, tujea utramnim taka thakôt dili.
5. Atam tunch trasant poddpacho tujer vêll aila ani tuji sôsnikai komi zait veta tujea jivak hat laitanch tum cheptai.
6. Tuji doia tuka visvas dina? Tujem jivitachem promannikponn tuka borvanso dina?
7. Guneanvam xivai konnancheim nisontton zalolem ani promannikacho bhosm zalolo tuka ugddas asa?
8. Hanv mhojea onnbhovan uloitam noxttachim xetam kosun, vaittponnachem bim roilolem hanvem pollelam. Ani atam te vaittponn ani noxtt lunvtat.
9. Devachea svasachea pondak te mortat Razachea ekach dhenkxean tanchem nisontton zata.
10. Noxttea xinvam bhaxen goroztat ani ghurghurtat punn, Dev tanchem tondd bond korta ani tanche dant môddta.
11. Xikar nasun xinv morta ani xivnninchim poram zollim-mollim ximpoddtat.
12. Mhaka eka guttachi kollovnni mevlea êk sondêx mhojea kanant futfutla.
13. Ratchea vellar jedna sopnam monak ghuspaitat, jedna monis khôl nhident bhormetat,
14. Mhojea angar akantacho koddkoddo bhorlo ani mhojim haddam bhirantin thorthorlim.
15. Mhonvall varo mhojea mukamollar poddlo ani bhirantin mhoji lhonv ubi zali.
16. Mhojea mukar konn eklo ubo aslo hanvem taka vollkholo na. Punn, ekui utor uloinastana to xant ubo ravlo. Magir tea ogeponnantlean hanvem êk tallo aikolo.
17. Devachê nodrek konn tori promannik disot vô aplea rochnnara mukar konnuim nirmôll asot?
18. Devachean aplea khaxea chakrancher legit patieunk zaina aplea dutam kodden legit taka chuki melltat.
19. Tôr matieche kel'leank, je tech matiechea ghoramnim ravtat tanchi kosli porva?
20. Pisolliam bhaxen sompeponnan tankam chidd'daitat sokallchea ani sanjê modem tancho bhosm zata te sasnna khatir somptat tancho konnuch ugddas korina.
21. Tanchê lagim aslem titleim kaddun ghetat khori zannvai mello nastana te moron vetat.
