1. Elihun aplem ulovop chalu dovorlem. Tannem mhollem:
2. Ani atam, tumi zannaramnô, xikloleamnô hanv sangtam tem êxikloleamnô, chit diun aikat.
3. Zoxi veg-vegllea jevnnachi ruch jib sangun dita toxench uloilolea utrachi ontoran: mol kan somzota.
4. Sot-promannik kitem tem aminch sôdun kaddum-ia; borem kitem tem amchêch bhitôr tharaum-ia.
5. Job sangta: "Hanv niropradhi ani Dev mhaka sarki nit dina.
6. Mhozo kosloch guneanv nastana, mhozo nitidar mhaka doia- nastana kururponnan vagoita, mhozo ghai pekona toslo.
7. Konn zait Joba sarkho monis khebddaiô, udka porim pieta toslo?
8. Taka vaitt mon'xacho sangat avoddta ani to patkeam borabor bhonvta.
9. Devachê ixttagotin-sangatan cholot zalear mon'xak kosloch faido na oxem tannem mhonnllam.
10. Oxem tôr, gineamni mon'xamnô, atam mhojem aikat Devachean kednanch vaitt korunk zaina Sorvbollixtt kednanch onneai adarunk xokona!
11. Mon'xanchea kortubam pormannem to mozuri dita ani tanchê chali vagnnukê pormannem tankam vagoita.
12. Khoreponnim, Dev kednanch vaitt korina Sorvpodvedar koslich onit adarina.
13. Devak konnem hea sonvsaracher odhikar dila zait? Ani konnem mhonn ho ak'kho sonvsar tachea hatant ghatla zait?
14. Zôr tannem aplo atmo portun vhelear ani svas portun apnna-xim voddun ghetlear,
15. Ekach khinnant sogllea jivacho nas zatolo ani monis dhullint portotolo.
16. Tumkam somjikai asa zalear, hem aikat, Mhojim utram kanar gheiat:
17. Niticho dvês korta tannem kedna tori raj choloum ieta zait? Ani tujean Mha-Nitivontacher, sorvbollixttacher formonn marunk xokta?
18. "Tum êk duxtt monis" - oxem To razak mhonntta ani vhoddlê kulliecheak: "Tumi noxtte."
19. To rajkunvrancho bazu ghena. Goribam ani grestam modem to ontor korina, Karonn soglleank tannem eksarkim rochlenat.
20. Eka khinna bhitor he podvedar monis ratichea bharar moron nanch zatat eka nixttur mon'xak nopoit korunk taka matui koxtt tras poddonant.
21. Kiteak to mon'xachê vagnnukecher barik nodor dovorta ani tachem dôr ek panvl polleta.
22. Khoincheach kallokhant nhoi mhonn mornnachê kallokhi savllent Noxtteponn adartoleank lipunk zaunchem na.
23. Konnacheach add to kagall korina Devachê nitisobhê mukar ubo ravunk to formavnni dhaddina.
24. Chovkoxi korinastana podvedarank nikllaun, tanchea zagear dusreank bosoita.
25. Te kitem kortat tachi taka khobor asa dekhun tankam, maddonvchê khatir, ratcho To khala apttita.
26. Soglleanchê nodrê mukar to tankam tanchea noxtteponna khatir khast laita.
27. Kiteak tacho pattlav te korinant ani tachea updesancher tãnnim durlôkx kelam.
28. Devak ulo mari-sor tãnnim osoktank piddapidd dili, ani koxttovtoleancho Tannem tallo aikolo.
29. Zôr Dev ogoch ravot, konnachean Tacher formonn marum ieta? Tannem Aplem tondd lipoilear, konnachean taka polleunk zait?
30. Desanchi ani mon'xanchi to kaklut kortolo, noxttea mon'xak raj cholounk ani porjek fasant poddunk to diunchona.
31. Oxem kednaim konnem Devak mhollam: "Hanvem khast sonsli, koslench vaitt korinastana."
32. Hanvem patok kelam tôr mhaka dakhoi; zorui hanvem noxtteponn adarlam, hea fuddem hanv novean tem korchona.
33. Tunvem Tache nirnnoi nhoikarle, mhonnttôch, tujea mota pormannem, oslea mon'xak Tannem Khast launchi? Hem tunvem ruzu korchi goroz - nhoi hanvem tôr tum kitem zannaim tem sang.
34. Somjikaiecho lôk ani mhaka aikota to budvont monis mhaka sangtolo:
35. Job somjikai nastana uloita ani to uloita taka mat-ui ok'kol na.
36. Tôr upkar korun bariksannen Jobachi chovkoxi kor kiteak to eka noxttea mon'xa bhaxen uloita.
37. To aplea svotachea patkant, to bonddkorichi bhôr ghalta, ani amchê modem talliô marun amchê mukhar Devachi bhorpur ninda korta.
