1. Hem sogllem hanvem mhojea dolleamnim pollelam mhojea kanamnim aikolam ani hanv tem somzolam.
2. Tumi zannant titlem hanvui zannam khoinchêch vatten tumchea poros hanv komi na.
3. Punn Mhojem kitem sangchem asa tem sorvbollixta mukhar. Ani Mhozo khottlo mhaka tachea fuddeant manddunk zai.
4. Piddestacher upai korunk xekonant Aplem nennarponn fottimnim dhamptat tosle todd'doki voiz tumi.
5. Vogi pasun ravxat zalear konnui tori tumi xanne mhunnon somzotolo.
6. Upkar korun hanv sangtam tem aikat ani hanv mhozo prosn koso manddtam tacher lokx ghalat.
7. Devachê vatten tumi kiteak mhonn baskollponnam uloitat? Ani tachea adavak kiteak mhonn fotti sangtat?
8. Tachi rakhonn korchê khatir tachê vokhil zaunk tumi tumkanch nemtat?
9. Devan tumchi topasnni kelear, tumchê-xim taka kiteim tori borem mellot? Mon'xak fottoitat toxe tumi apunn Devakui fottoitoleat mhunnon somzotat?
10. Tumi guptim bhed-bhav kelo zalear, to tumkam jerul dhopkaitolo.
11. Tachi podvi tumcher bhirant haddina? Tacho thorthoro tumcher har ghalina?
12. Tumcheô vopari gobra bhaxen upeog nasloleô. Tumche mud'de matiê bhaxen kosllun poddtole.
13. Ogi ravat ani mhaka ulovpak sondhi diat tacho porinnam magir kiteim zaum.
14. Hanv mhozo jiv sonkoxttan ghalunk kobul asam.
15. Taka zai zalear mhozo bhosm korum-di, mhaka ani dusro bhorvanso na. Mhoji niropradhi vagnnuk mhaka tachea dolleam mukhar manddunk zai.
16. Oxem kelear hanv vattoutolom karonn, noxtteank Deva mukhar ube ravunk takôt zavchi na.
17. Mhojim utram chotraien aikat hanv kitem sangtam tacher chit diat.
18. Hanv mhozo prosn manddunk toiar asam. Hanv niropradhi mhunnon mhaka khobor asa.
19. Mhojer loddai korpa sarkho konn asa? tôr hanv tondd ugôddnastana moronk toiar asam.
20. Fokt donuch upkar mhojer kôr, tedna hanv tujê nodrê mukhavelo lipcho na.
21. Mhojê vhelo tuzo hat kuxin kadd ani tujea thorthoreamnim mhaka bhensddaum naka.
22. Tum poilo uloi ani hanv tuka zobab ditolom. Vô mhaka uloum-di ani tum zobab di.
23. Kitlim mhonn patkam ani opradh hanvem adharleat zait? Mhojeô chukhi mhaka kolloi.
24. Kiteak mhonn Tujem mukhamoll Tum mhaka lipoitai? Ani mhaka dusmana bhaxen kiteak vagoitai?
25. Tum mhaka bhenkddauk sôdtai? Hanv tôr fokt ek pan; ekê suklolê tonnachê kaddiechea pattiek tum kiteak lagtai
26. Hanvem mhojea bhurgeponnar kelolea chukim khatir khub vaitt guneanv mhojer thaptai?
27. Mhoje paim tum foddam ghalun bandtai. Mhojem dôr ek panvl tum chotraien polletai. Mhojea paiancheô nixanneom legit ekan ek topastai.
28. Taka lagon, kosmelolea lankdda bhaxen ani eka vallten khalolea kopddea bhaxen hanv kosolltam
