1. Elihu fuddem uloit ravlo.
2. Devachea nanvan hanv kitem spoxtt korunk sôdtam tem matxem sonsnnikai gheun borê toren aik.
3. Mhozo Rochnnar promannik mhunn dakhovpak hanv pois thaun mhoji zannvai zomoitolom.
4. Hanv kitench lottkem ulonvcho na. Kiteak tum khorea zannvik mon'xa mukhar ubo asai.
5. Dev kitlo xoktivont! Nitoll kallzacheank to kednach portina.
6. Ani to patkeank aplea bollan jieunk dina odruxttak sampoddloleank to sodanch nitin vagoita.
7. Promannikanchi to rakhonn korta razam bhaxen tankam sodrer bosoun To tankam sodankal unch ubarta.
8. Zôr tôr sanklleamnim tankam bandleat ani akantachea doramnim tankam sampddoileat.
9. Tãnnim adarlolea gorvixttanchea chukinchi Dev tankam vollôkh ditolo.
10. Vaitta koddle pois soronk to tanchea kanamnim xiddkavnni sadoita.
11. Zôr tãnnim Devak aikun Taka raji zalear, te aplem jivit khuxalkaien ani aplim vorsam dhadosponnan sartole.
12. Na zalear te vhallantlean vhanvot vetole ani tanchea murkheponnan tanchem nisontton zatolem.
13. Kallzant noxtte te ragar zait ravtole ani Dev tankam sanklleamnim bandta tedna legit te adar magchenant.
14. Mondirantlea dadlea xindulkeam modem te aplem jivit zhoroun tornnê piraieruch mortole.
15. Punn koxttovtoleak Dev sonkoxttantlean nivarta ani odruxttantlean tache kan ugôddta.
16. Tuka-i Dev tollmolleantlo vattaunk sôdta. Tujem jevnnachem mez zaitea jinosamnim upatt bhoron, tum hixpa bhair dhadoxi asloi tedna,
17. tunvem vaittoveank nitik ube korunk na ani onathank tunvem favo toxi nit diunk na.
18. Samball! Girestkai tuka vankddea rostean vhorot lonch tuka broxttacharan ghalit
19. Domddi nasloleankuch nhoi punn podvedarankui nitik ube kôr, osoktankuch nhoi, punn bollixtankui.
20. Tanchea zagear tuje sombondh sthapunk tum vollkhonaim tea mon'xancho bhosm korinakai.
21. Vaitt adarpachi vôdd sôddun di, kiteak heach pasot koxtt tuka atam topastat.
22. Polle, Devachem boll kedem vhodd ani ut'tom ani tachê bhaxen konnanchean xikounk zata?
23. Tannem kitem korunk zai tem taka konnem punn sanglam ani tunvem chuk adarlea mhunnon taka sangunk konnankui puttvolam zait?
24. Zaitea zannamnim tachea vaurachi thoknnai kelea tunvui tachea vaurachi thoknnai korunk monant dovor.
25. Tannem kitem kelam tem soglleamnim pollelam amchê bhaxen pois ravun fokot tacher nodor firoilea.
26. Hôi. Devachem vhoddponn somzunk amchem ginean pavona, ani tachim vorsam amchean mezunk zainant.
27. Pavsache thembe toch lhan korta ani tanchi pudd korun to dôv korta.
28. Ani tedna kupam te thembe ôt'tat ani mon'xakullacher pavsacheô panvlleô denvtat
29. Kupam koxim dhanvtat tim ani tachea tombu-xim mollbar koso goddgôdd marta tacho konnachean thav gheunk zata?
30. Apnna mukhar to dôv patllaita ani dongracheô tenkxeô dhampta
31. Hê bhaxen pottbor jevonn diun to mon'xakullak pôsta
32. To aplea hatant viz gheta ani apnnak zai thoim poddunk taka formaita.
33. Goddgôdd tachea ienneachi xiddkavnni dita ani noxtteponnacher tacho rag xevttota.
