1. Mhaka jivitachi vitt ailea mhoji vilap hanv viskottaitam
2. mhaka guneanvkar thoroinakai, Deva! mhaka sang: mhozo koslo mhonn opradh asa?
3. apnnem kelolê vostuk itli kikont korun ani vaittovea mon'xanchea ievzonneank hanstai pasun, Tunvem mhojer itlo krur zavop sarkem asa?
4. Ami kuddichea dolleamnim polletanv toso tum amkam polletai?
5. Amchea jivita itlem tujem jivit mottvem?
6. Tôr tum mhojea oslea patkeacho oso hixôb kiteak ghetai? Ani mhoji protek chukh sampddaitai?
7. Hanv guneanvkari nhoi mhunnon tuka khobor asa. Ani tujea hatantlo mhaka konnacheanuch vattaunk zaina.
8. Tujea hatamnim mhaka toiar kela ani akar dila. Ani tech hat atam mhojem nisontton kortat.
9. Tunvem mhaka matiecho kelolo mhunnon ugddas dhor. Tum mhoji pudd korun novean dhullint uddoitai.
10. Duda bhaxen tunvem mhaka otunk naim ani dohi zaunk sôddunk naim?
11. Haddamnim ani xiramnim tunvem mhoji kudd toiar kelea. Masan ani katin haddam revddaileant.
12. Tunvem sodanch mhaka mog ani jivit dilaim, ani tujea samballan mhaka jivont dovorlai.
13. Tea sogllea kallar, mhaka dukhovpak tum guptim ievzonneom kortaloi mhunnon atam mhaka somzolam.
14. Mhojem khoincheim patok bhogxina zaunk apleak karonn mellpak hanv patok adartam zalear tum mhojer chotur nodor dovortaloi.
15. Patok adarina fuddem, hanv tujê-xim trasant poddtam. Punn, hanv sarkem kortam Tedna mhaka xebaski mellona Hanv dolldiro ani lojen bhorlolo.
16. Kednaim mhaka ies mell'llem zalear, eka xinva porim tum mhaka dhôrtai mhaka dukhoiche khatir tum vismitam legit kortai.
17. Mhojea virudh sodanch tujê lagim nove-nove govai astat Tuzo rag, sodanch mhojê vatten choddot ani vaddot veta. Sodanch tum novem akromonn ievjit astai.
18. Tunvem mhaka zolmak ievunk kiteak nirmileim? Konnench mhaka pollovchê adim hanv melear odik borem zatem aslem.
19. Kusveantlean hanv sorôll fonddant gelolo zalear, mhozo kednach aspavuch naslolea bhaxen zatolem aslem.
20. Mhojem jivit sompot ievunk na? Mhaka eksuro sôdd Mhozo urla to kall Mhaka dhadosponn bhôgum di.
21. Hanv rokddoch vetolom ani kednanch porot ienvchona. Kallokh ani savlli asa tea ganvant vetolom.
22. Kallokhacho mornnache savllêcho ani gonddolacho ganv, zoim uzvadduch kallokh zaun asa thoim vetolo
