1 : ಗುಣವತಿಯಾದ ಹೆಂಡತಿಯನ್ನು ಪಡೆದವನು ಧನ್ಯನು ! ಇಮ್ಮಡಿಯಾಗುವುವು ಅವನ ಬಾಳಿನ ದಿನಗಳು.

2 : ಸದ್ಗುಣಿ ಆನಂದಪಡಿಸುವಳು ತನ್ನ ಗಂಡನನ್ನು ಇಂಥವನು ಸಮಾಧಾನದಿಂದ ಪೂರೈಸುವನು ಬದುಕನ್ನು.

3 : ಒಳ್ಳೆಯ ಹೆಂಡತಿ ಒಂದು ಸೌಭಾಗ್ಯ ಅಂಥವಳು ದೇವರಲ್ಲಿ ಭಯಭಕ್ತಿಯುಳ್ಳವನಿಗೆ ಲಭ್ಯ.

4 : ಅವನು ಬಡವನಿರಲಿ, ಬಲ್ಲಿದನಿರಲಿ ತೃಪ್ತನಾಗಿರುವನು. ಸಕಲ ಸಂದರ್ಭಗಳಲ್ಲಿ ಹಸನ್ಮುಖನಾಗಿರುವನು.

5 : ಮೂರು ವಿಷಯಗಳನ್ನು ಕುರಿತು ಅಳುಕಿತು ನನ್ನ ಹೃದಯ ನಾಲ್ಕನೆಯದನ್ನು ಕುರಿತು, ನನ್ನಲ್ಲುಂಟಾಯಿತು ಭಯ: ನಗರದ ನಿಂದೆ, ಪುಂಡರ ತಂಡ, ಸುಳ್ಳು ಆರೋಪ, ಇವು ಮರಣಕ್ಕಿಂತಲೂ ಭಯಂಕರ!

6 : ಆದರೆ ಇನ್ನೊಬ್ಬಳ ಮೇಲೆ ಹೊಟ್ಟೆಕಿಚ್ಚು ಪಡುವ ಸ್ತ್ರೀಯು ಎಲ್ಲರನ್ನೂ ನಿಂದಿಸುವ ಅವಳ ನಾಲಗೆಯು ಹೃದಯಾಘಾತವನ್ನು, ದುಃಖವನ್ನು ಉಂಟು ಮಾಡುವಂಥವು.

7 : ಕೆಟ್ಟ ಹೆಂಗಸು ಅತ್ತಿತ್ತ ಹೊಯ್ದಾಡುವ ನೊಗವಿದ್ದಂತೆ ಇಂಥವಳನ್ನು ಕಟ್ಟಿಕೊಂಡವನು ಚೇಳನ್ನು ಹಿಡಿದುಕೊಂಡವನಂತೆ.

8 : ಕುಡುಕಳು ಎಂಥವನಲ್ಲೂ ಕಡುಗೋಪ ಎಬ್ಬಿಸುವಳು ಇಂಥವಳು ತನ್ನ ಮಾನವನ್ನು ಸಹ ಮುಚ್ಚಿಕೊಳ್ಳಳು.

9 : ಹೆಣ್ಣಿನ ಸೂಳೆತನ ಕಂಡುಬರುವುದೆಲ್ಲಿ? ಅವಳ ಕಣ್ಣುಹೊಡೆತದಲ್ಲಿ, ರೆಪ್ಪೆಬಡಿತದಲ್ಲಿ.

10 : ಬಿಗಿಬಂಧನದಲ್ಲಿಡು ಮಾನವನ್ನರಿಯದ ಮಗಳನ್ನು ಇಲ್ಲದಿರೆ, ದುರುಪಯೋಗಿಸಿಕೊಂಡಾಳು ಸ್ವಾತಂತ್ರ್ಯವನ್ನು.

11 : ನಾಚಿಕೆಯಿಲ್ಲದ ಅವಳ ಕಣ್ಣಿನ ಬಗ್ಗೆ ಎಚ್ಚರಿಕೆ! ಆಶ್ಚರ್ಯಪಡಬೇಡ ಅದು ನಿನಗೆ ಕೆಡುಕುಮಾಡಿದರೆ.

12 : ನೀರಡಿಕೆಯುಳ್ಳ ದಾರಿಹೋಕನಂತೆ, ಸಿಕ್ಕಿದ ನೀರಿಗೆ ಬಾಯಿ ತೆರೆಯುವಳು ಪ್ರತೀಗೂಟದ ಬಳಿ ಕುಳಿತು, ಬಂದ ಬಾಣಕ್ಕೆ ಬತ್ತಳಿಕೆ ತೆರೆಯುವಳು.

13 : ಗಂಡನನ್ನು ಮೆಚ್ಚಿಸುವುದು ಹೆಂಡತಿಯ ಲಾವಣ್ಯ ಅವಳ ಬುದ್ಧಿವಂತಿಕೆಯಿಂದ ಅವನ ದೇಹಕ್ಕೆ ಮತ್ತಷ್ಟು ಚೈತನ್ಯ.

14 : ಮಿತಿಮಾತಿನ ಸತಿ ದೇವರಿಂದ ಬಂದ ವರವು ಸುಶಿಕ್ಷಿತ ಮನಸ್ಸಿಗೆ ಸಮಾನವಾದುದೊಂದೂ ಇಲ್ಲವು.

15 : ಲಜ್ಷಾಶೀಲ ಸತಿ ಚೆಲುವಿನ ಮೇಲೆ ಚೆಲುವಿದ್ದಂತೆ ಬೆಲೆಯೇ ಕಟ್ಟಲಾಗದು ಆಕೆಯ ಪಾತಿವ್ರತ್ಯಕ್ಕೆ.

16 : ಸರ್ವೇಶ್ವರನ ಉನ್ನತಾಕಾಶದಲ್ಲಿ ಏರುತ್ತಿರುವ ಸೂರ್ಯನೋಪಾದಿ ತನ್ನ ಮನೆತನವನ್ನೆಲ್ಲ ನೋಡಿಕೊಳ್ಳುವ ಸೊಬಗಿನ ಸತಿ.

17 : ಮುಪ್ಪಿನಕಾಲದಲ್ಲಿ ಹೊಳೆಯುವ ಮುಖ ದೀಪಸ್ತಂಭದ ಮೇಲೆ ಬೆಳಗುವ ದೀಪ.

18 : ಸ್ಥಿರಮನಸ್ಸಿನವಳ ಸುಂದರವಾದ ಪಾದ ಬೆಳ್ಳಿಯ ಗದ್ದುಗೆ ಮೇಲಿರಿಸಿದ ಬಂಗಾರದ ಕಂಭ.

19 : ಮಗನೇ, ನಿನ್ನ ಯೌವನದ ಹುರುಪು ಉತ್ಸಾಹವನ್ನು ಕಾಪಾಡು ನಿನ್ನ ಶಕ್ತಿಸಾಮಥ್ರ್ಯವನ್ನು ಅನ್ಯರೊಡನೆ ವ್ಯರ್ಥಮಾಡದಿರು.

20 : ಫಲವತ್ತಾದ ಭೂಮಿಯನ್ನು ಇಡೀ ಬಯಲಿನಲ್ಲಿ ಹುಡುಕು ನಿನ್ನ ಸ್ವಂತ ಬೀಜವನ್ನು ಅಲ್ಲಿ ಬಿತ್ತನೆ ಮಾಡು; ನಿನ್ನ ಬಿತ್ತನೆ ಕಾಳಿನಲಿ ನಂಬಿಕೆಯಿಡು.

21 : ಹೀಗೆ ನಿನ್ನ ಸಂತತಿ ಉತ್ಪನ್ನವಾಗಿ ಬೆಳೆಯುವುದು ತನ್ನ ಸಂತಾನ ಭಾಗ್ಯದಲ್ಲಿ ನಂಬಿಕೆಯಿಟ್ಟು ವೃದ್ಧಿಯಾಗುವುದು.

22 : ವೇಶ್ಯೆಯು ಉಗುಳಿಗಿಂತ ಬೀಳು ಗಂಡನಿರುವವಳು ಕೋಟೆಗಿಂತ ಗಟ್ಟಿಗಳು.

23 : ಅಧರ್ಮಿಯಾದ ಹೆಂಡತಿ ದೈವಾಜ್ಞೆ ಉಲ್ಲಂಘಿಸುವವನ ಗೋಳು ಭಕ್ತಿಯುಳ್ಳವಳಾದರೋ ದೇವರಿಗೆ ಭಯಪಡುವವನ ಮೋಜು.

24 : ನಾಚಿಕೆಯಿಲ್ಲದ ಹೆಂಡತಿಗೆ ನೀಚತನದಲ್ಲೂ ಒಸಗೆ ಶೀಲವತಿಗೆ ತನ್ನ ಗಂಡನ ಮುಂದೆಯೂ ನಾಚಿಕೆ.

25 : ಹಠಮಾರಿಯಾದ ನಾರಿ ನಾಯಿಯಂತೆ ಬೀಳು ಸಭ್ಯಳಾದರೋ ಸರ್ವೇಶ್ವರನಿಗೆ ಅಂಜುವಳು.

26 : ಗಂಡನನ್ನು ಗೌರವಿಸುವ ಹೆಂಡತಿಯನ್ನು ಜ್ಞಾನಿಯೆನ್ನುವರು ಗಂಡನನ್ನು ಗರ್ವದಿಂದ ಕಾಣುವವಳನ್ನು ಅಧರ್ಮಿಯೆಂದು ಕರೆವರು. ಗುಣವತಿಯಾದ ಹೆಂಡತಿಯನ್ನು ಪಡೆದವನು ಧನ್ಯನು !

27 : ವಾಚಾಳಿ ಹೆಂಡತಿಯ ದೊಡ್ಡ ನಾಲಿಗೆ ಶತ್ರುಗಳನ್ನೆಚ್ಚರಿಸುವ ಯುದ್ಧ ಕಹಳೆ ಇಂಥವಳನ್ನು ಕಟ್ಟಿಕೊಂಡಿರುವವನ ಜೀವನ ಕಲಹಕ್ರಾಂತಿಗೆ ಸಮಾನ.

28 : ನೊಂದಿದೆ ನನ್ನ ಮನಸ್ಸು ಎರಡು ವಿಷಯಗಳನು ಕುರಿತು; ನನಗೆ ಸಿಟ್ಟು ತರಿಸುತ್ತದೆ ಮೂರನೆಯದು: ಬಡತನದಲಿ ಬಳಲುತ್ತಿರುವ ಬಂಟನು ಕಸಕ್ಕೆ ಸಮಾನವಾಗಿ ಎಣಿಸಲಾದ ಜ್ಞಾನಿಯು ಪಾಪಮಾರ್ಗಕೆ ತಿರುಗುವ ಸಜ್ಜನನು ದೇವರು ಕತ್ತಿಗಾಗಿ ಸಿದ್ಧಗೊಳಿಸುವರು ಇಂಥವನನ್ನು.

29 : ವ್ಯಾಪಾರ ತಪ್ಪು ಮಾಡದಿರುವ ವ್ಯಾಪಾರಿ ಅಪರೂಪ ಪಾಪದಿಂದ ಮುಕ್ತನಲ್ಲ ಕಿರುಕುಳ ಕೊಡುವ ವರ್ತಕ.