1 : ಮಗನೇ, ದೇವರ ಸೇವೆಮಾಡಲು ಬಯಸುವಿಯೋ? ಹಾಗಾದರೆ ಶೋಧನೆಗಳನ್ನೆದುರಿಸಲು ನಿನ್ನಾತ್ಮವನ್ನು ಸಿದ್ಧಪಡಿಸಿಕೊ!

2 : ನಿನ್ನ ಹೃದಯದಲ್ಲಿರಲಿ ಪ್ರಾಮಾಣಿಕತೆ, ಸ್ಥಿರತೆ ಕಷ್ಟ ಬಂದಾಗ ನಿನಗಿರದಿರಲಿ ಚಂಚಲತೆ.

3 : ಆತನನ್ನು ಸೇರಿಕೊಂಡಿರು; ಬಿಟ್ಟಗಲಬೇಡ ಅಭಿವೃದ್ಧಿ ಹೊಂದುವೆ ಅಂತಿಮ ದಿನ.

4 : ನಿನ್ನ ಮೇಲೆ ಬಂದುದೆಲ್ಲವನು ಸ್ವೀಕರಿಸು ಬಡತನ ಬಂದರೂ ದೀರ್ಘಶಾಂತಿಯಿಂದಿರು.

5 : ಬಂಗಾರದ ಪರೀಕ್ಷೆಯಾಗುವುದು ಬೆಂಕಿಯಲ್ಲಿ ಆತನ ಭಕ್ತರ ಪರೀಕ್ಷೆ ಅವಮಾನದ ಕುಲುಮೆಯಲ್ಲಿ.

6 : ಆತನಲ್ಲಿಡು ಭರವಸೆ; ನೆರವೀಯುವನಾತ ನಿನಗೆ, ಸರಿಪಡಿಸಿಕೊ ನಿನ್ನ ನಡತೆಯನು; ನಿರೀಕ್ಷೆಯಿಡು ಆತನಲೇ.

7 : ದೇವರಲ್ಲಿ ಭಯಭಕ್ತಿಯುಳ್ಳವರೇ, ಆತನ ಕರುಣೆಗಾಗಿ ಕಾದಿರಿ ಸನ್ಮಾರ್ಗವನ್ನು ಬಿಟ್ಟು ತೊಲಗಬೇಡಿ; ಬಿದ್ದು ಹೋದೀರಿ!

8 : ದೇವರಿಗೆ ಭಯಪಡುವವರೇ, ಆತನಲ್ಲಿಡಿ ಭರವಸೆ ತಕ್ಕ ಪ್ರತಿಫಲ ದೊರಕುವುದು ನಿಮಗೆ ತಪ್ಪದೆ.

9 : ದೇವರಿಗೆ ಭಯಪಡುವವರೇ, ಒಳಿತನ್ನು ನಿರೀಕ್ಷಿಸಿರಿ ನಿತ್ಯ ಸಂತೋಷವನ್ನೂ ಕೃಪೆಯನ್ನೂ ಹಾರೈಸಿರಿ.

10 : ಹಿಂದಿನವರನ್ನು ಗಮನಿಸಿರಿ; ತಂದುಕೊಳ್ಳಿರಿ ಲಕ್ಷ್ಯಕೆ ದೇವರನ್ನು ನಂಬಿದವರಿಗೆ ಆಗಿದ್ದುಂಟೆ ನಾಚಿಕೆ? ಭಯಭಕ್ತಿಯಿಂದ ಬಾಳಿದವನನು ಆತ ಕೈಬಿಟ್ಟದ್ದುಂಟೆ?

11 : ಏಕೆನೆ, ಸರ್ವೇಶ್ವರನು ದಯಾಪೂರಿತನು, ಕನಿಕರವುಳ್ಳವನು ಪಾಪಗಳನ್ನು ಕ್ಷಮಿಸುವವನು, ಕಷ್ಟದಲ್ಲಿ ರಕ್ಷಿಸುವವನು.

12 : ಅಂಜುಬುರುಕರೇ, ದುರ್ಬಲರೇ, ಕಪಟ ಪಾಪಿಗಳೇ, ಧಿಕ್ಕಾರ ನಿಮಗೆ !

13 : ದುರ್ಬಲಮನಸ್ಸುಳ್ಳವನಿಗೆ ಧಿಕ್ಕಾರ! ಆತನಿಗೆ ನಂಬಿಕೆಯಿಲ್ಲ; ಎಂತಲೇ ಆಶ್ರಯ ದೊರಕುವುದಿಲ್ಲ.

14 : ಸಹನಾಶಕ್ತಿ ಕಳೆದುಕೊಂಡವರೇ, ನಿಮಗೆ ಧಿಕ್ಕಾರ ! ಏನು ಮಾಡುವಿರಿ ಆತ ನಿಮ್ಮನ್ನು ಪರೀಕ್ಷಿಸುವಾಗ ?

15 : ದೇವರಿಗೆ ಭಯಪಡುವವರು ಆತನ ಮಾತುಗಳನ್ನು ಮೀರರು ಆತನನ್ನು ಪ್ರೀತಿಸುವವರು ಆತನ ಮಾರ್ಗಗಳನ್ನು ಅನುಸರಿಸುವರು.

16 : ದೇವರಿಗೆ ಭಯಪಡುವವರು, ಅರಸುವರು ಆತನಿಗೆ ಮೆಚ್ಚಿಕೆಯಾದುದನೇ ಆತನನು ಪ್ರೀತಿಸುವವರು, ನಿರತರಾಗಿರುವರು ಆತನ ನಿಯಮಗಳಲೇ.

17 : ದೇವರಿಗೆ ಭಯಪಡುವವರು ಅಣಿಮಾಡುವರು ತಮ್ಮ ಹೃದಯಗಳನು ಆತನ ಮುಂದೆ ತಗ್ಗಿಸಿಕೊಳ್ಳುವರು ತಮ್ಮ ಅಂತರಾತ್ಮವನು.

18 : ಮಾನವನ ಕೈಗೆ ಸಿಕ್ಕಿಬೀಳದಂತೆ ಒಪ್ಪಿಸಿಬಿಡೋಣ ನಮ್ಮನ್ನೇ ದೇವರಿಗೆ ಕಾರಣ, ಆತನ ಮಹಿಮೆಯಿದ್ದಂತೆಯೇ ಇರುವುದು ಆತನ ಕೃಪೆ.