1. Israel porjê, aik aiz tumi Jordan Nôd utrun, tumchea poros vhoddlea ani bollixt porzancho ganv tumchea tabeant korchim zaleat. Tanchim xaram vhoddlim ani tanchim durgam itlim unch kitim mollbak tenkleant koxem dista.
2. Thoincho lôk unch ani ghôtt; tankam jigantt mhonnttat, ani tanchêkodde zhuzunk konnak kalliz zaina oxem tumi aikolam.
3. Punn tumi atam dekhtoleat ki tumcho Sorvespor, girasta toslea ujea porim, tumchea mukhar zhuzunk vetolo. Ani tumi panvol fuddem kaddtat titloch to tanchêvoir zoit vhortolo, ani tannem bhasailam toxem, tumchean tankam sottasott bhair ghalun, tankam nanch korunk zatolem.
4. Sorvesporan tankam tumchê khatir, thoincheô dhanvddailea uprant, ho ganv tumkam favo aslo dekhun tannem tumkam hanga haddleant oxem somzum nakat.' Na, Sorvespor tankam thoincheô bhair ghalta kiteak teô porza khotteô zaun asat.
5. Tumi borim ani nitt dekhunSorvespor tumkam tancheaganvant bhitôr kaddta oxem nhoi.To lôk khotto dekhun tankamthoinchim bhair kaddta; tech porim,tannem Abra-hamak, Izakak, aniJakobak dilli bhas to pallta.
6. Favo aslo dekhun Sorvesporan tumkam ho sufôll ganv divunk na, hem ekannem tumchea monant ghôtt dhôrat. Na, tumi apleach vadeachim.
7. Sorvesporak tumi oronneant koso rag haddlo tem visrum nakat. Ejiptantlim bhair sorleat to dis thaun hanga pavosor tumi bogor-bogor tacher kolpoleat.
8. Sinai dongrar legun tumi Sorvesporak rag haddlo, itlo, ki to tumcho bhosm korunk sôdtalo.
9. Sorvesporan tumchê kodde kel'lo tea koraracheô ladiô haddunk hanv voir dongrar gel'lom. Challis dis ani rati thoim ravlom, kãich hanvem khalem-pielem na.
10. Ani tumi dongra-xim ektthovl'leat tedna to ujeant thaun uloil'lo tumi aikol'lem tench tannem aplea hatant fatrachea don ladiancher boroun, teo ladiô mhojê-kodde dileô.
11. Challis disam uprant, tannem teô koraracheô donui ladiô mhojêkodde dileô,
12. ani mhaka mhollem, 'Chol, hangacho vegim voch, kiteak, Ejiptantli bhair kaddun haddloli ti porza tuji padd zaun atam khotteponn adarta. Hanvem dakhoil'lea margaveli ti koddsorlea ani êk murti korun tika bhozta.'
13. Ani Sorvesporan mhaka hem-i sanglem, 'Hi porza aploch vado korta mhonn hanv zannom.
14. Atam tum mhaka addaun dhôrum naka. Tancho ugddas legun konnak urchona tê porim hanv tancho bhosm kortam. Magir, hea loka poros vhôdd ani bollixt porjecho tuka bapui korun dovortam.'
15. Mhonnttôch, teô koraracheô don ladiô ghevun, hanv dongravelo sokla denvlom. Dongrant thaun ujeachim kenddam bhair sortalim.
16. Sorvesporan tumkam dil'lea updesancher add geleat tem hanvem dekhlem, ki tumi êk dhatucho paddko korun tacher pap adarlem.
17. Tôr, thoinchea-thoinch, tumchea fuddeant hanvem teô donui laddiô xevttun tanche kuddke kele.
18. Magir, hanv ani ek pavtt sorpottun Sorvesporachea fuddeant challis dis ani rati, jevnastana-pienastana, ravlom. Sorvesporacher tumi pap adarlem ani tacho rag zagoilo dekhun hanvem toxem kelem.
19. Hanv ekannem Sorvesporachea ragak bhieun aslom, kiteak tumkam to pusun uddounk sôdtalo; punn ani ek pavtt tannem mhojea magnneak kan dilo.
20. Aaronacher legun to ragar zal'lo ani tacho jiv kaddunk sôdtalo; punn hanvem tachê-i pasot maglem.
21. Ani tumi kel'li ti ollxiki vost, dhatucho paddo, hanvem ti gheun ujeant uddoili. Magir, ti dhaddaun tichi pudd keli ani dongrar thaun zhôr vhanvtali tea udkant ti uddoili.
22. Tabera, Massa, ani Kibroth Hattaava hanga-i tumi Sorvesporacho rag zagoilo.
23. Ani Kadesh Barnea thaun 'tumkam to ganv tumchea tabeant ghevunk dhaddlole' tedna, tumi tacher kolpoleat ani tacher visvas dovorlona.
24. Ani hanv tumkam vollkhotam tea pormannem, tumi sodanch Sorvesporacher kolpoleat.
25. Mhonnttôch, te challis dis ani rati hanv, sorpottun ani dhornik mhojem tondd tenkoun, Sorvespora mukhar ravlom, kiteak tumcho bhosm korunk tannem ievjil'lem.
26. Ani hanvem maglem, 'Sorvespora, tujech porjechem nisontton korum naka; tuvench tika Ejiptantli nivarleai ani vortea bolla-podven thoinchi bhair kaddun haddleai.
27. Abraham', Izak, ani Jakob hea tujea sevokancho ugddas kôr, anii hê porjecho vado, tanchi vikottai ani tanchem pap visor.
28. Na tôr, 'tujean tika bhasilolea ganvant vhorunk zalem na', oxem Ejiptantlo lôk mhonnttolo. 'Dekhun tika oronneant vhorun nanch keli, itlo Tum tika zolltaloi.'
29. Zalench zalear, ti Tuji khas porza, Tunvench tika vinchun kaddun Ejiptantli sôddoun haddleai.'
