1. Patthlean vôllun, ami, Sorvesporan formail'lem tê porim, Aqaba Khollient veta tea rosteantlean oronneant bhitôr sorleanv ani Edomachea dongri-ganvantlean firun ami zaito kall thoim sarlo.
2. Tedna Sorvesporan mhaka sanglem, ki,
3. hea dongrancher ami zaito kall sarlo dekhun, atam ut'torê-vatten ami vechem.
4. Ani tumkam hi xikounn di mhonn tannem mhaka sanglem, Tumi atam Edomachea dongri-ganvantlean veche asat, ho ganv tumchea poixileam soireancho, Esauchi sonsôt. Te tumkam bhietole,
5. punn tumi tancher zhuz korchem nhoi, kiteak tanchê zomnichi êk vet-bhor suvat tumkam mellchina. Hanvem Edom Esauchê sonstik dilam.
6. Goroz zalear, tumchean tanchê koddlem jevonn ani udok viktem gheum-iet.
7. Sorvesporan, tumchea Devan, tumkam soglleant aplo axirvad dila, hem visrum nakat. Tumi lamb-rund oronneantlean gunvtaleat tedna Tannem tumkam rakhleat. Him challis vorsam To tumchea sangatak ravla, ani goroz titlem-i tumkam mell'lam.
8. Ami fuddem tankun geleanv, ani Elat ani Eziongeber hea xarantlean Mel'lea Doria-xim veta to rosto ami sôddlo, ani ut'tor-purv vatten vochun Moab ganvant pavleanv.
9. Sorvesporan mhaka mhollem, 'Moabachea lokak koxtt dium nakat, hi Lotachi sonsôt zaun asa, vô tanchê lagim zhuz korum nakat. Hanvem tankam Ar hem xar dilam, ani tanchea ganvcho êk kuddko tumkam diuncho na.'
10. (Bollixt amchi sonsôt, Emim' nanvachi, Ar xarant jietali. He Anakim-hanche itle unch asle; Anakim' he-i bollixttanchi ani ek sonsôt.
11. Hankam ani tankam Refaim oxe-i pacharit; punn Moabacho lôk tankam Enim' oxem mhunnot.
12. Horit-lôk Edom ganvant jietale, punn Esauchê sonstin tankam thoinche dhanvddaile, tanchê porjecho bhosm kelo, ani apunn thoim rigle; tech porim, magir, Israel porjen aplea dusmanank, Devan tankam dil'lo tea ganvantle bhair ghale.)
13. Uprant, Sorvesporan hukumak pallo diun, ami Zered Nôd utôrleanv.
14. Ani hem, Kadesh Barnea ami sôddun, atth-tis (38) vorsam zalea uprant, tê sonstintle zhuzari, Sorvesporan sangun dil'lem toxem, soglle morun gele.
15. Te soglle moro porian Sorvespor tanchê virudh aslo.
16. Te soglle melea uprant,
17. Sorvespora Devan amkam mhollem,
18. Aiz tumi, Ar xara-lagchean, Moabachea ganvantlean vetoleat.
19. Tedna tumi Amonitanchea ganvak laginch astoleat, hi Lotachi sonsôt.Tumi tankam koxtt dium nakat, ani tancher zhuz korum nakat, kiteak tankam dila tea ganvchem tumkam kãich mellchem na.'
20. (Hea ganvak Refaim oxem-i mhonnttat thoim ravtale tea lokachem nanv; Ammonit lôk tankam Zamzum-mim hê porim pachartat.
21. Te Anakim-loka porim, unch sonsôt zaun asle; te zaite asle ani bollixt porza. Punn Sorvesporan tankam nanch kele, ani Ammonit-lôk thoim vochun riglo.
22. Sorvesporan Edomit-lokak toxench kel'lem; he Esauchi sonsôt, atam Edomachea dongri-ganvant rigun asat. Tannem Horit-lokak toxench kel'lem, ani Edomit-lôk tanchea ganvant riglo, ani ozunui thoim asa.
23. Doriachê deger Kretachi porza jietali. Tanni Avvim mulki-lokak nanch kel'le, ani Gaza xar porian, dokhinnê vatten, tancho ganv ghetlolo.)
24. Moabachea ganvantlean ami gelea uprant, Sorvesporan amkam mhollem, 'Atam tumi Arnon Nôd utrun vochat. Sihonak, Amoritanchea patxaiak tumchea hatant sôddun ditam, tachem xar ani urlolo tacho ganv. Tacher zhuz manddat, ani ganv jikhun gheiat.
25. Aiz thaun soglleanchea kallzant tumchi bhirant rigoitolom. Tumchem nanvuch aikun te kamptole.'
26. Uprant, Kedemot oronneant thaun, sovostkaiecho nirôp divun, hanvem Heshbonachea Sihon patxaia thaim monis patthoile:
27. Tumchea ganvantlean vochunk amkam vatt di. Ami nitt rostean vetoleanv, ani margavele koddsorche nanv.
28. Ami jietanv ani pietanv taka farik kortoleanv. Amkam fokot tumchea ganvantlean vochunk vatt zai,
29. Jordan Nôd ami utrun vocho-sor- ho ganv Sorvespor amkam dita. Esauchi sonsôt, Edom-ganvant ravta tinnem, ani Ar xarant ravtolea lokan aplea ganvantlean amkam vatt dilea.'
30. Punn Sihon patxai aikona zalo. Sorvespora Devan taka dharunn kelo ani to Devacher kolpolo; ani hem, ami tacher zoit vhorun tacho ganv amchea tabeant korchê khatir, Sorvesporan toxem kelem.
31. Tedna Sorvesporan mhaka mhollem, 'Polle, hanvem Sihon Patxaiak ani tacho ganv tumchea hatant sôddla; tumi, vochun, to tumchea tabeant korat.'
32. Sihon sogllea aplea mon'xank gheun, Jahaz xara-xim, amchê virudh zhuzunk ailo,
33. punn Sorvesporan taka amchea bollixt hatant sôddlo, ani ami tacho, tachea putancho, ani sogllea tachea mon'xancho jiv kaddlo.
34. Sogllim tachim xaram jikhun tim padd kelim, ani dadleank, bailank, ani bhurgeank marun uddoilim. Konn jivo urlona.
35. Thoinchim gorvam-vasram ami ukhollim, ani thoim aslem titlem-i luttlem.
36. Sorvesporan sogllem amchea hatant sôddlem, ani tanchim xaram, Aroer thaun Arnon Gholachê deger, teach gholantlem maz xar, ani thoim thaun Gilead porian amchea hatant poddlem. Amchea bolla pormannem tanchim durgam amkam kãich nhoi zalim.
37. Punn ami Ammonit-lokachea xaramnim, vô Jabbok Nodi-xim, vô dongor-ganvamnim, vô khoinsoruch Sorvesporan amkam mona kel'lem thoim ami vochunk nanv.'
