1. Him mhojim utram tumchea jivitant khorim zatolim tedna, tumchê mukhar hanvem dovorlolo axirvad ani magir xirap tumi bhôgunk pavtoleat tedna, zoim-zoim raxttram modem Sorvespor tumcho Dev tumkam zollim-mollim ximpddaitolo, thoim hem sogllem nihallun tumchea kallzak khont bhògtoli ani Sorvespora tumchea Deva-xim
2. tumi novean portun ietoleat; ani hanv tumkam aiz kaide ghaltam tea soglleamnim Tacho tallo sogllea tumchea kallzan ani monan tumi novean aikotoleat;
3. ani Sorvespor tumcho Dev tumchea nirvaxit koidiank portun haddtolo, To tumchi doia kortolo ani Sorvespora tumchea Devan tumkam ximpddaileant tea-tea lokam modlim tumkam kaddun novean To ektthaim kortolo.
4. Mollbachea ximam porian tumi ximpddon pavxat zalear, thoim thaun legit Sorvespor tumcho Dev tumkam zomoitolo, tumkam portun haddunk thoim porian vetolo,
5. ani purvozanchea ganvant porot haddun to ganv tumchea tabeant kortolo. Ani tumchea purvozam poros tumchi sonsôt vaddoitolo ani odik sukhi kortolo.
6. Sogllea tumchea kallzan tacho mog korunk, ani sodankal hea ganvant tumi jieunchê khatir, Sorvespor tumcho Dev tumchim ani tumchê sonstichim kallzam khaltim kortolo.
7. Tumcher poddlole te xirap atam tumchea dusmanancher poddtole, kiteak hannim tumkam pidda-pidd dili,
8. ani tumi Sorvespora tumchea Devacho mog kortoleat ani aiz ditam te soglle tache kaide palltoleat.
9. Sorvespor tumcho Dev tumchea vavracher aplo axirvad ghaltolo, zaitim bhurgim-ballam, puskôll jiv-jivon ani bhorpur pik tumkam ditolo, ani tumchea purvozank kel'lê tê porim tumkam-i sukhi korunk to sontostolo.
10. Sorvespora tujea Devacho tallo aik, ani hê Somurtichea pustokacher boroiloleô asat teô adnia ani kaide samball ani sogllea tujea kallzan ani atmean Sorvespora tujea Deva-xim tum portun ie.
11. Kiteak aiz hanv tuka ditam ti Somurt tujê sokti poros vhôdd nhoi ani tujean ti pallunk zata.
12. Ti sorgar na, mhonnttôch tunvem ojap zaun mhonnunk zaina: Ami ti aikun samballcheak, amchê vo tim sorgar vochun tika khala amchê-xim konn haddtolo?
13. Na mhonn ti somdiram pelean na, mhonnttôch tunvem ojap zaun mhonnunk zaina: Ami ti aikun pallcheak, amchê votim konn somdir utortolo ani tika amchê-xim haddtolo?
14. Portench zalear, Utor tujê boglekuch asa, tunvem tem pallcheak tem tujea tonddant ani kallzant asa.
15. Polle, aiz jivit ani sukh, moronn ani dukh, hanvem tumchê mukhar dakhol keleant.
16. Sorvespora tumchea Devacheô jeô adnia hanvem tumkam aiz dileat, teô zôr tumi pallxat, zôr tumi tumchea Sorvespora Devacho mog korun Tachea vattamnim cholxat, zôr Tacheô adnia, kaide ani nem' pallxat, tôr tumi jietoleat ani tumchi sonsôt vaddtoli; ani tumi bhitôr sorun tumchea tabeant kortoleat tea desant Sorvespor tumcho Dev tumcher axirvad ghaltolo.
17. Punn tumchem kalliz pois koddsorun vochot zalear, tumi aikona zaxat zalear, bhulovnnechea fasank sampddun dusrea devam pattlean vexat zalear, ani tanchi puza korxat zalear,
18. aiz hanv tumkam sangtam: tumi sogllim bhogsonnem nastana mortoleat; Jordan nôd utrun tumi bhitôr sortoleat ani aplea tabeant kortoleat tea desant tumi chôdd kall ravunk pavchim nant.
19. Aiz, sorgak ani sonvsarak tumchê virudh govai diunk hanv ulo kortam: jivit vô moronn, axirvad vô xirap tumchê mukhar hanv ghaltam. Tôr jivit vinchun kaddat ani oxem tumi ani tumchi sonsôt
20. Sorvespora tumchea Devachea mogan, Tacheô adnia pallun ani Takach chikttun jietoleat; kiteak hantunt attaplolem asa tumchem jivit, ani zo dês Sorvespora Devan tumchea purvozank Abrahamak, Izakak ani Jakobak tumi thoim jieuncheak bhasailolo, tea desant tumchem lamb auk hantunch attaplolem asa.'
