1. Moizesan ak'khea Israelak oxem sanglem:
2. Mhaka ekxem-vis vorsam bhòrlim; ani atam mhojean mhaka zai toxem bhair-bhitôr sorunk zaina. Tea bhair Sorvesporan-ui mhaka sanglam: Tum hi Jordan nôd utorcho naim.
3. Sorvespor tuzo Dev tujê mukhar vetolo; hea raxttranchem nisontton korun tankam tumchê adhin kortolo; ani Sorvesporan sanglam toxem Joshua tumchê mukhar vetolo.
4. Sihon ani Og hea Amoritanchea razanchem ani tanchea ganvanchem Sorvesporan nisontton kelem, toxem tanchem-i kortolo.
5. Ani Sorvespor tankam tumchê adhin kortolo, ani hanvem tumkam ghal'lea hukuma pormannem tumi tanchê thaim kortoleat.
6. Dhir gheiat ani ghôtt ravat; tankam bhienakat, tanchê mukhar kampum nakat, kiteak Sorvespor tuzo Dev tujê borabor choltolo, To tuka visorcho na, na mhonn sanddcho-i na.'
7. Tedna Moizesan Joshuak apoilo ani ak'khea Israelachê hujir taka mhollem: 'Dhir ghe ani ghôtt rav; zo dês Sorvesporan tanchea purvozank ditolo mhonn soput dila, tea desant tanchê borabor tum bhitôr sortoloi; ani tunch to tanchê adhin kortoloi.
8. Sorvespor tujê mukhar choltolo; To tujê borabor astolo, tuka sôddchona ani sanddcho-i na; bhieum naka, ang kaddum naka!'
9. Moizesan Devachi Sumurt boroili ani ti iadnikam kodde, Levichea putam lagim ani, tech porim, Israel porjechea mukheleam kodde dili. Sorvesporachea Korarachi Arkpett iadnikam kodde, Levichea putam lagim asli.
10. Tankam oxem formailem, 'Dôr Satvea Vorsa, rinnanchi mafi diunchea somoiar, Mattvanchii Porob zata tedna hi Sumurt vhoddlean vach'chi.
11. Israel porza, man-nomoskarachea ekach zagear Sorvespora, tumchea Devak man-nomoskar diunk ieta tedna,
12. sogllea dadleank, bailank ani bhurgeank, toxench, tumchea ganvant jietolea porkea-lokak ektthaim korchim, ani ti Sumurt vach'chi; hê porim soglle Sorvespora tumchea Devak man diunk ani tache kaide pallunk xiktole.
13. Ani tumchi sonsôt, tãnnim kednanch hi Sumurt aikunk na tim-i xiktolim, ani Jordan-poltoddchea ganvant ti palltolim.'
14. Sorvesporan Moizesak mhollem, 'Atam tum anink chodd vanch'chonaim. Joshuak apoi, ani taka mhojea Tombunt gheun ie; tannem kitem korchem asa tem hanv taka xikoitam.' Moizes ani Joshua Tombunt gele,
15. ani thoim Sorvespor eka kup-khambeachea rupan dakhol zalo, ani hem kup Tombuchea darar ravlem.
16. Sorvesporan Moizesak mhollem, 'Tum atam rokddoch mortoloi, ani tujea mornna uprant, porza mhaka dusvaxi zatoli ani hanvem kelolo korar ti môddtoli. Mhaka sanddun,tim thoinchea kuddea devank bhoztolim.
17. Tedna tancher mhozo rag ubzotolo, ani hanv tankam sôddtolom ani nanch korun uddoitolom. Sogllea jin'sachem nirbhag tancher ietôch, hanv, tancho Sorvespor-Dev, tanchea sangatak na mhonn tankam gomtolem.
18. Mhaka ulo marlear, hanv tanchea adarak ieunchona kiteak te dusrea devank bhozleat.
19. Atam hem git boroi, ani tankam xikoi; ani hem tanchê virudh govai zaun astolem.
20. Hanvem tanchea purvozank bhasailam tê porim, tankam borea ani sufôll ganvant vhortolom. Goroz titlem-i jevonn-khann thoim astolem, ani koslich oddchonn nastana tanchean jieunk zatolem. Punn tim mhojê sorxilim koddsortolim ani dusrea devank bhôztolim. Mhaka patt vôllun mhozo korar môddtolim,
21. ani nirbhagacho paus tancher ietolo. Punn hem git tim gaitolim ani tanchê virudh tem govai ditolem. Atanch legit tankam bhasailolea ganvant pavounchê adim, tim kitem chint'tat tem hanv zannom.'
22. Teach disa Moizesan tem git boroilem ani porjek xikoilem.
23. Tea uprant, Sorvespor Joshua, Nunachea putakodde uloilo ani taka mhollem, 'Ghôtt rav ani mhojer visvas dhôr. Hanvem bhasailam tea ganvant Israel porjek tum vhortoloi, ani hanv tujea sangatak astolom.'
24. Moizesan, kãich bhairainastana, ak'khi Sorvesporachi Sumurt eka pustokant boroun dovorli.
25. Boroun sompoilea uprant, tannem tem pustok Korarachi Arkpett samballtolea levitam kodde divun, mhollem,
26. Hem Sorvesporachê Somurtichem pustok vhorat, ani Sorvesporachea Korarachi Arkpett asa thoim dovrat, ani hem porjê virudh êk govai zaun astolem.
27. Tim aplea vadeachim ani nibôr manechim mhonn hanv zannom. Mhojea jivitant sobar pavtti tim Sorvesporacher kolpoleant, ani hanv mortôch tim odikuch kolpotolim.
28. Sorv kullanchea mukheliank ani opxalank mhojea fuddeant ektthaim korat, ani heô vostu hanv tankam kollit kortam. Tanchê virudh govai zaunk hanv sorgak ani prithumek ulo martam.
29. Hanv mortôch, hi porza odikuch vikôtt zatoli ani hanvem xikoilam titlem-i nakartoli, hem hanv zannom. Ani tancher nirbhag ieta mhunnosor chodd kall vechona, kiteak Sorvespora-Devan addvarlolem tãnnim kelem.'
30. Magir, Moizesan sogllem git mhollem, ani tem porjek xikoilem.
