1. Tumchea Sorvespora Devacho mog korat ani tachea kaideank sodanch khaltim zaiat.
2. Sorvespora vixim tumi zaitem dekhlam ani aikolam, hem bhag tumchea bhurgeank mellchem na; tea pasot tumi tem visorchem nhoi. Sorvespora Devachi thorai, tachi podvi ani
3. tachim vismitam tumi dekhleant. Ejiptantlea patxaiak ani tachea desak kitem kelem tem sogllem tumchea dolleam mukhar ghoddlem.
4. Tachea loskorank, ghoddeank ani zhuzachea gaddieank, tumchê patthik laglolim tedna, Tambddea Doriant buddoun marlim hem tumkam thavem.
5. Tumi hanga pavchea adim, oronneant tumkam kitem kelem tem tumi borem zannot.
6. Dathan ani Abiram', hea Reubenachea kullachea ani Eliabachea putank kelem tem matxem monant haddat. Soglleanchea dolleam mukhar, zomin ukti zali ani ztankam jivech gill'le, ani tanchea sangata, tanchim kuttumbam, tanche chakor, tanche tombu ani tanchim zonavoram hem sogllem zomnichea pottant gelem.
7. Hôi, hem sogllem tumi dekhlam, him Sorvesporan adarlolim koutukam.
8. Aiz hanvem tumkam dileat tea sogllea kaideank tumi khaltim zaiat. Tedna tumi sompeponnim Jordan Nôd utrun, bhitôr sortat te ganv tumchea tabeant gheunk pavtoleat.
9. Ani Sorvesporan tumchea purvozank ani hanchê sonstik diunk bhasailolea astig ani sufôll ganvant zaitim vorsam jietoleat.
10. Tumi atam bhitôr sortoleat to Ejiptachea ganva bhaxen nhoi. Hanga tumi zaitim vorsam jieleat. Tumi vomptaleat, punn zomin ximpunk tumkam borech koxtt poddtale;
11. punn atam bhitôr sortoleat to ganv dongram-gholancho, ani pavs zomin ximpta.
12. Sorvespor hê zomnichi poramos korta ani voros-bhor zomnichi zoton korit ravta.
13. Tôr, aiz hanvem tumkam dileat te kaide pallat; Sorvesporacho mog korat, ani sogllea tumchea kallzan tachê sevek lagat.
14. Hê porim, tumchea xetak goroz tedna to pavs ghaltolo, gimant toxem vosontint, ani tumkam orôv piktolo ani soro ani tel astolem,
15. ani tumchea gorvam-hinddank puskoll chorôv. Tumkam goroz titlem-i jevonn-khann astolem.
16. Punn Sorvespora sorxilim koddsorun, heram devank bhozum nakat.
17. Oxem korxat zalear, Sorvespor tumcher ragar zatolo. Tumkam pavs ghalchona, tumchi zomin suktoli, ani xetank kãich pikchem na. Ani zomin bori-sufôll astana, tumi vollvollun thoim mortoleat.
18. Him mhojim utram tumchea kallzant ani otmeant khonchoun dovrat ani tim tumchea hatak êk khunna koxi, ani tumchea kopalar êk toktto koso, bandat.
19. Tumchea bhurgeank te xikoiat. Ghorant zanv ghora-bhair, visovant zanv vavrant tumchea mona-tonddant gholloiat.
20. Tumchea ghorachea darachea kovddancher ani darvontteancher te boroiat.
21. Tedna tumi ani tumchim bhurgim, Sorvesporan tumchea purvozank diunk bhasailolea ganvant lamb auk bhogtoleat. Zomni voir mollob asosor tumi jietoleat.
22. Hanvem tumkam dileat tê porim sogllea kaideank pallo diat: Tumchea Sorvesporacho mog korat, tachea formonnank pallo diat, ani taka visvaxi ravat.
23. Tednach to hea sogllea porzank, tumi fuddem sortat titlech, hangacheô bhair ghaltolo ani tumchea poros vortea ani bollixt porzanchea ganvant bhitôr sorun to ganv aplea tabeant ghetoleat.
24. Tumi panvol ghaltat titlo-i ganv tumcho zaun astolo. Ani tumchea ganvcheô ximô: dokhinnechê vatten, oronneant thaun Lebanonache dongor porian ut'torik; Eufrates Nôd udentek, ani Bhumodheô Doria ostomtek.
25. Tea ganvant, tumi vetat thoim, Sorvespor sogllea lokachea kallzant tumchi bhirant rigoitolo, oxem tannench bhasailam, ani konnuch tumkam addaunchona.
26. Polleiat, aichea disa tumchê mukhar axirvad ani xirap hanv ghaltam:
27. aiz hanvem tumkam amchea Sorvespora Devacheô adnia ditam teô tumi pallxat zalear, tumcher axirvad;
28. ani Sorvespora tumchea Devacheô adnia tumi môddxat zalear ani aiz hanvem tumkam rosto dakhoila to sôddun, tumi vollkhunk na tea devam pattlean vexat zalear, tumcher xirap!
29. Tumi tumchea tabeant gheuncho asa tea ganvant, Sorvespor tumkam pavoitôch, tantli êk vost sobhemazar porgôttat: axirvad Gerizim Dongrar thaun, ani xirap Ebal Dongrar thaun.
30. (He donui dongor Jordan Nodichê ostontek urtat, Kanaanitanchea ganvant, Jordanachea Gholant. Ostomtechê vatten, Moreche povitr ruk asat tankam chodd pois nhoi, Gilgalachea xara-xim.)
31. Tumi atam Jordan Nôd utôrchech asat, ani Sorvespor tumkam dita to ganv tumchea tabeant gheunk lagim pavleat. To ganv gheun, tumi thoim thikann kortoch,
32. aiz tumkam ditam te soglle kaide samballunk visrum nakat.'
