1. Moizesan, Israelachea mukheleam hujir mhollem, 'Aiz hanv tumkam ditam tê xikounnek tumi khaltim zaiat.
2. Jordan Nôd utrun, Sorvespor Dev tumkam dita tea ganvant tumi bhitôr sortat tea disa, vhoddle fator manddat ani tankam chuno kaddun,
3. Sorvespora Devache kaide ani xikounn tancher boroun dovrat. Zo sufôll ganv tumkam diunk, tumchea purvozanchea Sorvespora Devan bhasailolem tea ganvant rigcheak,
4. Tumi Jordana-poltoddi pavtôch, Ebal Dongrar, aiz hanv tumkam sangtam tê porim te fator manddat ani tankam chuno kaddat.
5. Chirunk-tasunk naslolea fatranchi thoim êk vedi bandat.
6. Sorvesporak vedi bandtat taka loknddachem hatiar lagunk upkarona. Hacher tumcheô hom'-bhettô zatoleô,
7. tech porim tumcheô ekvottacheô bhettô khaun tumi Sorvesporachea fuddeant sontostoleat.
8. Hea chuno kaddlolea fatrancher Sorvespora Devache soglle kaide xikounn spoxttponnim boroun dovrat.'
9. Magir, Moizesan Israelachea mukheleam hujir, porjek mhollem, 'Israel porjê, hanv aiz sangtam tem chitan aikat: Aiz tumi Sorvespora-Devachi porza zaleat.
10. Tôr, taka khaltim ravat, ani aiz hanv tumkam ditam te kaide samballat.'
11. Uprant, Moizesan Israel porjek mhollem,
12. Tumi Jordan utorlea uprant, porjecher axirvad ghaltana, Gerizim Dongracher ubim ravtolim tim kullam him: Simeon, Levi, Juda, Issakar, Juze, ani Benjamin.
13. Ani xirap uchartana, Ebal Dongrar ubim ravtolim tim kullam him: Reuben, Gad, Asher, Zebulun, Dan, ani Naftali.
14. Levit nibra tallean oxem mhonnttole
15. Konn-ui fatrachi, lankddachi, vô dhatuchi murti korun tika gupit bhozta tacher xirap; Sorvespor Dev murti-pujek vitteta, ani soglli porza zobab ditoli, Amen!
16. Konn-ui bapaik vô avoik okman korta tacher xirap! Ani soglli porza zobab ditoli, Amen!
17. Konn-ui peleachea bhatta-bensachi xim-mer haloita tacher xirap. Ani soglli porza zobab ditoli, Amen!
18. Konn-ui eka kudd'ddeak vankddê vatten choloun vhorta tacher xirap. Ani soglli porza mhonnttoli, Amen!
19. Konn-ui porkea-lokak, bapui naslolea bhurgeank, ani vidvek tanche hok'k nakarta tacher xirap. Ani soglli porza mhonnttoli, Amen!
20. Konn-ui apleach bapaichê bailêkodde produar adarta tacher xirap. Ani soglli porza zobab ditoli, Amen!
21. Konn-ui eka zonavorakodde lingi-ekvott korta tacher xirap. Ani soglli porza zobab ditoli, Amen!
22. Konn-ui aplê bhoinni vô sovot-bhoinni kodde ekvott korta tacher xirap. Ani soglli porza zobab ditoli, Amen!
23. Konn-ui aplê sasu kodde produar adarta tacher xirap. Ani soglli porza zobab ditoli, Amen!
24. Konn-ui dusreacho guptim jiv kaddta tacher xirap. Ani soglli porza zobab ditoli, Amen!
25. Konn-ui eka niropradi mon'xacho jiv kaddunk duddu gheta tacher xirap. Ani soglli porza zobab ditoli, Amen!
26. Konn-ui Devachea sogllea kaideank ani tachê xikounnek pallo dina tacher xirap. Ani soglli porza zobab ditoli, Amen!'
