1. Tumchea purvozancho Sorvespor tumkam ditolo tea ganvant, tumi aso-sor, kaide samballunk zai te he: Aikun gheiat!
2. Jea porzanche ganv tumi ghetoleat, tanche man-nomoskarache soglle zage nikllaiat, unch dongrancher, porvotancher, ani sorv hirvea zhaddam tolla.
3. Tancheô vedi sokla ghalat, fatranche khambe môddun uddoiat. Tancheô Ashera devicheô kuru-khunna hulpaiat, ani thoim tankam kednanch bhôzunk pavchenant toxem korat.
4. Ho lôk aplea devank bhoztat tê porim tumchea Sorvespora Devak man-nomoskar dium nakat.
5. Sorv kullanchea ganvam modli ekuch suvat Sorvespor Dev aplea man-nomoskarak vinchun kaddtolo thoim soglleamnim vechem.
6. Heach zagear tumcheô hom'-bhettô, ani urloleô bhettô, tumcho dhavo vantto-divop ani her dennim, angovnnecheô ani khoxecheô bhettô, ani tumchea gorvam-menddranchim malgoddim tumi thoim bhettoitoleat.
7. Thoim, tumchea Sorvesporachea fuddeant tumi ani tumchem kuttumb tumchea vavracho foll khaun taka sontosan dhinvastoleat.
8. To dis pavtôch, atam tumi kortat toxem korunk favona. Aiz pasun tumkam zait toxe bhoztat,
9. kiteak, Sorvespor tumkam ditolo tea ganvant ozun pavunk nant, thoim tumi sovostkaien jietoleat.
10. Tumi Jordan Nodi poltoddi pavtôch Sorvespor tumkam to ganv tumchea tabeant kortolo. To tumkam dusmanam-meklle dovortolo, ani tumi sovostkaien jietoleat.
11. Sorvesporak tumi man-nomoskar diupak, tannench vinchun kaddlolo ekuch zago astolo, ani thoim, hanvem tumkam formailam titlem-i tumi haddunk zai: tumcheô hom'-bhettô ani her bhettô, dhavo vantto-divop ani tumchim dan-dennim, ani tumi Sorvesporak angoileat teô kherit bhettô.
12. Thoim, Sorvesporachea fuddeant sontosbhorit zaiat, tumi, tumchea bhurgeam ani chakram sangata, ani tumchea xarant jietolea Levitam borabor; Levitank tumchea ganvant koslench daiz aschem na mhonn monant dhôrat.
13. Tumcheô bhettô korunk, tumkam zai to zago vinchun kaddum nozo.
14. Punn fokot Sorvespor vinchun kaddit tea kullak dil'lea ganvant. Heach zagear tumcheô hom'-bhettô ani hanvem formailam titlem-i tumi korunk zai.
15. Punn tumi jietat thoim tumchim zonavoram marun tumchean tim khaum-iet. Ani Sorvespor tumkam diit titlim tumchean khaum-iet. Riti pormannem xud'dh vô oxud'dh asum, soglleanchean tim khaum-iet, mervachem vô chitalachem mas khatat tê porim.
16. Punn tachem rogot tumi khaunchem nhoi; udka porim tem zomnir vharounchem.
17. Sorvesporak bhettoitat tantlem kãich tumi ravtat tea zagear khaunchem nhoi: tumchea orovacho dhavo vantto zanv, vô soro-tel, vô tumchea hinddantlo malgoddo, vô khoxecheô vô her bhettô Sorvesporak kortat tantlem.
18. Punn tumi, tumchim bhurgim ani chakor ani Levit hea bhettencho vantto poddta to Sorvesporachea fuddeant, tannem vinchun kaddlolea ekach zagear khatoleat. Ani tumkam bori suttka mell'li dekhun tumi sontosunk favo.
19. Ani Levit tumchea ganvant aso-sor tankam visrum nakat.
20. Sorvesporan bhasailam tê porim tumcho ganv vaddun vochot zalear, 'tumchean zai tedna mas khaunk zatolem.'
21. Ekuch nomoskaracho zago pois urta zalear, tumkam sanglam toxem Devan tumkam dileant tim hinddantlim zonavoram marun tumcheanch ghoramnim khaum-iet.
22. Xud'dh vô oxud'dh to asum, konnachean-ui tem mas khaunk zata, chital-mervachem khatat tê porim.
23. Fokot rogta-soit mas khaunchem nhoi, kiteak jiv rogtant asa, ani masa borabor tumi jiv khauncho nhoi.
24. Jevonn toiar korunk rogot vaprum nakat; tem udka porim zomnir vharoiat.
25. Hea kaideak pallo divun tumi Sorvesporak manovtoleat, ani tumchem ani tumchê sonstichem sogllem borem zatolem.
26. Ekach man-nomoskarachea zagear tumcheô bhettô ani Sorvesporak bhasaileant tim dan-dennim gheun vochat.
27. Sorvesporachê vedir hulpaitat teô bhettô thoinch vhorat. Vedir rogot vharoitat, ani mas tumchean khaum-iet teô bhettô thoinch vhorcheô.
28. Hanvem dilam titlem-i tumi visvasan pallat, ani sogllem tumchem ani tumchê sonstichem borem zatolem, kiteak tumi nitt ani Sorvesporak mandta tem kortoleat.
29. Tumi ganvant bhitôr sorun to tumchea tabeant kortat tea borabor Sorvespor tea porzancho bhosm kortolo.
30. Tancheô dhorm-riti tumi pallcheô nhoi, hem tumchem nirbhag zatolem.
31. Hea vixim tumchean tanchi dekh gheunk zaina, kiteak Dev vitteta toslem teô porza aplea dhormant palltat. Bhurgeank legun vedir bhettoitat.
32. Hanvem tumkam formailam toxem sogllem korat, tantlem kãich kaddum nakat, vô taka kãich choddoum nakat.'
