1. Moizesan loka lagim uloun mhollem: 'Atam, Israela, tumkam jivit mellchê khatir ani Sorvespor, tumchea purvozancho Dev, tumkam dita to dês tumi bhôgunk paunchê khatir, hanv tumkam aiz adnia ani kaide xikoitam tankam chotraien chit diat, ani tim samballat.
2. Mhojea utrak tumi kãi choddoi nakat vô unnem kori nakat, punn hanv tumkam ghalta tea Sorvespora tumchea Devachea kaideank pallo diat.
3. Peor Dongrar Sorvesporan kitem kelam tem tumcheanch dolleamnim tumi pollelam. Thoim Baalak bhoztale tancho soglleancho bhosm kelo,
4. punn tumchea Sorvesporak visvaxi ravleat dekhun tumi ozunui jive asat.
5. Hem zanno zaiat: je nem' ani kaide hanv tumkam xikoitam, te Sorvespora Devanuch mhaka diunk laileat; tumi bhitôr sorun tumcho korunk vetat tea desant te tumi samballunk zai.
6. Te samballat, tankam pallo diat, ani oxem her lokank tumchi zannvai ani xhanneponn dixtti poddtolim. Hea nemam-kaideanchi khobor aikun, tim mhonnttolim: 'anink khoinchoch lôk hea vortea loka itlo xhanno ani zannar nhoi!'
7. Khorench ami ulo martanv tedna, Sorvespor amcho Dev jitlo amchê lagim asa, title khoinchea vortea lokache dev tanchê lagim astit?
8. ani aiz tumchê mukhar ji hanv somurt ghaltam, tiche osle nem' ani kaide khoinchea vortea lokak astit?
9. Punn chotraien ravat. Tumchea dolleamnim dekhleat teô vostu visrum nakat, ani ak'khea tumchea jivitant tumchea kallzantleô teô bhair sorunk dium nakat. Punn teô tumchea bhurgeank ani tumchea bhurgeanchea bhurgeank kollit korat.
10. Tumi Sinai Dongra-xim, Sorvespora mukhar ubim asleat, tedna tannem mhaka mhollem, 'Porjek ektthãi kôr. Hanv kitem sangtam tem tankam aikum-di, hê porim tim, aso-sor mhaka khaltim zaunk xiktolim ani aplea bhurgeankui tem xikoitolim.'
11. Kallea kupamnim liplolea, ani mollbar-voir legun bhogbhogtolea dongrachea tollar tumi koxim vochun ubim ravloleat tem tumchea bhurgeank sangat.
12. Sorvespor ujeant thaun tumchêkodde uloilolo tumi aikolem punn tachem rup polleunk na, hem-i sangat.
13. Tannem tumchê-kodde kelolo korar pallunk tumi kitem korunk favo tem tannem tumkam sanglam - Don ladieancher boroun dileat te Dha Updes tumi pallunk zai.
14. Ani tumi atam bhitôr sorun pos ghetoleat tea ganvant tumi samballunk zai te updes soglle tumkam xikoi mhonn Sorvesporan mhaka sanglam.
15. Sinai Dongrar, ujeant-thaun Sorvespor tumchê kodde uloilo tedna tumi tachem rup polleunk na. Tumcheach boreak, tea pasot,
16. bhozchea niban tumkam murti-rup korun, gheum nakat- dadlea zanv bailechem,
17. mon'zati zanv pakhrachem,
18. sorpachem zanv nisteachem.
19. Jem ontrollar tumi polletat: suria, chondrim', ani noketram, hanchi puja-seva korum nakat. Sorv her des-porzank Sorvesporan tea vostunchi puja korunk dilam.
20. Punn tumkam tea ujeachea agtteantlim, Ejiptantlim nivarun apli khas porza korunk tannem vinchun kaddleant.
21. Tumchea dhorman Sorvespor mhojer ragar zalo, ani hanv Jordan Nodi poltoddi tumkam dita tea ganvant pavchona mhonn tannem sobhemazar sangun dilam.
22. Hanv heach ganvant mortolom, ani tumi atam bhitôr sorunk lagim pavleat tea sufôll ganvant paim diunchona.
23. Tôr, Sorvesporan tumchêkodde kela to korar visrum nakat,
24. kiteak Sorvespor, tumcho Dev ujeachea agttea porim, premaxecho Dev.
25. Zaitim vorsam legun tumi tea ganvant ravun, bhurgim ani natram tumkam zolmolea uprant, tôri-i murteô korun pap adarum nakat. Hem Deva mukhar vaitt, ani to ragar zatolo.
26. Aiz hanv sorgak ani sonvsarak ulo marun govai ditam, ki xikoitam tea updesancher add vexat zalear tumcho nas zatolo.
27. Sorvespor tumkam her porzam modem hanga-thoim ximpddaitolo ani tumchê modle bhou thodde urtole.
28. Thoim, mon'xanchea hatamnim kel'lea devank bhoztoleat, lankddache ani fatrache dev, dekho-aikonant ani hungo-chakinant tosle dev.
29. Thoim, tumchea Sorvesporak tumi otrektoleat; ani niz mona-kallzan sôdxat zalear To tumkam melltolo.
30. Hem sogllem ghôddun, tumi koxttam-dukhak sampoddtôch, tumi Sorvespora sovem volltoleat ani taka khaltim zatoleat.
31. To kaklutsar Dev. To tumkam sanddchona, tumkam ibaddchona, ani tumchea purvozam kodde kelolo korar to visorchona.
32. Devan prithumer mon'xak rochla to dis thaun aiz porian tujê adim sorun geleant tea kallam lagim oxem vichar: ontrallachê êkê ximer thaun tem dusrê ximer porian edi vhoddli vost ghòddlea zait? vô ghòddlea mhonn konnem aikolam tori?
33. Ujea modem ravun uloitolea jivea Devachem utor tumi aikolam toxem, kedna tori khõichê-i porjen aikolam, ani aikun ti jivi urli zait?
34. Khoincho-i dêv koxtt dhaddun, ojapam-vismitam korun, zhuz manddun, aplo podvedar hat ani bollixtt bavllo ubarun, vhôdd bhirant dakhoun, dusrea raxttram modem apnnak ek raxttr vinchun kaddunk fuddem sorla zait? Hem sogllem Sorvespora tumchea Devan tumchea dolleam mukhar Ejiptant tumchê khatir kelam!
35. Ani aplea bhair anink Dev na mhonn tumkam dakhouncheak, Tannem tem sogllem kelem.
36. Tumkam xikounn diuncheak, sorgar thaun aplo tallo aikunk tumkam dilem; ani prithumê-ver, ujeant thaun To tumchê kodde uloilo.
37. Tumchea purvozancho Taka mog aslo dekhun Tannem tumkam vinchun kaddlim, ani Aplea podvedar bollan Tannench tumkam Ejiptantlim bhair kaddun haddlim.
38. Ani tumi asat to ganv tumcho korchê khatir, Tannem tumchea poros vortea ani bollixt porzank bhair kaddleô.
39. Tôr aichea disa hem aikun gheiat ani tumchea kallzant samballun dovrat: unch sorgar ani khala sonvsarant Sorvespor ekloch Dev, Tachê bhair dusro konn na.
40. Tumkam borem zaunchê khatir ani tumchê pattlean tumchea bhurgeank boreponn mellchê khatir ani Sorvespor Dev tumkam ditolo tea desant sodanch tumi jieunchê khatir aiz hanv tumkam ditam teô Tacheô adnia ani kaide samballat.'
41. Konnem-i, chukon dusreak jivexim marlo zalear,
42. tea mon'xan thoim pollun vechê khatir, Moizesan Jordanachê udentek tin xaram kuxinuch dovorlim. Khoinchea-i eka tantlea xarant vochun tachean aplo jiv rakhunk zatalem.
43. Reubenachea kullak Bezerachem xar, oronneantlea moidanar; Gadachea kullak Ramoth, Gileadachea ganvant; ani Manassechea kullak Golan, Bashanachea ganvant.
44. Moizesan Israel porjek Devache kaide ani xikounn dilim.
45. Ejiptantlim bhair ieun, tim Jordan Nodichê udentek, eka gholant, Beth-Peor samkar aslim tedna, tannem he kaide dile. Ho ganv Amoritanchea Sihon Patxaiacho zaun aslo, tachem raj-xar Hexbon. Ejiptantlim ieun, Moizesan ani Israel porjen tacher zoit vhelem.
47. Tacho ani Baxanachea Og Patxaiacho-i ganv tãnnim ghetlo, ho-i Amoritancho patxai ani Jordanachê udentek jietalo.
48. Ho ganv Aroer xarant thaun Arnon Nodi porian, ani ut'torêchê vatten Sirion vô Hermon Dongra-xim porian pavtalo.
49. Jordanachê udentecho prant, Mel'lo Doria porian dokhinnek, ani udentek Pisgah Dongrachea tollar porian tantunt poddtalem.
