1. Aiz hanvem tumkam dileat te soglle kaide visvasan pallat, hê porim tumkam auk favo zatolem, tumi vaddun vetoleat, ani Sorvesporan tumchea purvozank bhasaila to ganv tumchea tabeant kortoleat.
2. Tumi khaltikai bhôgunk, tumchi porikxa korunk ani tumchea kallzant kitem asa tem vollkhun gheunk ani tumi Tacheô adnia samballtat ki na tem polleunk, Sorvespora tumchea Devan koxê bhaxen challis vorsam tumkam oronneant rakhlim, tacho ugddas korat.
3. Tannem tumkam khaltim kelim, tumkam bhuk lago-xi keli ani man'na diun tumkam poslim; ho man'na kitem tem, tumi, na mhonn tumche purvoz legun, nokllo asleat. Monis unddeanuch nhoi, tôr Sorvesporachea tonddantlem bhair sorta tea sogtta vorvim jieta mhonn dakhounk oxem Tannem kelem.
4. Hea challis vorsam potttim tumchim vostram zhoron pinzunk nant, nhoi mhonn tumche paim suzunk nant.
5. Êk bapui aplea bhurgeank xikxonn divun tankam toiar korta têch porim Sorvespor tumcho Dev xikxa lavun tumkam nittaier haddta mhonn monant dhôrat.
6. Tôr, Sorvesporan tumkam formailam tittlem-i korat; tache kaide pallat, ani taka man diat.
7. Sorvespor, tumcho Dev, tumkam eka ut'tôm desant haddta; tea desant zhorintlem ani vhallantlea falkeamnim ani dongram voilean ghosghoxean vhanvta udok.
8. Gonvacho, zovacho, dak-velincho, anjirancho ani dallimbancho dês to; zoitunancho, tel ani mhonv vhanvtat toslo dês.
9. Tea desant kãi unnem korinastana tumi jevtoleat, tumkam kãich komi zaunchem na; tea desantle fator mhollear lokhondd ani thoinchea dongrantlem tumi tambem khonnun kaddtoleat.
10. Tumi khaun-pieun dhadoxi astoleat ani tumkam êk ut'tom dês dila mhonn, tumi Sorvespora tumchea Devak dhinvastoleat.
11. Aiz hanv tumkam Sorvespora tumchea Devacheô adnia, nem' ani kaide ditam tim môddun, Taka visrum nakat.
12. Tumi khaun-pieun dhadoxi zatôch ani borim-borim ghoram bandun tantum ravunk lagtôch,
13. ani tumchea gorvam ani menddram choddon-vaddon vetôch, ani tumchem rupem ani bhangar choddtôch, ani tumchi soglli aspôt vaddtôch,
14. tumi gorvan bhorom nakat. Ejiptachea desantlim, gulam'ponnachea ghorantlim, tumkam bhair kaddun haddlim tea Sorvespora tumchea Devak visrum nakat;
15. sorpamnim ani vinchvamnim hea vistardik ani bhirankull bhòrlolea oronneantlean Tannem tumkam choloun vhelim; udkak sorantt'tolea zagear ghott-nibor khoddpantlem Tannem tumkam udok kaddun dilem;
16. hea oronneant Tannem tumkam man'na diun pôslim; ho man'na kitem tem tumche purvoz legun nokllo asle; tumkam khaltikai xikounchê khatir ani tumchi porikxa korchê pasot, oso tumcho fuddar odik boro zaunchê khatir, hem sogllem Sorvesporan kelem.
17. Amcheach bollan ani amcheach bavlleachê sokten hi vhoddvik ami zôddlea', oxem tumchea monant chintum nakat.
18. Sorvespora tumchea Devacho ugddas dhôrat; Tannench tumkam boll dilam ani hi vhoddvik jikhun dili; oxem, tumchea purvozam kodde soput diun Tannem kel'lo korar, tedna toxem aiz, To tthir korta.
19. Dekhun, tumchea Sorvesporak sôddun, dusrea devanchi puja-seva korum nakat. Na tôr, aiz tumkam xiddkaitam, dubav nastana tumcho bhosm zaun vetolo.
20. Tumi taka khaltim zainant zalear, jê porim tumkam zago korunk porzank nanch kel'lim, tech porim magir To tumcho-i bhosm kortolo.'
