1. Moizesan sogllê Israel porjek ektthaim korun, tankam mhollem, 'Israel porjê, aiz hanv tumkam ditam te soglle kaide aikun gheiat ani tankam visvasan pallo diat.
2. Sinai Dongrar, Sorvesporan amchea Devan êk korar sthapun ghetlo,
3. nhoich amchea purvozam kodde bogor aiz ami jietanv tanche-i kodde.
4. Thoim Sorvespor, ujeant thaun, nitt tumchêkodde uloilo.
5. Sorvespora ani tumchê modem hanv ubo ravlom, kiteak tea ujeak lagon tumi voir dongrar gelenant. Sorvesporan mhollem,
6. 'Hanv Sorvespor tumcho Dev, hanvem tumkam Ejiptantlea gulamponnantlim soddoileant.
7. ' 'Mhojea bhair anink Dev na.
8. ' 'Mollbar zanv zomnir, udkant zanv zomni pondak asat tea vostuncheô tumkam murteô korum nakat.
9. Ani kuddea devank bhôzum nakat, hanv tumcho Sorvespor, premaxecho Dev ani konnuch virodhi mhaka mandchona. Mhozo dvês kortat tankam ani tanchê tisrê ani chovthê pinnkek porian khast laitam.
10. Punn mhozo mog kortat ani mhojea kaideank pallo ditat tanchea hozar legun pinnkank mog dakhoitam.
11. ' 'Mhojea nanvacho vaitt upeôg korum nakat, kiteak hanv tumcho Sorvespor, mhojea nanvak okman kortoleank khast laitam.
12. ' 'Sorvesporan, Tujea Devan, tuka adnia ghaleat tea pormannem Son'varacho dis pall ani povitrponnim to samball.
13. Sôv dis tum vavr kôr ani tujem sogllem kam kôr;
14. punn satvo dis, Son'var, Sorvespora tujea Devak bhettoilolo dis; tea disa tum vavr korcho naim; tum, nhoi mhonn tuzo put, vô tuji dhuv, vô tuzo chakôr, vô tuji chakorn, vô tuzo boil vô tujem gaddum, vô tuji kosli-i mon'zat, vô tumger pordexi asa to, konnuch vavr korcho na. Hê porim tujea chakran ani tujê chakornin tujê bhaxen visôv gheuncho.
15. Ejiptant tum chakôr asloi, ani tujea Sorvespora Devan Aplea bollixtt hatan ani Aplo bavllo ubarun tuka thoincho bhair kaddlo mhonn ugddas kôr. Hea pasot Son'varacho dis samballunk Sorvespora Tujea Devan tuka adnia kelea.
16. ' 'Tumchea bapaik ani tumchê avoik man diat, hanv, Tumcho Sorvespor, tumkam formaitam tê porim, ani sogllem tumchem borem zatolem, ani hanv tumkam ditam tea ganvant lamb auk bhôgtoleat.
17. ' 'Jivexim marum nakat.
18. ' Pordvar korum nakat.
19. ' 'Chorum nakat.
20. ' Tumchea peleacher lottik govai dium nakat.
21. Tumchea peleachê bailechi vô tachea chakrachi vô tachê chakornichi vô tachea boilachi vô tachea gaddvachi vô khoinchêch tachê vostuchi axa dhôrum nakat.'
22. Tumi soglle dongra-xim ekttovl'leat tedna Sorvesporan tumkam he updes dileat. Ujeant ani kalloki kupant thaun to eka bollixt tallean uloilo tedna, hech updes, dusre nhoi, tannem dile te. Magir, tannem te don fatrachea ladiancher boroun mhojêkodde dile.
23. Dongrar sogllo uzoch zal'lo ani kallokant thaun tumi êk tallo aikotaleat tedna tumche mukheli ani kullanche vhoddil mhojê-xim ieun,
24. tãnnim mhollem, 'Sorvespor, amcho Dev, ujeant thaun uloil'lo ami aikolem tedna, tannem apli thorai ani onod amkam dakhol kelim! Zori-i Dev mon'xakodde uloil'lo, tori-i tachean jivo urum-iet, hem aiz amkam thavem zalem.
25. Punn mornnachea akantak ami porot kiteak sampoddchem? To bhirankull uzo amkam nanch kortolo. Dev amchêkodde porot uloil'lo aikon zalear, dubav nastana, ami mortoleanv.
26. Dev ujeant thaun uloil'lo aikun, khoinchoch monis tori-i jivo urla zait?
27. Porot voch, Moizes, ani Sorvespor kitem sangta tem aik. Magir, hanga ieun, tem amkam sang. Ami aikotoleanv ani khaltim zatoleanv.'
28. Sorvesporan, hem aikun, mhaka mhollem, 'Ho lôk kitem mhonntta tem hanvem aikolam, ani tim mhonnttat tem khorem.
29. Oslem mon tankam sodanch aslem zalear; sodanch tãnnim mhaka man dil'lo ani mhoje updes samball'lole zalear, tanchem ani tanchê sonstichem sogllem borem zatolem aslem.
30. Chol, voch, ani ap-aplea tombumnim vochat mhonn tankam sang.
31. Punn tum, Moizes, hanga mhojê-xim rav, ani tuka soglle mhoje hukum' ani kaide divun kaddtam. Porjek te xikoi, ani hanv tankam ditam tea ganvant tim te pallum!
32. Israel porjê, Sorvesporan tumkam formailam titlem-i pallunk monant dhôrat. Tachea kaideancher add ieum nakat.
33. Punn te soglle pallat, hê porim, tumi tumchea tabeant korunk vetat tea ganvant sukhi jietoleat.'
