1. Sorvespor tumkam ditolo tea ganvant bhitôr sorun tumi tumchea tabeant ghetlea uprant, poilea pikacho êk vantto panttlent ghalun,
2. zonn-eklean man-nomoskarachea zagear gheun vechem.
3. Thoim iadnik asa tachêkodde ti panttli diun, zonn-eklo mhonnttolo, Amchea purvozank bhasailolea ganvant hanv bhitôr sorlam mhonn Sorvespora-Devak kobul kortam.
4. Uprant iadnik tujea hatantlo panttulo ghetolo ani Sorvespora tujea Devachê vedi mukhar dovortolo.
5. Uprant Sorvespora tujea Deva mukhar tum oxem uloitoloi: Mhozo bapui zaun aslo ek Arameiakar ani ganv nastana hanga-thoim to bhonvtalo; to Ejiptak gelo ani thoim apnna borabor tannem thoddeanch mon'xank vhorun êk porko monis koso aplem biradd kelem; ani thoim tea mon'xanchi sonkia vaddon geli ani ti êk vhôdd, podvedar ani ogonnit porza zali.
6. Ejiptkaramnim amkam borê bhaxen vagoilim na, tãnnim amkam tras dile ani amkam chakram kelim.
7. Magir ami Sorvesporak, amchea purvozanchea Devak ulo marlo ani Sorvesporan amcho ulo aikolo; ani Tannem amche dogdog, koxtt ani gulamponn pollelim.
8. Tedna Sorvesporan Aplê podven ani bollan, ani vhôdd bhirantichim ochoriam ani ojapam korun, amkam Ejiptantlim bhair kaddlim.
9. Amkam hanga haddun ho dês Tannem amkam dilo; hea desant dud ani mhonv vhanvta.
10. Atam, Sorvespor, ji zomin Tunvem mhaka dil'li, tichem poilem foll hanv haddtam. 'Ani tumi tem foll Sorvespora tumchea Deva mukhar dovortoleat ani Tachê mukhar tumi sorpott poddtoleat.
11. Tuka ani tujea kuttumbak Sorvesporan borim dennim dileant dekhun taka argam di; ani Levitank ani tujea ganvant jietolea porkea lokak hê khuxalkaien vantto gheum-di.
12. Dôr tisrea vorsak, tujea pikacho dhavo vantto diun kadd; ho Levitanchea, porkea-lokachea, bapui ani ghôv nasloleanchea faideak; hê porim, khoinsorui te asum, thoinchea loka modem goroz tem jeunk-khaunk tankam astolem. Oxem kelea uprant,
13. Sorvespora Deva mukhar mhonnttoloi, Tea dhavea vantteantlem hanvem kãich mhojea ghorant dovrunk na; tem hanvem Levitank, porkea-lokak, ani tuvem formailaim toxem, bapui-ghov nasloleank hanvem tem dilam. Hea dhavea vanttea vixim hanv kãich visrunk na, ani tujea kaideak pallo diuncho sôddunk na.
14. Dukhant aslom tedna hanvem tantlem kãich khaunk na; riti pormannem hanv oxud'dh aslom tedna hanvem tantlem mhojea ghorantlem bhair kaddunk na; ani tantlem hanvem kãich mel'leank diunk na. Hanvem ekannem hea dhavea-vantteachea kaideak pallo dila.
15. Sorginchea tujea povitr zagear thaun amcher sokla tuji doiall dixtt ghal ani tujê Israel porjecher axirvad ghal; tech porim, amchea purvozank kel'lê bhasavnnek pallo diun, ho sufôll ganv amchea tabeant kelai tacher-ui tuzo axirvad ghal. '
16. Sorvespor Dev tumkam aichea disa he kaide ani adnia samballunk formaita. Sogllea tumchea kallzan ani sogllea tumchea monan tim samballat ani tankam pallo diat.
17. Sorvespor tumcho Dev mhonn, ani tumi Tacheô vattô dhôrtoleat, Tache kaide ani adnia samballtoleat, ani Tachea utrak pallo ditoleat mhonn sobhêmazar Sorvespora vixim tumi aichea disa sanglam.
18. Ani tumi Aplê bhasavnnê pormannem zôddloli apli khaxa porza mhonn Sorvesporan aichea disa sobhê-mazar sanglam.
19. Tache updes tumi samballxat zalear, To tumkam sogllea rochlolea raxttram voir ubartolo, aniTachê bhasavnnê pormannem Sorvesporak bhettoiloli porza tumi zatoleat.'
