1. Abib mhoineant, Sorvesporachea manak, Suttkechi Porob korat. Hea mhoineant ratchea vellar tannem tumkam Ejiptantlim sôddoilim.
2. Man-nomoskarak vinchun kaddlolea zagear vochun, Sorvesporachea manak Suttkechem jevonn korchê khatir, tumchem ek menddrum vô ghorum marat.
3. Hea jevnnak tumi khomir-aslolo unddo vapurcho nhoi. Sat dis khomir-naslolo unddo tumi khauncho, kiteak Ejiptantlim bhair sorleat tedna tumchem pitt fugi-mekllem aslem. Oslo unddo tumi khauncho, ani taka koxttancho unddo mhonn pachartole, kiteak tumcho jiv asosor ho Ejiptantlo koxttancho zago tumi visorchenant.
4. Tôr, hê porbeche sat dis tumchea ghoramnim khomir aschem nhoi; ani poilea disachê sanjê jem zonavor tumi martoleat, tech rati tem sompoun kaddchem.
5. Suttkechê Porbek zonavoram ekach zagear tumi martoleat, ani khoinsoruch nhoi. Ani hem dis dharer poddchea vellar, kiteak hea vellar tumi Ejiptantlim bhair sorloleat.
7. Tem mas, ekach man-nomoskarachea zagear ukddun khaiat, ani dusrê sokallim ghora ieat.
8. Ani urlole sôv dis tumi khomir aslolem kãich khaunchem nhoi. Satvea disa, Sorvesporak man-nomoskar diunk soglleamnim ekttovchem, ani vavr korcho nhoi.
9. Tumi lunvunk-paddunk suru kortat tedna thaun sat satollim mezat,
10. ani magir Sorvesporachea manak satolleachi porob somorombhat. Ani Devan tumkam dilam tea mapan tumchi khoxechi bhett haddat.
11. Sorvesporachea fuddeant sontosbhorit zaiat, tumi ani tumchim bhurgim ani chakor, tumchea ganvant ravtat te Levit, ani porko-lôk, bapui naslolim bhurgim ani ghova-meklleô zal'leô bailô. Ani hem tumi sogllem ekach zagear korat.
12. Hea kaideank pallo diat, ani tumi-i Ejiptant chakor-gulam' asleat mhonn visrum nakat.
13. Sogllem môllun, ani paddlolem pillun somptôch, sat dis hi Mattvanchi Porob somorombhat.
14. Tumchea bhurgeam ani chakram sangata, ganvantle Levit ani porko lôk, bapui naslole bhurge ani ghov-nasloleô- hanchea soglleam sangata, Sorvespora mukhar sontosbhorit zaiat.
15. Sat dis hi porob korun, Sorvesporak man diat. Sogllim ekach zagear hi somorombhnni korat, ani Sorvesporan tumchea vavracher axirvad ghalun borem pik dilam dekhun sontosbhorit zaiat.
16. Tumchea sogllea dadleamnim vorsak tin pavtti Sorvesporak man-nomoskar diunk hea ekach zagear ektthovchem: Suttkechê Porbek, Pikachê Porbek, ani Mattvanchê Porbek.
17. Ek-eklean, ap-aplê tanki pormannem Sorvesporak êk bhett haddchi.
18. Sorvespor tumkam dita tea sorv xaramnim nitidar ani her opxal vinchun kaddat. Ani hannim lokachi favo tê porim nit korchi.
19. Formonn martana, tãnnim onit pois korchi ani tonddak polleunchem nhoi; lonch gheunchi nhoi- sagvad dolleancher kallôkh haddta ani xanne monis legun burxetat.
20. Sodanch nit ani mannsugi samballat, hê porim, Dev tumkam dita tea ganvant tumkam lamb auk mellchem.
21. Sorvesporak vedi ubhartat tedna, tachê kuxik Ashera-devichi kuru-khunna ghalum nakat.
22. Ani murti-puja korcheak, fatrache khambe ubharum nakat. Sorvespor-Dev haka kanttallta.'
