1. Prithumê ani mollbamnô, mhojim utram aikat, Hanv kitem mhonnttam taka chit diat.
2. Pavsache thembe koxe mhoji xikounn gôlltoli ani zomnir dôv koso zomtolo. Pavs vot'ta tê porim mhojim utram lhan zhaddancher, ani xitoll xiddxiddo mozur tonnacher.
3. Sorvesporachem nanv hanv vakhanntolom, ani Tachi thorai uchartoli tachi porza.
4. Sorvespor tumcho êk bollixt rakhnno, korta titleant-ui sopurnn ani nitt; Tumcho Dev utrak visvaxi ani khoro; favo ani nitt titlem-i to korta.
5. Punn tumi dusvaxi, tachê porjê purtim nhoi, papi ani fosoita tosli des-porza.
6. Hê porim tumi Dhonia sovem cholchem, Onnbhov ani soirann naslolê porjê? To tumcho bap, tumcho Rochnar, Tannem tumkam êk dês-porza kelea.
7. Gel'le dis niallat, patthle-patthle kall; kitem ghoddlem tem tumchea bapaiam kodde vicharat, ani patthlea kallam vixim zantte tumkam sangtole.
8. Sorvpodvedaran des-porzank tanche ganv dile, konnem khoim jieunchem tem Tannem tharailem, punn Devachea putam khatir, mon'xancheô ximô vornileô.
9. Ani Jakobachê sonstik Tannem vinchun kaddli.
10. Firun firtana tim Taka oronneant mell'lim, suklolea, varean sôddlolea oronneant tim aslim. Tannem tankam rakhlim, ani aploch korit aslo toso tancho samball kelo.
11. Êk ghonn aplea pilank uddunk xikoita, ani paktte vistarun tancher, tankam samballta tech porim Sorvesporan Israel porjek rakhli.
12. Sorvesporan apnnench aplê porjek choloun vheli khoincheach porkea devachi taka goroz na.
13. Unch zageancher raj cholounk tankam dilem ani xetamnim piktalem tem tãnnim khelem. Tankam zhonglli mhonv khoddpamnim mell'lem; Telachim zhaddam tanchim khoddpi zomnir posorlim.
14. Gai-bokddeô tancheô dudak zobôr boreô; Boreantlim menddram, bokddeô-gorvam tãnnim pôslim, gonv ani soro tancho sôr korunk zaina toslo.
15. Sorvesporachi porza girestkaien vaddli, punn aplêch mijaxin tacher ti kolpoli; jevun-khavun tankam chorob choddli. Tannim sôddlo aplea Dev-Rochnarak ani patth voll'li aplea bollixtt soddvonndarak.
16. Tannim murti-puja korun Sorvesporak zall dile; Vaitt jem adarlem tantunt tacho rag petthlo.
17. Je dev nhoi tankam tãnnim bhettô keleô, attvech, tanchea purvozank hea devanchi vollokh nasli. Israel kednanch khaltem zalem na tosle dev.
18. Aplea khud Devak, bollixtt soddvonndarak, tankam jiv-jivit ditoleak tim visorlim.
19. Hem polleun Sorvesporacho rag petthlo, ani aplea putam-dhuvank tannem sôddlim.
20. Anink hanv tankam adar diunchona, tannem mhollem, 'ani hê apleach-vhadeachê, dusvaxi porjek kitem zata tem hanv polletolom.
21. Tanchea murteamnim mhaka rag haddlo, dev mhonnttat, punn te khore dev nhoi, tea vorvim mhaka zall petthle. Tôr, porza nhoi tika porza koxi lekhin tankam-i rag ietolo; pixê porjechi opurbai korin tankam-i zall petth'tole- oxench kortolom!
22. Ujea porim mhozo rag voir sortolo ani prithumêver sogllem hulpaitolo. Voir-thaun uzo zomni pondak pavtolo ani dongranchim mullam legit lastolo.
23. Nirbhagar nirbhag tancher haddtolom ani soglle mhoje bhale tancher martolom.
24. Zora-buken te vollvolltole, jin'savar pidden mortole. Tankam girasunk ran'votti mon'zati dhaddtolom, ani tankam chabunk vikhalle sorop.
25. Zhuz uprastolem, rosteancher te mortole; ani ghoramnim tanchea jin'savar khorgam astolim. Torne dadle ani torneô bailô morun vetolim, lhan bhurgim ani mhatare legit suttchenant.
26. Ekannem hanv tanchem nisontton korin aslom, hê porim konnakuch tancho ugddas aschona.
27. Punn tanchea dusmanak gorvan fulonk diunchona, ki tãnnim 'mhojê porjecho nas kelo, jedna hanvench tika chepun uddoili.'
28. Israel êk soirann-nasloli porza; onnbhov-xanneponn tika bilkul na.
29. Tanchem ghortthan koxem zalem hem tankam orthona; tankam kitem ghoddlem tem legit tankam somzona.
30. Eklean kiteak eka hozarak marle, ani dha hozarank fokot dogamnim? Sorvesporan, Tanchea Devan, tankam sôddlole; Tanchea bollixtt Devan tankam pois kel'le.
31. Aple dev, Israelachea Deva porim bollixt nhoi, chodd osokt, hem tanche dusman borem zannot.
32. Tanche dusman, Sodom ani Gomorrah porim vikott, koddu ani vikhalleô dakô ditat tosleô vali,
33. tancho soro sorpanchea vikhacho kel'lo koso.
34. Dusmanamnim kelam tacho Sorvesporak ugddas asa; aplea borea vellar tankam khast lavunk ravta.
35. Farikponn gheun Sorvespor tankam khast laitolo; vêll pavtôch te konsllon poddtole; tancho niti-odruxttacho dis pois na.
36. Aplê porjechem boll sogllem somplem tem polleun, Sorvespor tika nivartolo; itle niradari zaleat dekhun, Apli seva kortoleanchi to doia kortolo.
37. Magir Sorvespor-Dev aplê porjek vichartolo, 'Tumi patiel'leat tea devanchi podvi khoim pavli?
38. Bhettô korun tumi tankam chorob khavoili ani pieunk tankam soro-i ghalo.' Atam tankam tumchea adarak ieum-di; ani taktin ieun te tumchi soddvonn korum.
39. Hanv, ani hanvuch-eklo, Dev, mhojê bhair Dev na. Hanv jivit ditam, ani hanvuch porot vhortam; Hanv dukhoitam, ani hanvuch pekhoitam, ani konnachench mhojê virudh cholona.
40. Hanv khoreponnim Dev, ani mhojea sotan sangtam:
41. Ujea sarki mhoji torvar paztolom, ani nit kortolom. Mhojea dusmanam-thaun farikponn ghetolom ani mhozo dvês kortat titleankui xikxa laitolom.
42. Mhoje bhale tanchea rogtant buddtole, ani mhojê virudh ietat tankam mhoji tôrvar kaptoli. Mhojea angar ietat tantlea ekleakui sôddchona; dukhovleat tancho ani koideancho-i jiv vetolo.'
43. Dês-porzamnô, Sorvesporachê porjek vakhannat: tancho jiv kaddtoleank to khast laita. Aplea dusmanam-sun to farikponn gheta ani aplê porjechim patkam bhogxita.'
44. Israel porjek aikunk ieta toxem, Moizesan ani Joshuan, Nunachea putan, dogaimnim hem git mhollem.
45. Moizesan Sorvesporachi xikounn porjek dilea uprant,
46. tannem mhollem, 'Aiz hanvem tumkam Sorvesporache hukum' dileat te pallunk visrum nakat. Tumchea burgeanchea kanar te ucharat, hê porim tim visvasan Sorvesporachea formonnank pallo diunk pavtolim.
47. Hi xikounn bexttim utram nhoi; ti tumchem khud jivit. Tika pallo diat, ani Jordana-poltoddi vochun tumchea tabean kortolea tea ganvant tumkam lamb auk favo zatolem.'
48. Teach disa, Sorvespora-Devan Moizesak mhollem,
49. Moab ganvant, Jeriko samkar,, Abarim' Dongor asat thoim voch; Nebo Dongor chodd, ani hanv porjek ditolom tea Kanaan ganvcher nodor mar.
50. Aaron tuzo bhav Hor Dongrar melo tê porim, hea Dongrar tum mortoloi,
51. kiteak Israel porjê mukhar tumi dogaimnim mhojer visvas dovorlona. Meribachea udkam-xim, Zin-oronneantlea Kadesh xarant tumi asleat tedna, porjechea fuddeant tumi mhaka beman kelo.
52. Tôr, Israel porjek hanv atam bhitôr kaddcho zalom, punn tum thoim vechonaim, tea ganvcher pois thaun nodor mar.'
