1. Moabachea moidanailo Moizes Nebo dongrar Jerikechea samkar aslolea Pisgachê tenkxer choddlo ani Sorvesporan taka ak'kho dês dakhoilo: Gilead tem Dan porian,
2. ak'khem Naftali, Ostontechea Doria porian Efraimacho ani Manassecho ganv ani Judacho sogllo ganv,
3. Negeb ani Zoar porian khazur-maddamnim bhòrlolea Jeriko xarachea falkeachem moidan.
4. Ani Sorvesporan taka sanglem: 'Ho dês Abrahamak, Izakak ani Jakobak ditolom mhonn Hanvem soput ghetlolo, oxem mhonnun: Hanv to tujê sonstik ditolom. Tujeach dolleamnim to dês Hanvem tuka polleunk dilo, punn tum thoim pauncho naim.'
5. Thoim Moabachea ganvant Sorvesporachea nirnnoia pormannem Sorvesporacho sevôk Moizes melo;
6. Moabachea ganvant, Beth-Peiorchea samkar aslolea falkeant taka purlo; punn aiz porian tachi somadhi konnak mellunk na.
7. Moizes mela tedna taka ekxem-vis vorsam aslim; tachea dolleanchi nodor unni zaunk nasli ani tachem boll denvunk naslem.
8. Israelacheô put-dhuvô Moizesak Moabachea moidanar tis dis roddleô. Magir Moizesa khatir dukh korpache dis somple.
9. Nunacho put Joshua zannvaiechea atmean bhòrlolo, kiteak Moizesan tacher aple hat dovorlole; Sorvesporan Moizesak dil'lo to hukum' pallun Israelachea putam-dhuvamnim tachem utor aikolem.
10. Tethun thaun Israelant Moizesa oslo provadi anink dixtti poddunk na; Sorvespor tachê kodde mukhamukhim uloitalo.
11. Tachê udexim Ejipt desant Faraoh ani tachea sogllea sevokam hujir ani desa mukhar Sorvesporan khunna ani ojapam kelim tê babtint,
12. ani toxench ak'khea Israelachea dolleam mukhar podvedar bavllean ani vhodd bhem dakhoun Moizesan kortutvam kelim tê babtint, tachê-oslo dusro konn na zalo!
