1. Zo ganv Sorvespor tumkam ditolo tea ganvchea lokacho nas zalea uprant, ani tumi thoinch thikann kortôch,
2. tea ganvche tin vibhag korat ani eka-eka bhagant, sompeponnim thoim vochunk zata toxem, ek-ek xar asum-di. Konnui, chukon, dusreank marta to thoim veginch vochun aplo jiv rakhtolo.
4. Ho monis tacho dusman nhoi, punn koslea-i eka obsoegan tacho jiv kaddlo, tea pasot, tea xarant pollun veta.
5. Somzum-ia: dog monis borabor ranant lankddam katrunk gel'le; ani ekleachi kuradd apxinch danddeachi sutton dusreacher usoll'li ani to melo; hannem veginch tantlea eka xarant dhavun, farikponn gheunk sôdtoleachea hatantlo suttunk zai.
6. Ekuch xar asot zalear, tachean ghoddiê thoim pavunk zaina zait, ani mel'leacho soiro farikponna vixim zobabdar asa to taka dhôrtolo ani sabsubo jiv kaddtolo. To chukon melo, koslich dusmankai nasli.
7. Dekhun, tin oslim xaram vinchun kaddunk hanv formaitam.
8. Sorvesporan tumchea purvozank bhasailam tê porim, soglle ganv to tumkam divunk sôdta title-i tumchea tabeant zatôch, tumcheô ximô tôri-i vaddtoleô;
9. tedna tumi aninkui tin xaram asorak vinchun kaddchim. Aiz hanv tumkam formaitam titlem-i tumi pallxat, Sorvesporacho mog korxat, ani tachê xikounnê pormannem jiexat zalear, to tumkam ho sogllo ganv ditolo.
10. Ani Sorvespor tumkam ditolo tea ganvant tumi prann-ghatki zaina zaunk toxem korat.
11. Punn, somzum-ia, eklo konn khorench aplea dusmanak marun, khun adarta ani tea xarant asôr gheta.
12. Tea xarantlea mukheleamnim tea mon'xak thoincho sôdun haddcho, ani mel'leachea farikponna vixim zo soiro zobabdar, tacho jiv kaddunk taka tachea tabeant korcho.
13. Tachê sovem koslich kaklut dakhounchi nhoi. Hê porim, Israelant khun-adartole anink aschenant.
14. Sorvespor tumkam ditolo tea ganvant, tumchea xezareachea bhattacheô, adim thaun tharailoleô ximô-merô haloum-bodlum nakat.
15. Koslech vostu vixim konnakui gunneanvkari korunk êk govai puro nhoi, bogor dog tôri gorjeche.
16. Zôr konnui dusreacher boglantt ghalun taka vaitt korunk sôdta,
17. dogaimnim tea man-nomoskarachea zagear vechem.
18. Nitidar ani iadnik barkaien choukoxi kortole, ani aplea Israeli-bhavacher tannem bogllant ghalam mhonn thavem zait zalear,
19. ji khast dusreak favo zait asli tich bogllant ghaltoleak diunchi. Hech porim osli lottik govai porjê modli pois zatoli.
20. Hem heranchea kanar poddtôch, soglle bhietole, ani bogllant ghalunk fuddem sorchenant.
21. Oslea vostumnim koslich kaklut dakhoum nakat, bogor khast, oxi: 'Jivak jiv; dolleak dollo, dantak dant, hatak hat, ani pãiank paim.'
