1. Aiz hanv tumkam ditam tea sogllea Sorvespora Devachea kaideank visvasan pallo dixat zalear, to tumkam prithumêvelea sorv porzam poros vhôdd kortolo.
2. Tumchea Sorvespora-Devak khaltim zaiat, ani ho axirvad tumcher poddtolo:
3. Sorvespor-Dev tumchea xarancher ani xetancher aplo axirvad ghaltolo.
4. Sorvespor-Dev, tumkam zaitim bhurgim diun, tumchem pik, gorvam ani menddram vhaddoun tumcher axirvad ghaltolo.
5. Sorvespor-Dev tumchea orovacher, zhaddpaleacher ani hanchem jevonn toiar kortat tacher aplo axirvad ghaltolo.
6. Tumi kortat titleai-cher Sorvespor Dev aplo axirvad ghaltolo.
7. Tumchê virudh dusman ietat tedna Sorvespor-Dev tanchem boll môddun uddoitolo. Ekê vattentlean te ietole, punn zollim-mollim ximpddon te porot vetole.
8. Tumchea vavracher Sorvespor-Dev aplo axirvad ghaltolo ani tumche kodde orovan bhortole. To dita tea ganvant tumcher axirvad poddtolo.
9. Sorvespora-Devak khaltim zaun, soglle tache kaide pallxat zalear, tannem bhasailam tê porim tumkam apli khas porza kortolo.
10. Ani soglleô porza hem polleun tumchê bhirantin jietoleô.
11. Ani tumkam ditolo mhonn purvozank bhasail'lea tea ganvant tumkam Sorvespor-Dev zaitim bhurgim ditolo, tumchim gorvam-hindd vaddoitolo, ani bhorpur pik ditolo.
12. Aplea bhorlolea mollbar thaun, goroz tea vellar pavs ghaltolo; ani tumchea vavrar Sorvesporacho axirvad poddun, tumi zaitea porzank vaitt dakhoitoleat, tanchi tumkam goroz aschina;
13. aiz tumkam ditam tea Sorvesporachea sogllea kaideank pallo dixat zalear, soglleant tumkam bori suttka melltoli, ani khoinch luskonn zaunchem na.
14. Kednanch uzvê vô dhavê vatten vôllun tancher add vochum nakat, dusrea devank bhôzum nakat, vô tanchi seva-puja korum nakat.'
15. Punn aiz hanv tumkam ditam tea sogllea Sorvesporachea kaideank pallo dina zaxat zalear, hem sogllem noxtt tumcher ietolem:
16. Sorvespor-Dev tumchea xarancher ani xetancher aplo xirap ghaltolo.
17. Tacho xirap tumchea konnea-danneacher, ani jem jevonn randtat tacher.
18. Tumchea bhurgeam vixim, pika ani hindd-gorvam vixim sufollai denvtoli.
19. Tumi kortat titleaicher tacho xirap astolo.
20. Khotteponn adarxat, ani Sorvesporak patth vollxat zalear, tumcher nirbhag ietolem, oddchonnink sampddon tumi ghuspotoleat, ani tumchem nisontton zatolem.
21. Tumcher to jin'savar pidda dhaddtolo, ani jea ganvant bhitôr sorche asat thoim tumchê modlo eklo-i jivo urchona.
22. Tumkam voxeachi pidda lagtoli, tumchem ang suztolem ani zôr ietolo; to tumkam pavs ghalchona, sogllem sukon veta toslem varem dhaddtolo,
23. ani pavsa viret tumchi zomin lokhonna porim ghôtt zatoli.
24. Pavsachê bodlek, dhul'li-renvechim tufanam uprasun sogllem ibadd zatolem.
25. Tumchê virudh Sorvespor-Dev dusmanank zoit mello-xem kortolo. Tumi ekê vatten tanchea angar vetoleat, punn tanchê-sorxile choxim-i dhanvtoleat; ani tumkam oxem ghoddlolem polleun sogllo lôk kamptolo.
26. Tumi mortôch, suknnim ani ran'votti mon'zati ieun tumchim moddim khatolim, ani tankam ambddunk konn aschona.
27. Ejiptantlea lokak kel'lem toxem, Sorvespor-Dev tumchea angak fodd futto-xe kortolo, tanchim chovnam zatolim, khonvllam manddtolim ani tim khorzunk lagtolim ani tumi, upai nastana, koxttovtoleat.
28. To tumchi mot pixi kortolo, tumkam kudd'ddim kortolo, ani tumi guspotoleat.
29. Tumkam vatt dischina, kudd'ddeam porim sanspon choltoleat. Khoinchech vatten tumkam sukh aschem na. 'Dusre tumkam tras ditole, lutt'tole, ani konnuch tumchea adarak ieunchona.
30. Soirik zal'lea tumchea cheddvakodde dusroch konn logn zaun vetolo. Tumi ek ghor bandtoleat, punn tantunt ravunk pavchenant. Dakancho mollo laitoleat, punn tacheô dakô kednanch khaunchenant.
31. Tumchea dolleam hujir tumchea gorvank marun uddoitolim, punn tumi tanchem mas khaunk pavchim nant. Tumchea gaddvank ukhlun vhortolim, ani tumi tankam tellun polletolim, ani tumkam tim porot mellchim nant. Tumchim menddram dusmananchea hatant poddtolim, ani tumkam adar diunk konnuch aschona.
32. Tumchea putank ani dhuvank porko-lôk chakram-gulam' korun vhortolo, ani tumi tankam polletoleat. Tumchim bhurgim kedna porot iet mhonn tumi disachea disa vatt polleun astolim.
33. Vompunk-lavunk tumi koxttovtat tea xetanchem pik boltoch lôk ghevun vetolo, tumkam kãich mellchem na, bogor tras ani zulum!
34. Hea koxttam vorvim tumchi mot pixi zatoli.
35. Tumchea paiank fodd futt'tole, ani pekonant tosle ghai zatole, tokli te paim legit.
36. Sorvespor-Dev tumkam ani tumchea patxaiak poixilea ganvant, tumi nhoi vô tumche purvoz kednanch jieunk nant thoim vhortolo; thoim tumi lankddachea ani fatrachea devanchi seva-puja kortoleat.
37. Jea porzam modem tumkam Sorvespor-Dev ximpddaita, teô tumchi goth polleun thottaktoleô, ani tumchim khebaddam-moskoreô kortoleô.
38. Tumi zaitem vomptoleat, punn bhou thoddem piktolem, kiteak toll ieun tumchim xetam girastole.
39. Tumi dakanche molle laitoleat ani tanchi zaiti mhenôt kortoleat, punn tancheô dakô kaddchenant vô tancho soro-i pieunchenant, kiteak kiddi tumcheô vali khatoleô.
40. Tumchea ganvant puskôll zoitunachim zhaddam astolim, punn tumkam tel mellchem na, kiteak zoituna adinch zôddtolim.
41. Tumkam put ani dhuvô zolmotolim ani tumkam tim ontortolim, kiteak tankam zhuzache koidi korun vhortole.
42. Tumchim zhaddam-peddam kidd-jiv tim khatolim.
43. Tumchea ganvant jieta to porko lôk tikê-tikê tumchê-voir podvi cholounk pavtolo.
44. Tumchêkodde duddu aschenant, ani te tumkam usnne ditole. Ani xekim tumcher te raj choloitole.
45. Hem sogllem nirbhag tumcher ietolem ani tumi na-zai porian tantle tumi suttchenant, kiteak tumi Sorvespora-Devak ani sogllea tachea kaideank khaltim zalim nant.
46. Ani heach pasot tachi nit tumcher denvli mhonn tumkam ani tumchê sonstik sodankal thavem zatolem.
47. Sorvoi vatten Sorvesporacho axirvad tumcher poddlolo, punn sontosbhorit kallzan tachi seva korunk tumi kobul nasleat.
48. Tôr atam, Sorvespor tumcher dhaddtolo tea dusmananchi tumi seva-chakri korchi poddtoli. Tumi bhuketoleat, tanetoleat, ani nagddim-vingllim astoleat; ani tumi na-zai porian Sorvesporacho hat tumkam cheptolo.
49. Sonvsarachê ximer thaunSorvespor êk des-porza tumchêmodem haddun uddoitolo, hanchibhas tumkam somzochina. Ani êkghonn aplea savzacher zhompoimarta têch porim ti tumcher ieunpoddtoli.
50. Ho lôk tumkam ekannem dharunn zaun astolo, ani konnakuch, lhanank zanv zantteank kaklut dakhounche nant.
51. Tumchem jiv-jivon, ani xetant kitem urlam tem te khaun uddoitole, ani tumi bhukechea zallank sampoddtoleat. Tumcho orôv, soro ani tel, ani gorvam-menddram legit khavun te nanch kortole; ani tumi mortoleat.
52. Ani Sorvespor tumkam ditolo tea ganvant, khoinsoruch, tanchea zuluma virudh tumkam asor mellchona; tumchim ghôtt kottam môddun sokla ghaltole.
53. Ani tumche dusman hê porim veddo ghalun tumkam vornitat ani jevnna-khannachi tutt ieta tedna, tumchea bhurgea-ballank legun khaunk tumi toiar astoleat.
54. Ani bhukechea vollvolleamnim, mansugecho legit dadlo aplea bhurgeak ekloch khatolo ani konnakuch ilem diunchona.
56. Têch porim, man-respetachi ani unch-kulliechi legun ostori, oslo kall ietôch, aplea rigvench zolmol'lea porak guptim girastoli, nhoinch taka bhogor apli var legun ti gilltoli; eklich, ti hem sogllem khatoli.
58. Hea pustokant boroun dovorlea ti Devachi xikounn tumi pallinant ani tachea nanvak man dinant zalear,
59. to tumcher ani tumchê sonsticher bhirankull ani sanvrona tosli pidda dhaddtolo.
60. Ejiptant lokacher dhaddloleô tosleô pidda tumcher-ui ietoleô, ani tantlim tumi borim zaunchinch nant.
61. Tea bhair, Devachea kaideam xikounnechea hea pustokant khobor korunk na tea poros oglleô pidda tumcher ietoleô ani tumcho nas zatolo.
62. Ani noketram porim tumi vaddun geleat-ui zalear, bhouch thodde tumchê modle jive urtole, kiteak tumi Devachea kaideank pallo dilona.
63. Ani hê porim tumchi sonsôt vaddounk to adim sontoslolo tech porim atam tumkam ilim-ilim nanch korunk taka sontôs bhogtolo. Ani atam tumi bhitôr sortoleat tea ganvantlim tumkam bhair kaddtolo.
64. Sonvsarachê ekê ximer thaun dusrê ximer porian Sorvespor-Dev tumkam sorv des-porzam modem ximpddaitolo, ani thoim tumi lankddachea ani fatrachea devank bhoztoleat; tumi nhoi, tumchea purvozamnim kednanch korunk na toslem tumi korunk pavtoleat.
65. Tumkam khoinsoruch sovostkai mellchina, kiteak tumcho khas ganv-dês khoinch aschona. Sorvespor tumche koxtt vaddoitolo ani tumchea kallzant niraxea upzoitolo.
66. Tumcho jiv sodanch akantak sampoddtolo. Dis-rat tumi bhirantin jietoleat.
67. Tumi polletat titleakui tumchem kalliz dhoddoddtolem. Sokallchea vellar tumi sanjek otrektoleat, ani sanjechea vellar sokallink.
68. Zori-i Sorvesporan mhollem tumi anink kednanch Ejiptant vechenant, tôri-i to tumkam tarvancher ghalun thoim vhortolo. Thoim, chakor koxe tumkanch vikunk sôdtoleat, punn konnuch tumkam gheunchona.'
